Langsung ke konten utama

6 Rekomendasi Soto Banjar Enak di Banjarmasin

 

soto banjar (source.dokpri)

 

Assalamualaikum, apa habar bubuhannya?


Han tetamu lagi lawan artikel FBB nang hari ini handak membahas soto banjar di Banjarmasin. Sudah tahu kalo bahwa soto banjar ngitu makanan khas atawa makanan tradisional khas banjar. Khas banjar ngini artinya lain di Banjarmasin haja, tapi mewakili samuaan urang suku banjar. Jadi pabila ada urang bacari soto banjar dimana haja di buncu kalsel ngini pasti ada nang bajual ya kalo.


Tapi hari ini, kita dasarnya handak mambahas soto banjar nang ada di Banjarmasin haja. Jadi kan Banjarmasin ngitu sebagai pusat perdagangan kalsel, nyata pang mun orang dating kasini tuh bejalan ke Banjarmasin, bukan Cuma urang luar daerah tapi jua urang-urang banjar nang di luar kota nyata pang katuju bejalanan atawa belanja ka Banjarmasin. Rata-rata tuh nang dicari ya soto banjar  tupang sebagai kuliner khas kasukaan urang suku banjar.


Kada usah gin lah kapapanjangan intronya, langsung haja ulun bagikan gasan pian barataan. Dimana Gerang nang nyaman-nyaman soto banjarnya tuh. Pasti handak nang nyaman kalu, nang dikatujui urang banyak dan yang payu, lihati dulu dibawah ni.


Rekomendasi Soto Banjar Favorit di Kota Banjarmasin


1.    Soto Banjar Bang Amat, Jalan Banua Anyar

Mun ngini liwar pang, terkenal banar, banyak artis wan urang luar kota mun kasini tahu pang lawan soto banjar nang sabuting nih, terkenal banar. Maka disini tuh ada satenya jua, ada jua sewaan kapal gasan ke pasar terapung, lawan ada jua hiburan musik kesenian khas banjar, jadi mode kaya sepaket tu nah disana mun gasan turis. Harganya lumayan pang telarang pada dilain tapi soal rasa diakui pang dasar nyaman tu pang, hancuy liyuy jar urang banjar.

soto banjar bang amat (source trip advisor)

2.    Soto Kuin Kelana, Jalan S. Parman

Ngini kada tapi ganal warung sotonya, tapi soal rasa kada kalah pang lawan nang lain, lokasinya pas subarangan Gedung Susu alias Gedung Sultan Suriansyah, mun lawan kampus ULM gin parak, jadi gasan pian nang sekitaran ULM atawa kayutangi kawa pang kasini mun handak soto.


3.    Depot Soto Haji Irin, Piere Tandean

Nahhh, amun buhan pian lagi bejalan ke siring sungai piere tandean, mun lapar handak makan soto nang nyaman, kawa banar singgah kasini. Nah ngini tuh kisahnya, buhan FBB bahari suah jua segroupan kesana beramian makan soto, dasar nyaman rasanya lawan harganya kada tapi larang sadang haja jua toh kada menyakiti dompet, hahaha. Kuahnya sedap banar perasa ulun lah, mun kada percaya cubai ha kesana.


4.    Soto Sate Pahlawan, Jalan Pahlawan

Nah, ngini nih lah bujur haja pang pina halus depotnya mun dilihat di google maps, rapat banar ha pulang ke jalan. Tapi mun soal rasa kawa diadu. Beantri urang makan disana tuh. Maka depotnya nih lawas banar sudah berdirinya artinya sudah diakui dasar nyaman dan banyak nang manukar. Amun pian handak marasai makanan khas banjar nang sabuting nih kesana, jangan kada ingat merasai satenya, nyaman banar jar urang-urang tu.


5.    Soto Apung, Kampung Biru

Nah, pabila buhan pian bejalanan bekelotok telalui kampung biru, singgah dah cobai sotonya. Ngarannya soto apung soalnya mengapung diatas banyu. Han, mun handak merasai sensasi nang lain pas mamakan soto cobai kesini, ngarannya ombak banyu nyata ai makan baguyang-guyang, tapi disitu pang khasnya makan diatas sungai mengapung nih, asa rami asa gair jua apalagi mun kada bisa bakunyung hahaha, menakutani haja ulun sekalinya. Kada pang lah, kada seseram itu.


6.    Soto Banjar Queentana, Jalan Zafri Zam-Zam

Uma ai nang terakhir ni pina meanduh-anduh ngarannya, pina inggris-inggris kayapakah. Tapi disini tuh ngarannya memang daerah Kuin, Cuma rajin tu di plesetkan urang jadi queen, sakira keren tu nah dibaca urang, padahal aslinya Kuin. Di Kuin ni terkenal dengan sotonya, rancak urang menyambat soto Kuin. Cuma di Kuin tu saking banyaknya soto bingung kalo, jadi ulun rekomendasikan soto queentana ini. Soto disini nih mun jam istirahat kerja rami banar pegawai makan disini, ayam bapukahnya gonol, maka satenya gin nyaman. Rajin tu ngalih dapat kursi mun jam makan siang, baik hari libur pang kesini tasunyi sadikit.

Nah itu tadi rekomendasi Soto banjar di kota Banjarmasin nang patut pian cubai, insyaallah nyaman pang lah, karena ini rata-rata depot lawas nang ulun kisahkan nih. Mudah-mudahan buhan pian jadi ngiler dan langsung bacari soto banjar imbah ini, aamiin.

***


Nang manulis: ruliretno.com

Nang manyunting: irabooklover.com

Komentar

  1. Yang pernah aku coba cuma soto banjar bang amat. Soalnya kek udah terkenal banget

    BalasHapus
    Balasan
    1. Inggih Ka, terkenal banar dah warung sidin tu. Ayo Ka cubai warung nang lain. Mudahan sasuai jua lawan selera pian XD

      Hapus
  2. Belum semua an di cubai pang nah, kena handak merasai nang di pahlawan tu nah pina nyaman

    BalasHapus
    Balasan
    1. Inggih Ka, insyaAllah nyaman jua, mudahan sasuai jua di lidah ^^

      Hapus
  3. Dari semua daftar di atas, yang pernah aku mampiri hanya Soto Banjar Bang Amat. Rasannya memang benar enak. Nggak nyesel deh makan soto banjar di sana.

    BalasHapus
    Balasan
    1. Satuju banar Ka. Sotonya dasar nyaman banar di sana. Mudahan pian kawa jua kaena marasai sabarataan warung rekomendasi kami di atas XD.

      Hapus
  4. Ada jua samping kantor dirjen pajak. Kecil aja warungnya. Jam 8 sdh buka, ky hj.irin jua. Namanya lupa aku nah.

    BalasHapus
    Balasan
    1. Nah, makasih banyak infonya Ka. Mudahan kami kaena kawa marasai jua di sana. Kita tambahi kaena rekomendasinya XD

      Hapus
  5. paling ketuju soto abang amat nyaman banar rasanya betambah sate jua. tapi pernah jua pang makan di soto pahlawan bahari tu

    BalasHapus
    Balasan
    1. Inggih Ka, soto lawan satenya dasar nyaman wadah sidin t ^_^

      Hapus

Posting Komentar

Postingan populer dari blog ini

Tidak Kalah dengan Ibukota Provinsi, Ini 4 Kafe di Barabai yang Wajib Dikunjungi

Halo Kaka-Kaka bungas yang lagi membaca tulisan ini, mudahan sehat sabarataan lah. Kenalkan dulu nah, ulun Eca anggota FBB jua dan tulisan ini nih tulisan perdana ulun di Banjar Corner. Selamat membaca 🤗 Tau lah bubuhan pian di wadah ulun Barabai bisi 4 kafe nang kada kalah lawan di Banjarmasin? Han kada tau kalo, makanya bacai sampai tuntung lah. Barabai Hulu Sungai Tengah sabujurnya lain kota kelahiran ulun. Tapi, kayapa pun jua, ulun sudah lawas bagana di sana dan sudah tarasa jadi tanah kelahiran ulun saurang. Ulun mulai bagana di Barabai semenjak kelas 1 SMP. Waktu ulun masih sakulah itu, dasar balum ada nang ngarannya kafe nginih. Ulun lawan kakawanan dahulu bejalanan ke kedai atau depot haja. Nah, wahini lumayan banyak sudah cafe yang kawa dipakai hagan “feed” Instagram bubuhan pian. Ini nah yang menurut ulun musti pian kunjungi. 1. Hero Cafe Nah, kabalujuran banar ulun lawan anggota FBB nang lain suah bakumpulan di Hero Cafe ini mun pas handak betamuan. Di sini rami

Belajar Istilah Banjar

  Halo! Apa habar buhan pian sabarataan? Mudahan baik ajaa lah sabarataan, sehat selalu dan dijauhkan dari panyakit.   Nah kali ini ulun handak memadahkan beberapa istilah dalam bahasa Banjar yang mungkin banyak dari pian masih balum tahu karena kada tebiasa berbahasa banjar sehari-hari, atau hanyar aja pindah ke banjar. Oiya, ulun ingat banar bahari pas SD balajar bahasa Banjar muatan lokalnya, amun wahini masih jua kah kakanaan tahu di istilah ni?   Berikut beberapa istilah dalam bahasa Banjar:   1. Salesmaan   Salesma sabujurnya adalah ngaran virus yaitu virus salesma, yang begejala behingusan atau pilek. Nah rancak urang tetap menyambat salesmaan jua amun ada nang kena flu karena gejala si salesma lawan flu nih mirip yang nyata bahingusan lawan batukan.   2. Hawai   Hawai nang ini lain ngaran wilayah lah, hawai nang dimaksud di sini tu artinya semacam sunyi tu nah, misalnya urang tebiasa di kota lalu bejalanan ke desa pasti lain suasananya, tebiasa pina rami

Kisah Intingan wan Dayuhan

Halo sabarataan, batamuan pulang lawan ulun, Nisa. Kali ini, ulun handak mangisahakan kisah Intingan wan Dayuhan nang rajin tu selalu dikisahakan bila ulun handak guring waktu lagi halus dulu. Kisahnya ni turun temurun dari zaman datu, nini, mama, anak sidin, dan cucu sidin, bisa jua kaina sampai ka buyut sidin. Kisahnya nih rami, sampai taguring guring mandangari kisah ini ja, lucu pulang han. Bila pian suah mandangar kisah Intingan wan Dayuhan, bararti kita sama. Zaman bahari kadada pang yutube wan intirnit. Nang ada kisah dari muntung ka muntung ja. Nang kaya apa kisahnya, ni ulun kisahakan nah ka bagian pian sakira kada panasaran. Kisah Intingan wan Dayuhan  Zaman bahari ada dua ikung badua ba-ading nang bangaran Intingan wan Dayuhan. Kisahnya Intingan nang jadi kaka, Dayuhan ading nya. Ibarat kata, si Dayuhan nih inya orangnya kada tapi paham apa yang di padah-akan tu, atau bahasa kitanya, ada nang kurang kaitu nah. Ujar kisah si ading nih kada hakun sakulah, mac