Langsung ke konten utama

Buah Musiman Nang Ada Di Kalimantan Selatan

Assalamualaikum kakawanan barataan.

Tahun ini alhamdulillah ada musim buah lagi. Banyak buah nang setiap tahunnya kada pernah absen  lawan ada jua buah tahunan---nang kayak ngarannya---hanya kawa dirasai satahun sekali.

Penasaran lah buhan pian apa ja buah tahunan yang ada di Kalimantan Selatan. Ayuuu lakasi kita lihati di bawah ni.

1. Buah Ramania




Ramania hijau bisa dimakan, diolah wan cacapan, atau di campur wan masakan nang di sanga. Bisa jua diolah jadi pancukan, ada sensasi masam dari buah ni. Nukar seribu dapat banyak bila musimnya. Amun kada musimnya, seribu tu bisa dapat dua biji ja.



Ada jua ramania masak, ini nyaman makan lawan kecap atau dimakan langsung. Makan buah ini ada dua versi, bisa makan lawan kulitnya atau dikuyak dulu. Sensasi rasanya manis bila bisa memilih, atau bisa jua masam masam sigar.

2. Buah Kasturi



Pohon kasturi ini tinggi banar, jadi bila musim hujan rami guguran buahnya karena angin. Makan kasturi ini bisa dikuyak pakai lading atau begugut langsung.

Harga kasturi 250 rupiah/biji. Bila haratan rami orang bajual ada nang dapat 100 rupiah/biji. Kayapa? Murah lo? Makan kasturi nih nyaman pas lagi bakumpulan, bisa dapat nang manis atau dapat nang masam. Kasturi ni buah khas dari Kalimantan Selatan loh guys.

3. Buah Pampakin



Buah pampakin sejenis durian, tapi warna kulitnya kuning, dalamnya kuning ke oren-oren-an. Rasanya kada telalu manis wan kada harum kaya durian. Bila duri dari durian mancucuk. Duri pampakin nih kada tapi. Harga pampakin bisa 20 ribu dapat 3 biji.

4. Buah Durian



Siapa disini nang katuju durian angkat tangan! Nang kada katuju pasti pusing mencium bau harum nyaman dari buah ini. Buah ini ujar nang paling nyaman, paling enak, paling berasa harumnya. Durian bisa diolah bersama kolak, jadi ice cream atau bisa di makan langsung.

Tahun ini Kalimantan Selatan kembali pesta durian, harga durian murah banar 5000/ biji. Kayapa perasaan bagian pian , sudah kah terasani makan durian tahun ni 😬

6. Buah Tiwadak


Buah tiwadak atau Bahasa Indonesianya cempedak ngini sejenis nangka nang kulit luarnya beduri sedikit, bila nangka tajam tiwadak bebaya ja. Makan tiwadak bisa dimakan langsung, diulah gaguduh atau di campur dengan aneka makanan nang berkuah.

Tiwadak dari kulit sampai biji kawa diulah dan dimakan. Dari kulit bisa di-ulah hiasan atau cendramata. Ada jua nang rajin diulah karupuk. Kulit tiwadak diulah mandai bisa masak bekuah atau disanga sampai padas.

Mandai ini ada dua versi, ada nang langsung dimasak, ada jua nang bapaja. Nang bapaja nih dibuat dalam toples kulitnya, dibuati uyah ganal, tutup toples rapat-rapat, rasanya lebih kenyal dan tahan lawas.

Bijinya dijarang rajin, buati uyah sampai menggurak, dimakan pas takumpulan. Buah tiwadak ini antara 7000 - 8000/ kilo. Ada saat nya 5000/ kilo

7. Buah Kalangkala



Buah kalangkala ini nyaman dimakan, dimasak lawan hintalu bajarang, ditaburi bawang habang, plus ditambah lombok di dalamnya, dijamin betambah buhan pian makan baraataan.

Jadi bila buhan pian masih kada paham kayapa memasaki kalangkala ini, pertama lepas kalangkala dengan tutul atas nya, bila sudah basuh dengan air bersih, randam wan banyu biasa, jangan banyu panas lah. Randam buat dalam toples diamkan 4 jam atau 5 jam bila kalangkala sudah masak inya lamah jadinya. Nah habis tu buati hintalo itik racik halus halus, tambahi lombok. Tambahi uyah rasanya enak banar bujuran tu.

Buah ini buah musiman jua, tapi banyak orang nang kada bisa mamakan, hihihi. Biji dari buah ini kawa jua jadi kakasaian urang kababagusan (sakit bangkak dibagian gulu sehingga bagian gulu jadi baganal ). Nah dikasai di bagian nang bangkaknya tu


Sekian kisah ulun tentang buah musiman dari Kalimantan Selatan. Bila buhan pian ada tambahan bisa komen-komen di bawah ini, okeee!

Salam sugar.

***

Nang manulis: Nisa (https://www.nisazet.com)
Nang ma-edit: Ira (https://www.irabooklover.com)

Komentar

  1. Sebarataan buah di atas ulun ketuju, kecuali kalangkala. Kalangkala tu wadah kami jadi sayur lalapan pas makan. Hehe

    BalasHapus
    Balasan
    1. Inggih Ka, jer urang nyaman jer kalangkala tuh dijadikan sayur lalapan ^_^

      Hapus
  2. Buah kalangkala belum pernah makan ulun nah. Kalau ramania pernah rasanya makan di Ambon, tapi kada pernah di Banjar ini

    BalasHapus
    Balasan
    1. Inggih Ka, kaena cobai jua buah ramania banjar Ka lah, hihihi.

      Hapus
  3. aku cuma suka ramania sama kasturi. hehehehe
    rasa asemnya ituuu loh segeeeer

    BalasHapus
    Balasan
    1. Akur Ka, dasar bujur asem asem segar rasanya buah nang dua nintu ^_^

      Hapus
  4. Ramania nyaman gasan mencok & nyambal. Tiwadak nyaman kulitnya diulah mandai, buahnya diulah gaguduh

    BalasHapus
    Balasan
    1. Akur Ka, rasa handak makan gaguduh tiwadak jadinya ulun nah, hihihi.

      Hapus

Posting Komentar

Postingan populer dari blog ini

Tidak Kalah dengan Ibukota Provinsi, Ini 4 Kafe di Barabai yang Wajib Dikunjungi

Halo Kaka-Kaka bungas yang lagi membaca tulisan ini, mudahan sehat sabarataan lah. Kenalkan dulu nah, ulun Eca anggota FBB jua dan tulisan ini nih tulisan perdana ulun di Banjar Corner. Selamat membaca 🤗 Tau lah bubuhan pian di wadah ulun Barabai bisi 4 kafe nang kada kalah lawan di Banjarmasin? Han kada tau kalo, makanya bacai sampai tuntung lah. Barabai Hulu Sungai Tengah sabujurnya lain kota kelahiran ulun. Tapi, kayapa pun jua, ulun sudah lawas bagana di sana dan sudah tarasa jadi tanah kelahiran ulun saurang. Ulun mulai bagana di Barabai semenjak kelas 1 SMP. Waktu ulun masih sakulah itu, dasar balum ada nang ngarannya kafe nginih. Ulun lawan kakawanan dahulu bejalanan ke kedai atau depot haja. Nah, wahini lumayan banyak sudah cafe yang kawa dipakai hagan “feed” Instagram bubuhan pian. Ini nah yang menurut ulun musti pian kunjungi. 1. Hero Cafe Nah, kabalujuran banar ulun lawan anggota FBB nang lain suah bakumpulan di Hero Cafe ini mun pas handak betamuan. Di sini rami

Belajar Istilah Banjar

  Halo! Apa habar buhan pian sabarataan? Mudahan baik ajaa lah sabarataan, sehat selalu dan dijauhkan dari panyakit.   Nah kali ini ulun handak memadahkan beberapa istilah dalam bahasa Banjar yang mungkin banyak dari pian masih balum tahu karena kada tebiasa berbahasa banjar sehari-hari, atau hanyar aja pindah ke banjar. Oiya, ulun ingat banar bahari pas SD balajar bahasa Banjar muatan lokalnya, amun wahini masih jua kah kakanaan tahu di istilah ni?   Berikut beberapa istilah dalam bahasa Banjar:   1. Salesmaan   Salesma sabujurnya adalah ngaran virus yaitu virus salesma, yang begejala behingusan atau pilek. Nah rancak urang tetap menyambat salesmaan jua amun ada nang kena flu karena gejala si salesma lawan flu nih mirip yang nyata bahingusan lawan batukan.   2. Hawai   Hawai nang ini lain ngaran wilayah lah, hawai nang dimaksud di sini tu artinya semacam sunyi tu nah, misalnya urang tebiasa di kota lalu bejalanan ke desa pasti lain suasananya, tebiasa pina rami

Kisah Intingan wan Dayuhan

Halo sabarataan, batamuan pulang lawan ulun, Nisa. Kali ini, ulun handak mangisahakan kisah Intingan wan Dayuhan nang rajin tu selalu dikisahakan bila ulun handak guring waktu lagi halus dulu. Kisahnya ni turun temurun dari zaman datu, nini, mama, anak sidin, dan cucu sidin, bisa jua kaina sampai ka buyut sidin. Kisahnya nih rami, sampai taguring guring mandangari kisah ini ja, lucu pulang han. Bila pian suah mandangar kisah Intingan wan Dayuhan, bararti kita sama. Zaman bahari kadada pang yutube wan intirnit. Nang ada kisah dari muntung ka muntung ja. Nang kaya apa kisahnya, ni ulun kisahakan nah ka bagian pian sakira kada panasaran. Kisah Intingan wan Dayuhan  Zaman bahari ada dua ikung badua ba-ading nang bangaran Intingan wan Dayuhan. Kisahnya Intingan nang jadi kaka, Dayuhan ading nya. Ibarat kata, si Dayuhan nih inya orangnya kada tapi paham apa yang di padah-akan tu, atau bahasa kitanya, ada nang kurang kaitu nah. Ujar kisah si ading nih kada hakun sakulah, mac