Makanan Khas Banjar Gasan Bulan Puasa

Apa habar buhannya sabarataan.... Acil, Paman, Sabarataan ulun umpat lalu handak bejualan makanan, kalo ai buhan pian ada nang handak manukar yakalooo.... Kada, buhannya ay ulun begayaan haja tadih. Sudah kada bulan puasa lagi pang tapi banyak haja urang bejual makanan. Ulun handak bakisah pas bulan puasa tadi, banyak peacilan bejualan wadai, lawan masakan nang dikatujui lawan anum tuha sabarataan.

Ulun handak mengenalakan beberapa buting jenis masakan lawan makanan khas Banjar nang pasti ada dijual urang, rahat bulan puasa. Maraha Corona kah.... Coroni kah, tatap ay urang banyak bejualan, zaman canggih kawa aja nukar dihp... eh lain online shop maksudnya buhannya ay, mun kada tau buka ha instagram banyak tu urang yang asalnya bejulanan minyak urut gin taka jadi bingka berandam. Wkwkwkwk.

Gasan bubuhan pian sabarataan bila ke Banjarmasin jangan kada ingat am marasai masakan ngini, wajib banar tuh pang lawan terasai banyu di Sungai Martapura umpat becabur setumat kalo pina pas tuntung mandi bebungas kalo kawa jadi kaya oppa oppa korea hahahaha

1.Soto Banjar

Makanan khas nang paling dikenal dari Kalimantan Selatan apalagi bila ke Banjarmasin, harus tuh pang merasai mehirup kuah panasnya diatas jukung nang biasanya ada di pasar terapung. Nang meulah lain lawan soto ampun urang sebelah kuahnya tebening kawa bekaca sedikit ah, tapi ada jua nang karuh kuahnya. Uniknya, soto banjar ngini kada pakai nasi tapi beketupat, nang bantat dalam bungkusan daun pisang

2.Katupat Kandangan

Katupat kandangan ngini sudah terkenal dimana aja, apalagi bubuhan mamarina nang lakian ketuju banar tuh pang memakan, rasanya lain banar inya kebiasaan urang kandangan makan makai tangan diharu lawan kuah santan karuh. Tekstur ketupat kandangan tekeras dari ketupat nang lain. Tapi am, bila buhan kam sudah merasai ketupat ini kesarungan tuh pang saking nyamannya pakai hintalu jaruk gin nyaman banar dah heh... beliuran acil nang tukang tulis wkwkwk...

3.Manday lain Monday Bahasa Inggrisnya Senin pang luh ay...

Nang sebuting ini makanan khas Banjarmasin kenapa tadih jadi khas? Inya te urang banjar haja nag telalu kreatif meulah kulit tiwadak jadi makanan, tapi rasanya nyaman kam... Kada tahu jua dari mana kah resep ini nih didapat. Untung ja lain kulit durian sakit gigi nini kena rupuy meigut atau taguk bulat hahaha

Bila handak meulahnya nyaman haja, asal ada kulit tiwadak lawan uyah becurai lawan toples banyak-banyak. Ditutupi lah luh jangan dibuka kena bekulat, makin lawas makin nyaman rasanya bisa ngini di fermentasi jar bahasa gaul urang gen Z. Paling nyaman disanga wara ada bekuah santan campuri iwak halus ma ih... liwar nikmat makan bila bukaan tambahi cacahan pulang ...

4. Wadai Bingka

Bingka ni macam2 ada nang dirandam kuah ada nang dibanam ada nang disumpa, tesarah nang tukang ulah haja lagi. Amun ulun ketuju berataan pang lah nyaman pang rasanya, Rasanya tapai, gula habang, kentang lawan apalah lagi kada ingat jua ulun luh ay sepalih asal sambat haja... Camilan gasan memasini liur jar urang berhari khas suku banjar , rasanya manis lamak pacah liur tuh pang bila merasai. Bahannya gin murah haja, tapung , hintalu, gula lawan uyah lawan nang lain serah kam ja handak apa asal bahagia ja lawan bisa meulahnya.

Sudah dulu lah acil mahalabiu bekisah kemana mana kah timbul layau..kaina batamuan lagi kita lah, insyaAllah sehat barataan.

***

Nang manulis: Eny Kadinda (www.enychan.com)

Nang ma-edit: Enny Ratnawati (www.ennyratnawati.com)