Langsung ke konten utama

Bajukung Tambangan Kuliling Banjarmasin


jukung tambangan

Minggu semalam ulun kadatangan tamu dari Makassar. Kawanan buhan kopi. Biasanya mun datang ke Makassar pasti diajak buhannya bekuliling Makassar.

Nah pas pas minggu semalam, kada tau ada angin apa, buhannya membari habar hendak ke Banjarmasin. Sudah sampai Batulicin. Langsung ae ulun besimpun rumah lawan menyiapkan kamar hagan buhannya.

Pas rumah sudah simpun, lalu ae bingung : kena diajak kemanalah?

Maklum ulun gin pandatang jua di Banjarmasin nih. Hehehe. Nah singkat cerita buhannya sudah sampai di Banjarmasin. Sudah bejalanan ka Pasar Terapung Lok Baintan jua. Sudah ke Jembatan Barito lawan sudah jua terasai makanan Banjar nang kaya putu mayang, laksa, kokoleh, mie habang lawan mie bancir jua. Han lengkap kalo. Sudah jua merasai 7 kedai kopi nang ada di Banjarmasin. Soto Bang Amat gin sudah dirasai lawan buhannya.

Bacari Oleh-oleh Khas Banjarmasin

Pas hari terakhir kehendak nih mencari oleh-oleh di Andalas. Eh kenapakah hati hendak ke Rumah Anno lawan Manara Pandang.

Pas buhannya befotoan, ulun menjinguk di sungai Martapura ada jukung nang atapnya pakai sirap. Manis banar.

“Paman, kawalah bekuliling?”

Iih ada paman kelotoknya pas itu lagi guring. Lalu sidin naik ke siring. Di jelasakan lawan sidin : mun pian hendak naik kawa aja pang. Tapi pian ke perpustakaan, disana kantor Dinas Pariwisata Banjarmasin. Soalnya ini jukung ampun Pemerintah Kota.

Hancap ae ulun kesana. Pas banar! Masih ada urang Dinas Pariwisata nang bejaga.

Pas itu ada Kak Monika dari Patriot Pariwisata nang bejaga. Sidin menjelaskan ke kami apa itu Jukung Tambangan.

Sekalinya Jukung Tambangan ini jukung nang sudah punah. Bahari jukung tambangan ini dipakai buhan saudagar lawan bangsawan.

Rute Jukung Tambangan ini macam-macam paketnya. Ada yang Kampung Biru lawan Kampung Hijau, Pulang Kembang, Pasar Terapung Lok Baintan lawan Pulau Bromo. Nang ulun ambil pas itu Kampung Biru lawan Kampung hijau.

Berapa harga paket susur sungai Jukung Tambangan? Tergantung pian hendak paket apa. Mun ulun semalam ke Kampung Biru lawan Kampung Hijau kena 120.000. Itu sudah sepaket lawan outer sasirangan lawan topi caping.

Umaaa rami kalo bejalanan pakai jukung tambangan ini. Berasa banar jadi urang Banjar.

Jadi lakasi bawisata di Banjarmasin pakai Jukung Tambangan

Nang Manulis : Putri S.
Nang Mang-edit:  Enny R.

Komentar

  1. Hanyar tahu nah ada program wisata jukung tambangan ngini, wah Banjarmasin jadi keren am lah

    BalasHapus
  2. Hanyar kah nih, hanyar tahu ulun nah. Asa handak jua mencobai, mudahan ai bedapat lawan jukung tambangan ni pas ke Banjarmasin kena..

    BalasHapus
  3. baturukan 120.000 malaran kawa kuliling susur sungai. ayuha sasakali mancubai kaina nah. mudahan kondisinya kada mengkhawatirakan.

    BalasHapus
  4. Ada lah jukung hampun pemerintah kota, hanyar tahu ulun

    BalasHapus
  5. Wah.. Hanyaram ulun tahu pada ada junkung tambangan disiring. Handak jua ulun mancobai kena, refresing imbah kalawasan bekuhup dalam rumah.

    BalasHapus
  6. Ini program wisata hanyar dari Pemko Bjm
    Rami banar. Lakasi ka Siring Menarang Pandang tempulu promo

    BalasHapus
  7. Lawas nya kda bejalanan bejukung nah disiring. Rami banar lawan kekawanan rajin kesana

    BalasHapus
  8. Wih baru tau ada jukung tambangan ini, jadi pengen juga keliling pakai jukungnya nih, Hahaha

    BalasHapus
  9. Raminya ih, handak tahu paket yg ke pulau kembang ih berapa, penasaran nah ulun hehe

    BalasHapus
  10. Bah ai lawas banar nah sudah kada pernah bajukung. Sebelum pandemi ja pina kdd nah apalagi pas pandemi. Teliat jukung ja kada..

    BalasHapus

Posting Komentar

Postingan populer dari blog ini

Tidak Kalah dengan Ibukota Provinsi, Ini 4 Kafe di Barabai yang Wajib Dikunjungi

Halo Kaka-Kaka bungas yang lagi membaca tulisan ini, mudahan sehat sabarataan lah. Kenalkan dulu nah, ulun Eca anggota FBB jua dan tulisan ini nih tulisan perdana ulun di Banjar Corner. Selamat membaca 🤗 Tau lah bubuhan pian di wadah ulun Barabai bisi 4 kafe nang kada kalah lawan di Banjarmasin? Han kada tau kalo, makanya bacai sampai tuntung lah. Barabai Hulu Sungai Tengah sabujurnya lain kota kelahiran ulun. Tapi, kayapa pun jua, ulun sudah lawas bagana di sana dan sudah tarasa jadi tanah kelahiran ulun saurang. Ulun mulai bagana di Barabai semenjak kelas 1 SMP. Waktu ulun masih sakulah itu, dasar balum ada nang ngarannya kafe nginih. Ulun lawan kakawanan dahulu bejalanan ke kedai atau depot haja. Nah, wahini lumayan banyak sudah cafe yang kawa dipakai hagan “feed” Instagram bubuhan pian. Ini nah yang menurut ulun musti pian kunjungi. 1. Hero Cafe Nah, kabalujuran banar ulun lawan anggota FBB nang lain suah bakumpulan di Hero Cafe ini mun pas handak betamuan. Di sini rami

Belajar Istilah Banjar

  Halo! Apa habar buhan pian sabarataan? Mudahan baik ajaa lah sabarataan, sehat selalu dan dijauhkan dari panyakit.   Nah kali ini ulun handak memadahkan beberapa istilah dalam bahasa Banjar yang mungkin banyak dari pian masih balum tahu karena kada tebiasa berbahasa banjar sehari-hari, atau hanyar aja pindah ke banjar. Oiya, ulun ingat banar bahari pas SD balajar bahasa Banjar muatan lokalnya, amun wahini masih jua kah kakanaan tahu di istilah ni?   Berikut beberapa istilah dalam bahasa Banjar:   1. Salesmaan   Salesma sabujurnya adalah ngaran virus yaitu virus salesma, yang begejala behingusan atau pilek. Nah rancak urang tetap menyambat salesmaan jua amun ada nang kena flu karena gejala si salesma lawan flu nih mirip yang nyata bahingusan lawan batukan.   2. Hawai   Hawai nang ini lain ngaran wilayah lah, hawai nang dimaksud di sini tu artinya semacam sunyi tu nah, misalnya urang tebiasa di kota lalu bejalanan ke desa pasti lain suasananya, tebiasa pina rami

Kisah Intingan wan Dayuhan

Halo sabarataan, batamuan pulang lawan ulun, Nisa. Kali ini, ulun handak mangisahakan kisah Intingan wan Dayuhan nang rajin tu selalu dikisahakan bila ulun handak guring waktu lagi halus dulu. Kisahnya ni turun temurun dari zaman datu, nini, mama, anak sidin, dan cucu sidin, bisa jua kaina sampai ka buyut sidin. Kisahnya nih rami, sampai taguring guring mandangari kisah ini ja, lucu pulang han. Bila pian suah mandangar kisah Intingan wan Dayuhan, bararti kita sama. Zaman bahari kadada pang yutube wan intirnit. Nang ada kisah dari muntung ka muntung ja. Nang kaya apa kisahnya, ni ulun kisahakan nah ka bagian pian sakira kada panasaran. Kisah Intingan wan Dayuhan  Zaman bahari ada dua ikung badua ba-ading nang bangaran Intingan wan Dayuhan. Kisahnya Intingan nang jadi kaka, Dayuhan ading nya. Ibarat kata, si Dayuhan nih inya orangnya kada tapi paham apa yang di padah-akan tu, atau bahasa kitanya, ada nang kurang kaitu nah. Ujar kisah si ading nih kada hakun sakulah, mac