Langsung ke konten utama

Buku-Buku Karya Anak Banua #3

Bismillahirrahmanirrahim

Assalamu'alaikum kakawanan ulun barataan? Kayak apa habar pian? Mudah-mudahan kita semua selalu dalam lindungan Tuhan Yang Maha Esa.

Hari ini, ulun handak bakisah tentang 3 buku nang ditulis oleh urang banua kita saurang.  Mudah-mudahan imbah mambaca kisah ni, kita sabarataan semakin mengenal dan menghargai buku-buku karya anak banua.

1. Syekh Abdul Hamid Abulung - Korban Politik Penguasa oleh Fahrurraji Asmuni


(sumber gambar: www.irabooklover.com)

Dilihat dari judulnya, buku ni kayaknya isinya berat pang lah. Tapi manurut ulun kada, buku ini ditulis dengan ringan, kayak mambaca kisah fiksi.

Buku ini mangisahakan kisah hidup Datu Abulung nang dahulu ada basilisih paham lawan salah satu Sultan Banjar. Selain itu, buku ini ada jua mangisahakan hubungan sidin lawan Datu Kalampayan. Ujar habar, Datu Kalampayan ni mandukung Sultan Banjar dalam perselisihan tersebut, tapi buku ini menyebutkan bukti bahwa habar itu kada bujur .

Buku ini maulah ulun merasa bangga bahwa di Kalimantan Selatan, pernah ada ulama sehebat Datu Abulung. Nangapa haja karamat nang dimiliki oleh sidin? Silakan dibaca sorang bukunya lah, hihihi.

Bukunya mungkin sudah ngalih dicari wayahini. Tapi insyaAllah masih ada di Dinas Perpustakaan dan Kearsipan Kabupaten Hulu Sungai Utara.

2. Misteri Pohon Kasturi oleh M. Hasbi Salim



(sumber gambar: www.goodreads.com)

Buah kasturi adalah flora khas Kalimantan Selatan. Mun pian handak malihat kayak apa wujudnya buah Kasturi ni, pian bisa malihat di postingan Banjar Corner kami nang judulnya Buah Musiman Nang Ada di Kalimantan Selatan.

Buku ini adalah kumpulan cerpen. Kisahnya familiar banar lawan kahidupan sahari-hari kakanakan-kakanakan di Amuntai pada khususnya. Maulah kaganangan pas bamainan waktu lagi halus bahari, hihihi.

Terutama kisah tentang Misteri Pohon Kasturi ni. Pohon Kasturi ni tinggi wan rimbun-rimbunnya. Angker banar tu pang bila dilihat. Tapi tatap ai rajin barabut manjatui bila buahnya guguran. Apalagi bila pas ada angin kancang, umaaa rasa sanang banar hati malihat buahnya ni guguran.

Buku ini masih bisa jua dipinjam di Dinas Perpustakaan dan Kearsipan Kabupaten Hulu Sungai Utara.

3. Merajut Impian Putri Sasirangan oleh M. Hasbi Salim



(sumber gambar: www.goodreads.com)

Dilihat dari judulnya ja jalas banar sudah lah kalau kisahnya ni pasti ada mamuat kisah tentang kain sasirangan, hihihi. Kain khas Kalimantan Selatan ni dasar tarkanal banar pang sudah. Sebelumnya, Banjar Corner gin ada jua manulis tentang sasirangan ni. Pian bisa mancek di postingan kami nang judulnya Motif-Motif Sasirangan atawa Cara Ma-ulah Sasirangan Khas Banjar.

Di buku Merajut Impian Puteri Sasirangan ni, dikisahakan ada seorang gadis multi talenta nang berhasil tapilih sebagai Putri Sasirangan. Tapi gemerlapnya dunia Putri-Putrian ni ternyata kurang cocok lawan si gadis. Akhirnya si gadis ni manamuakan potensi dirinya nang lain. Nangapa potensinya? Silakan baca sorang bukunya lah, haha. InsyaAllah bukunya masih bisa jua dipinjam di Dinas Perpustakaan dan Kearsipan di Kabupaten Hulu Sungai Utara.

***

Nah, itu pang 3 buku pilihan ulun gasan Banjar Corner hari ini. Mun pian batanya-tanya mana buku nang pian tulis padahal pian urang banua? Cuba pian cek di postingan Buku-Buku Karya Anak Banua #1 dulu lah, adalah tabuat? Bila kadada, cuba cek lagi di postingan Buku-Buku Karya Anak Banua #2. Bila masih kada tabuat pian bisa hubungi public relationship (PR) kami untuk kerja sama review buku, hihihi, *promosi*. 

Nah, sakian dulu tulisan ulun gasan Banjar Corner hari ini. Mudah-mudahan bamanfaat wan mudah-mudahan jua kita kawa batamu-an lagi di post Banjar Corner nang barikutnya lah. Aamiin.

Wasalamu'alaikum warahmatullahi wabarakatuh.

Alhamdulillah.

***
Nang manulis: Ira (www.irabooklover.com)

Komentar

  1. Dasar keren-keren buku-buku karya anak banua kita ne. Jadi teumpat bangga ulun nah, *nangisterharu*

    BalasHapus
    Balasan
    1. Inggih Ka, dasar keren-keren buku-buku karya anak banua kita ni *julungitisu*.

      Hapus
  2. Penasaran ulun handak membaca kisah datu ambulung nang selengkapnya... Mudahan kaina mun bulik ka amuntai sawat singgah ke perpusnya handak membaca buku tentang datu ambulung.

    BalasHapus
  3. Baru tahu ulun buah kasturi buah khas Kalsel. Menariknya semua bukunya orang Banua ini

    BalasHapus
  4. umaaa hanyar aja nah ulun tau lawan buku-buku karya anak banua
    rasa hendak beisi yang misteri buah kasturi

    BalasHapus
    Balasan
    1. Inggih Ka, mudahan pian "bajodoh" lawan jw bukunya ^^

      Hapus
  5. wah keren banar nih asli karya anak banua nih di acungi jempol hihi

    BalasHapus
  6. Keren keren sekali bukunya.
    Dan aku bau tau buah kasturi khas Kalsel

    BalasHapus

Posting Komentar

Postingan populer dari blog ini

Tidak Kalah dengan Ibukota Provinsi, Ini 4 Kafe di Barabai yang Wajib Dikunjungi

Halo Kaka-Kaka bungas yang lagi membaca tulisan ini, mudahan sehat sabarataan lah. Kenalkan dulu nah, ulun Eca anggota FBB jua dan tulisan ini nih tulisan perdana ulun di Banjar Corner. Selamat membaca 🤗 Tau lah bubuhan pian di wadah ulun Barabai bisi 4 kafe nang kada kalah lawan di Banjarmasin? Han kada tau kalo, makanya bacai sampai tuntung lah. Barabai Hulu Sungai Tengah sabujurnya lain kota kelahiran ulun. Tapi, kayapa pun jua, ulun sudah lawas bagana di sana dan sudah tarasa jadi tanah kelahiran ulun saurang. Ulun mulai bagana di Barabai semenjak kelas 1 SMP. Waktu ulun masih sakulah itu, dasar balum ada nang ngarannya kafe nginih. Ulun lawan kakawanan dahulu bejalanan ke kedai atau depot haja. Nah, wahini lumayan banyak sudah cafe yang kawa dipakai hagan “feed” Instagram bubuhan pian. Ini nah yang menurut ulun musti pian kunjungi. 1. Hero Cafe Nah, kabalujuran banar ulun lawan anggota FBB nang lain suah bakumpulan di Hero Cafe ini mun pas handak betamuan. Di sini rami

Bajukung di Atas Rawa

jejakrekam.com Di Kalimantan Selatan daerah pahuluan selain gunung dan sungai jua ada daerah rawa. Terutama di 3 kabupaten hulu sungai selatan, tengah, dan utara tergabung 3 daerah rawa.Nah di rawa ngini kadakawa pakai alat angkutan nang ganal jadi harus pakai jukung nang ramping supaya muat lawan kada santuk lawan di bagian bawah bila kamarau pas banyu surut. Jadi di awal bulan Juni samalam ulun sawat mancobai bejukung di rawa ngini. Tepatnya di daerah perbatasan antara hulu sungai tengah dan hulu sungai utara. Di permukaan rawanya hibak lawan tumbuhan banyu. Jadi jukung tu harus mambuka jalan dahulu. Bila takana rumputnya nang jadi sarang nyamuk benyamuk tunpang disangati nang di atas jukung. Makanya paman-paman nang mambawa jukung besangu obat nyamuk. Kada tahan jua obat nyamuk saking banyaknya nyamuknya. Oya, jukung ni dipakai gasan alat pengawasan kelompok pencari iwak. Rata-rata di sini mata pencaharian orang mencari iwak tarus pang. Tapi takana ada nang menyalahi aturan yaitu ma

8 Macam Wadai Banjar

Assalamualaikum, Dangsanak berataan. Kayapa habarnya nih? Mudah-mudahan sihat berataanlah. Aamiin.  Hari ini ulun handak menyambatakan ngaran-ngaran wadai khas urang Banjar. Banyak banar macamnya, tapi nang ulun kisahakan hari ini 8 buting haja. Amun handak sebarataan, dua hari dua malam kada tuntung kita bekisahan. 1. Wadai Lapis sumber : http://dapurummumusasyi.blogspot.com/2013/10/kue-lapis-kakao.html Wadai nang pemulaan ngarannya wadai lapis. Kamiran atawa adonannya biasanya diulah dua warna, imbah itu disumap salapis-salapis beliung-liung warnanya. Bila sudah pina karas salapis, hanyar dindaki lapisan di atasnya pulang. Harus sabar pang tu pang meulah wadai lapis ngini. Warna nang paling rancak diulah tu hijau putih atau cuklat putih. Meulah wadai lapis ngini biasanya di dalam cipir ganal nang dimasukakan ka dalam panci badandangan. Bila sudah masak kaina hanyar dihiris halus-halus sasuai salira. 2. Lumba Sumber : http://beritainfo.web.id/ Lumba ni tamasu