Hal yang Tak Terlupakan Selama di Batulicin, Kabupaten Tanah Bumbu



Assalamu'alaikum,

Alhamdulillah mudahan kita sehat barataan. Ni pamulaan sama sekali nah ulun manulis gasan Banjar Corner. Ulun handak bakisah soal pangalaman ulun badiam di Batulicin, Kabupaten Tanah Bumbu, Kalimantan Selatan.

Buhan pian paham ai lo, bapindah rumah tuh, apalagi ka luar pulau, kadada nyanyamannya. Itu pang nang ulun rasaakan pas handak pindah.

Tapi kami harus pindah karena laki ulun bagawi di Batulicin. Waktu itu, kami balum maka sabulan manikah. Rasa barat banar bapisah lawan kaluarga besar di Makasar.

Batulicin ada baisi bandara sorang. Jadi kami kada usah lewat Banjarmasin. Pas masih di pasawat, ulun mangira Batulicin tu kaya Makasar, wadah ulun badiam sebelumnya. Pas sampai, takajut ulun, sakalinya Batulicin tu kada sarami Makasar. Banyak tanah kosongnya masih.

Di Batulicin banyak jua perusahaan sawit, ni pamulaan tu ulun malihat kabun sawit. Buhan pian suah lah malihat?

Imbah  satangah tahun di Batulicin, ada banyak kanangan ulun. Momen awal lawan suami di Batulicin sampai ulun betianan disana.

1. Bahasanya lain


Ni nang pamulaan ulun rasa-akan pas di Batulicin. Bahasanya lain banar. Sabujurnya banyak haja di Batulicin tu suku Bugis jua, cuman sudah babaur lawan penduduk lokal wan bahasanya sudah  bahasa Banjar .

Buhan Bugis di Batulicin digalari urang Bugis Pagatan. Buhan tetangga ulun jua berbahasa Banjar.

Ada nang lucu soal Bahasa Banjar ni. Pas ulun balanja ka warung, ada ibu nang membawai bapandiran dan manyambat ulun “pian”. “ pian handak nukar apa?” jar sidin. Ulun bingung karena nama ulun lain "pian" tapi pas ibu itu batakun  “ulun batakun, pian handak nukar apa?” Astaga! Makin bingung, Ulun apa lagi artinya?

Suami ulun tatawa pas dikisahakan soal ini. Hanyar dua hari ulun sudah bingung. Suami ulun menjelaskan soal ulun dan pian ini sebagai bahasa Banjar halus gasan menyebut “aku “ wan “kamu”.

Wahini pun ulun balum talalu bisa Bahasa Banjar.
 

 2. Taman Education Park gasan bajalanan


Sebujurnya di Batulicin, Kabupaten Tanah Bumbu  ada beberapa wadah wisata nang bagus seperti pantai Rindu Alam, pantai Angsana, Goa Liang Bangkai, pulau Sengawi wan lain-lainnya. Namun ulun sudah batianan lawan mangidam, kada kawa bajalanan jauh. Jadinya ulun ka Taman Education Park haja , nang parak lawan kantor laki ulun begawi.

Parasa ulun wadahnya ni mirip pantai Losari, Makasar walau kadada pantainya. Di Taman Education Park ada jua parpustakaan umum. Buku-bukunya banyak wan kita kawa mambaca bebas di sana.

Disini banyak jua urang bajual makanan, rancak ada konser atau event jua satiap malam minggunya.

Ada jua wadah main gasan kanakan. Pas disana ulun rancak mamandang-mandang kanakan nang lagi bamainan. Baharap jua sorang dapat anak sholeh/sholehah.
 

 3. Kana Tilang Pas Maulah Konten Youtube


Ada momen nang kada kawa ulun lupakan di Batulicin. Pas maulah konten di Youtube nang handak ulun umpatakan lomba, ulun mamilih spot Taman Education Park sebagai materi konten di Youtube.

Pas di atas sapida mutur, ulun fokus ma ambil gambar di sapanjang jalan sambil bakisahan lawan laki ulun. Mungkin karena ka-asyikan, kami kada melihat ada sweeping pas di muka Taman. Pas banar jua ulun waktu itu kada mamakai helm. Maka sapida mutur nang kami bawa tu ampun kawan. Niatnya pamulaan handak baulah konten youtube, pas sakalinya berakhir di pos polisi.

Masih banyak kenangan ulun di Batulicin. Lain waktu ulun kisahkan lagi. Ulun katuju banar di Batulicin karena masih hijau dan ramah lingkungan. Penduduknya jua ramah.

Kaina ulun handak ke Banjarmasin jua, mancobai masakannya.

Sampai disini dulu kisah ulun. Mudah-mudahan kita bisa batamuan lagi dalam keadaan sehat berataan. Aamiin.

***
Nang manulis: Ainhy (ainhyedelweiss.com)
Nang ma-edit: Enny (www.ennyratnawati.com) & Ira (www.irabooklover.com)

14 komentar:

  1. merasa banaaar kaya pian tuh pas bepindah dari jawa ke banjar... tabrakan budaya tuh nah yang meolah bingung.
    ulun hendak banar ke batulicin nih...
    rasanya semalam suah kesini... tp transit aja... eh batu licih kah kota baru yo.. kd ingat
    jar pantai-pantai disini bagus lah

    BalasHapus
    Balasan
    1. Bingung Ka lah, shock culture kah jer urang tu ngarannya ^^

      Hapus
  2. Lawas banar kd ke batulicin ni, kayapa wahini lah.
    Bujur banar, pindah butuh adaptasi luar biasa.Lun dl dari Banjar ke Jawa hehe

    BalasHapus
    Balasan
    1. Luar biasa Ka lah, urang parantauan ni dasar tangguh ^^

      Hapus
  3. Whahaha, lucunya kana tilang pas meulah konten. Ulun suah ai jua ke Batulicin, ke Pantai Rindu Alamnya tuh.

    BalasHapus
  4. Uma raminya leh, ulun dulu di pagatan jua setahun bediam, dasar bujur banyak banar bugisnya.

    BalasHapus
  5. Hihi lucunya kesah kena tilangnya. Aku sudah jua ke batulicin tapi sekali aja. Handak ae lagi bejalanan ke sana melihati pantainya

    BalasHapus
  6. Aku ngerasain banget apalagi sama sama perantau ehehe

    BalasHapus
  7. Itu yg kena tiang kok termantul banget keknya ya hahaha mohon maaf nih jadi ngakak aku bacanya. Wkwkwk

    BalasHapus