Langsung ke konten utama

Cincin Talipuk, Wadai Khas Amuntai nang Nyaman Banar

 

dapurmamahnannda.blogspot.com

Buhan pian berataan tahu kalo nang ngarannya wadai cincin? Wadai nang manis rasanya, nyaman banar mun dimakan pas panas-panas hanyar dibangkit dari rinjing. Kada beingat tu pang mamakan wadainya kada mayu sebuting haja. Ulun nih tamasuk nang katuju banar makan wadai cincin nih panas-panas, kada beampihan muntung menyuap. Inya ulun nih dasar katuju makan nang manis-manis makanya katuju banar wadai nang manis kaya cincin nih. 

 

Jadi lo buhannya ae, biasanya wadai cincin tuh diolah dari gelapung baras, tapi di Amuntai kampung ulun tuh ada cincin nang diolah dari galapung biji kambang tanding atawa biji talipuk atawa mun urang bahasa Indonesia menyambatnya biji Bunga Teratai jar. Hen buhannya, kambang tanding nang biasanya merigati banyu danau tu bijinya kawa diolah jadi wadai nang nyaman rasanya. Suah lah buhan pian merasai makan cincin talipuk nih?


Amun pian urang Amuntai pasti am dah tahu banar lawan wadai nginih. Tapi mun pian lain urang Amuntai mungkin masih hehanyaran tahu wadai nginih. Wadai cincin talipuk nih diulah dari biji kambang tanding nang di karingakan, imbahitu di giling jadi galapung. 

 

Nah, imbah tu galapung biji kambang tanding nginih dicampur lawan bahan-bahan lain nangkaya gula habang dan lain-lain. Jujur haja ulun kada tahu jua apa bahan-bahan meolah wadai nya nih, tahu mamakan ha pokoknya.


Wadai cincin talipuk nih buhannya ae adanya di Amuntai haja. Biasanya ulun menukar cincin talipuk Ini dipasar Amuntai bebila ulun bulik kampung. Pasar Amuntai nih pasar nang paling ganal di Kabupaten Hulu Sungai Utara, disana nih saraba ada urang bejualan. Mulai dari segala macam kebutuhan sehari-hari, sampai nang paling khas tuh disana macam-macam kerajinan tangan wan makanan khas amuntai.

 

Pasar Amuntai nih  yang rami bila hari kamis. Dipasar itu pian mun handak merasai cincin talipuk ada yang ngarannya acil Ridha. Sidin bejualan dilantai atas pasar Amuntai, duduk belapak beampar haja disin bejualan. Sidin nih dasar sebaharian sudah mulai ulun masih SD sampai ulun beanakan nih masih aja bejualan cincin talipuk. 

 

Bahari ulun mun umpat mama ka pasar batutukar, ulun minta tukarakan wadai cincin talipuk tarus lawan wadai khas lainnya. Wadai cincin talipuk sidin nih dasar bujuran nyaman dan terkenal, ujar urang jua pang sampai dibawa urang ke Mekkah jar cincin talipuk sidin nih.  Hen dasar nyaman kalo berarti wadai cincin sidin nih.


Mun buhan pian balum suah merasai wadai cincin talipuk asli Amuntai ulahan acil ridha nih buhan pian langsung haja datang ke Amuntai menukar wadai cincin talipuk ini.  Selain kawa menukar langsung wadai cincin nang sudah masak, buhan pian kawa jua menukar adonannya haja gasan pian bawa bulik karumah. Imbah manukar adonan nya tuh pian kawa memasaki sorang di rumah. 

 

 Kaya Ulun dahulu waktu batianan mangidam cincin talipuk  nih. Lalu dibawakan acil ulun adonan cincin talipuk nya nih ka Banjar, lalu di goreng akan dirumah ulun. Nyaman banar panas-panas kada baampihan mamakan sampai habis adonan nya hanyar ampih muntung memakan. 


Ayu datangi ka Amuntai marasai wadai cincin talipuk atawa mu nada bisi kawan urang Amuntai minta tukarkan kawan urang Amuntai cincin talipuk nih. Ayu rasai pian keyapa rasanya biji kambang tanding atawa biji teratai maka jadi wadai. Nyaman banaarr…..

Nang manulis: putrihaneen.com

 

Komentar

  1. Aku katuju wadai cincin nih, cuma jarang tetamu nang nyaman banar tuh, pinanya mun di amuntai banyak yg nyaman lah

    BalasHapus
  2. Ulun urang Barabai, basabalahan lawan Amuntai, tapi kada rancak jua makan cincin talipuk. pdaahal nyaman banar apalagi mun dimakan pas panas-panas.

    BalasHapus
  3. Nah, kalo wadai cincin aku kada tapi ketuju. Dari berbagai wadai khas Kalsel, ada yang kuketujui ada jua nang kada. Bagi nang katuju ayuha, banyaki makan lah jua gasan oleh-oleh bila handak membawa'akan gasan dangsanak wan kakawanan.

    BalasHapus
  4. Wadai cincin katuju banar.nah yang talipuk ni bisa belum sudah merasai ihh..penasaran nah.apa bedanya lawan cincin biasa?bisa beda banar lah karena gelapung ja beda

    BalasHapus
  5. Bakisah cincin talipuk ini, pertama kali melihat di tv. Mama saking penasaran nya minta cari akan wadai ini. Asalnya nukar di Banjar haja. Eh pas ada kwan orang amuntai. Lalu ai betitip yang khas sana. Dasar bujuran nyaman di makan. Kda berasa habis haha

    BalasHapus
  6. wadai talipuk ni yang lubangnya seuting haja tu kah, yo? amun wadai cincin biasaya 4 lo lubangnya

    BalasHapus
  7. Wadai cincin nih lancak mamakan. Tapi kada suah terasai nang hanyar dibangkit pas panas2. Bisa nyaman banar tu nang asli amuntai leh

    BalasHapus

Posting Komentar

Postingan populer dari blog ini

Tidak Kalah dengan Ibukota Provinsi, Ini 4 Kafe di Barabai yang Wajib Dikunjungi

Halo Kaka-Kaka bungas yang lagi membaca tulisan ini, mudahan sehat sabarataan lah. Kenalkan dulu nah, ulun Eca anggota FBB jua dan tulisan ini nih tulisan perdana ulun di Banjar Corner. Selamat membaca 🤗 Tau lah bubuhan pian di wadah ulun Barabai bisi 4 kafe nang kada kalah lawan di Banjarmasin? Han kada tau kalo, makanya bacai sampai tuntung lah. Barabai Hulu Sungai Tengah sabujurnya lain kota kelahiran ulun. Tapi, kayapa pun jua, ulun sudah lawas bagana di sana dan sudah tarasa jadi tanah kelahiran ulun saurang. Ulun mulai bagana di Barabai semenjak kelas 1 SMP. Waktu ulun masih sakulah itu, dasar balum ada nang ngarannya kafe nginih. Ulun lawan kakawanan dahulu bejalanan ke kedai atau depot haja. Nah, wahini lumayan banyak sudah cafe yang kawa dipakai hagan “feed” Instagram bubuhan pian. Ini nah yang menurut ulun musti pian kunjungi. 1. Hero Cafe Nah, kabalujuran banar ulun lawan anggota FBB nang lain suah bakumpulan di Hero Cafe ini mun pas handak betamuan. Di sini rami

Pantun Basa Banjar Gasan Manjaga Warisan Budaya

Assalamualaikum sabarataan. Alhamdulillah ulun akhirnya berkesempatan manulis lagi disini. Buhan pian penasaran apa yang handak ulun kisahakan kah? Lakasi baca lah. Di tulisan ini ulun handak bakisah soal pantun basa Banjar. Buhan pian mungkin sudah tahu, urang Melayu tu kada talapas lawan kabiasaan bapantun. Urang Banjar nang sarumpun lawan Melayu damintu jua, harat-harat baulah pantun. Pantun basa Banjar kada balain pang lawan pantun basa lain. Ada katantuannya jua nang musti diumpati. Mun kada diumpati pantun nang diulah kada baik atawa bisa jua kada kawa disambat pantun. Mun kita maulah wadai tu ada tuangannya. Mun maulah baju, ada polanya. Sama haja lawan pantun. Pantun nang baik ada katantuannya, ada tuangan, ada polanya jua, ngini nah: 1. Pantun nang bagus tu baisian ampat buting baris. Dua baris nang panambaian ngarannya sampiran. Dua baris nang pauncitan ngarannya isi. 2. Pantun nang bagus tu ada pola bunyinya, atawa pola parsajakannya. Polanya tu: ab-ab. 3. Pantu

8 Macam Wadai Banjar

Assalamualaikum, Dangsanak berataan. Kayapa habarnya nih? Mudah-mudahan sihat berataanlah. Aamiin.  Hari ini ulun handak menyambatakan ngaran-ngaran wadai khas urang Banjar. Banyak banar macamnya, tapi nang ulun kisahakan hari ini 8 buting haja. Amun handak sebarataan, dua hari dua malam kada tuntung kita bekisahan. 1. Wadai Lapis sumber : http://dapurummumusasyi.blogspot.com/2013/10/kue-lapis-kakao.html Wadai nang pemulaan ngarannya wadai lapis. Kamiran atawa adonannya biasanya diulah dua warna, imbah itu disumap salapis-salapis beliung-liung warnanya. Bila sudah pina karas salapis, hanyar dindaki lapisan di atasnya pulang. Harus sabar pang tu pang meulah wadai lapis ngini. Warna nang paling rancak diulah tu hijau putih atau cuklat putih. Meulah wadai lapis ngini biasanya di dalam cipir ganal nang dimasukakan ka dalam panci badandangan. Bila sudah masak kaina hanyar dihiris halus-halus sasuai salira. 2. Lumba Sumber : http://beritainfo.web.id/ Lumba ni tamasu