Langsung ke konten utama

Buku-Buku Karya Anak Banua #2

Assalamu'alaikum kakawanan ulun barataan? Kayak apa habar pian? Mudah-mudahan kita semua selalu dalam lindungan Tuhan Yang Maha Esa.

Hari ini, ulun handak bakisah tentang buku. Dahulu, sudah ada pang pernah ulun ada bakisah tentang Buku-Buku Karya Anak Banua #1. Nah, hari ini ada 3 buku lagi nang handak ulun kisahakan. Mudah-mudahan imbah mambaca kisah ni, kita sabarataan semakin mengenal dan menghargai buku-buku karya anak banua.

1. Escape, Please! oleh Rindang Yuliani



(sumber gambar: www.irabooklover.com)

Dilihat dari judulnya, buku ni pakai bahasa Inggris pang lah, tapi jangan tatipu. Biar judulnya bahasa Inggris, tapi isinya ditulis oleh Mbak Rindang Yuliani, nang aslinya adalah urang Barabai. Hen, sebagai sesama urang Banjar, rasa handak tatangis ulun saking bangganya, *lebay*.

Manurut ulun, tema nang dikisahakan di buku ini sangat menarik. Ngalih dicari sasama-annya. Escape, Please! tu, mun dialih bahasa-akan ka bahasa Banjar artinya kikira malariakan diri. Malariakan dirinya dari kasibukan kita sahari-hari.

Ada lo rajin tu kita kadang-kadang manamui situasi dimana beban gawian kita tu manumpuk lawan ma-ulah mauk. Entah gawian sebagai pegawai kantoran kah, sebagai blogger kah atau sebagai ibu rumah tangga kah. Nah, buku ini menyajikan cara-cara kayak apa supaya kita tetap kawa santai dan bahagia bila mahadapi situasi nang kayak itu.

Buku nang sangat bamanfaat pang manurut ulun. Jui bagian pian baca tampulu bukunya masih "hangat".

2. Nyanyian Kerbau Rawa oleh Edwin Yulisar dkk.



(sumber gambar: www.irabooklover.com)

Pernah lah bagian pian malihat kerbau rawa? Kerbaunya ni lucu. Bila bakunyung kapalanya haja lagi nang kalihatan.

Nah, di buku ini ada kisah tentang kerbau rawa. Selain kisah kerbau rawa, ada jua lagi 17 kisah pendek lainnya. Buku ini ditulis oleh penulis-penulis matan Amuntai nang tagabung dalam Grup Persahabatan Menulis Amuntai.

Kisah nang paling ulun katujui di buku ini adalah kisah Aku dan Harapanku nang ditulis oleh Mbak Nailiya Noor Azizah. Kisahnya tu kayak ba-isi nyawa, sampai handak manangis ulun mambacanya.

Nang marasa panasaran kayak apa kisahnya, silakan baca sorangan bukunya lah, hihihi.

3. Sekaca Cempaka oleh Nailiya Nikmah JKF



(sumber gambar: bukuhapudin.blogspot.com)

Sabujurnya, ulun balum suah jua mambaca buku Mbak Nailiya Nikmah nang judulnya Sekaca Cempaka ni, (*kana catuk*). Ulun malah hanyar tahu kalau buku ni ada pas ba-ilang ke salah satu blog blogger buku. Blogger bukunya ni urang Cirebon. 

Hen, bangga ai kita ada buku karya anak banua nang sampai dibaca di banua urang. Tambah lagi jernya bukunya ni rami, lawan penuh dengan kearifan lokal budaya Banjar.

Duh, handaknya ai ulun mambaca buku sidin nang ini. Panasaran ih kayak apa kisahnya. Mudah-mudahan kaena kawa "bajodoh" jua lawan bukunya ni.

***

Nah, sakian dulu tulisan ulun gasan Banjar Corner hari ini. Mudah-mudahan bamanfaat wan mudah-mudahan jua kita kawa batamu-an lagi di post Banjar Corner nang barikutnya. Aamiin.

Wasalamu'alaikum warahmatullahi wabarakatuh.

***
Nang manulis: Ira (www.irabooklover.com)

Komentar

  1. Hen kalinya banyak jua buku matan penulis banua lah. Mudahan literasi di banua kita ni magin tarang. Nyaman nang katuju menulis jua kawa mandapati kesempatan luas kaya di Jawa2 sana.

    BalasHapus
  2. Masya Allah umpat bangga jadi urang Banua nah. Mudahan kaina kawa manambahiakan buku karangan anak Banua.

    BalasHapus
  3. Nah kenapa 3 uting haja? Mana buku fbb nih kada tabuay disini, urang banua jua kalo fbb nih. Wkwkwk

    BalasHapus
    Balasan
    1. Tunggal tiga-an Ka, bila ditulis semuanya kebanyakan, hihihi.

      Buku FBB sudah badahulu Ka, di postingan Buku-Buku Karya Anak Banua #1, ada link-nya di atas, ilangi-akan jua Ka lah, makasih ^_^

      Hapus
  4. Mantap mantap, anggota fbb kita jua baisi buku sorangan sudah. Nang lain pabila nih meulah buku jua hihihi

    BalasHapus
  5. Ih kerennya Kak Rindang sudah ada buku solonya ternyata 😍 moga bisa nyusul

    BalasHapus
  6. ulun sudah membaca nang sekaca cempaka. asik bukunya. amun punya Rindang belum tuntung nah, tebaca. hehe

    BalasHapus
    Balasan
    1. Inggih Ka, mudahan pian segera tuntung mambaca Escape Please-nya ^_^

      Hapus
  7. Waaa mbak Rindang sama mbak Nay keren banget sih ini. Sukses terus buat kalian ya.

    BalasHapus
    Balasan
    1. Inggih Ka, Mbak Rindang lawan Mbak Nay kawan kita anggota FBB Ka, keren banar lo Ka, bangga ulun bisa kenal lawan sidin lewat FBB, *baampikkahimungan*

      Hapus

Posting Komentar

Postingan populer dari blog ini

Tidak Kalah dengan Ibukota Provinsi, Ini 4 Kafe di Barabai yang Wajib Dikunjungi

Halo Kaka-Kaka bungas yang lagi membaca tulisan ini, mudahan sehat sabarataan lah. Kenalkan dulu nah, ulun Eca anggota FBB jua dan tulisan ini nih tulisan perdana ulun di Banjar Corner. Selamat membaca 🤗 Tau lah bubuhan pian di wadah ulun Barabai bisi 4 kafe nang kada kalah lawan di Banjarmasin? Han kada tau kalo, makanya bacai sampai tuntung lah. Barabai Hulu Sungai Tengah sabujurnya lain kota kelahiran ulun. Tapi, kayapa pun jua, ulun sudah lawas bagana di sana dan sudah tarasa jadi tanah kelahiran ulun saurang. Ulun mulai bagana di Barabai semenjak kelas 1 SMP. Waktu ulun masih sakulah itu, dasar balum ada nang ngarannya kafe nginih. Ulun lawan kakawanan dahulu bejalanan ke kedai atau depot haja. Nah, wahini lumayan banyak sudah cafe yang kawa dipakai hagan “feed” Instagram bubuhan pian. Ini nah yang menurut ulun musti pian kunjungi. 1. Hero Cafe Nah, kabalujuran banar ulun lawan anggota FBB nang lain suah bakumpulan di Hero Cafe ini mun pas handak betamuan. Di sini rami

Bajukung di Atas Rawa

jejakrekam.com Di Kalimantan Selatan daerah pahuluan selain gunung dan sungai jua ada daerah rawa. Terutama di 3 kabupaten hulu sungai selatan, tengah, dan utara tergabung 3 daerah rawa.Nah di rawa ngini kadakawa pakai alat angkutan nang ganal jadi harus pakai jukung nang ramping supaya muat lawan kada santuk lawan di bagian bawah bila kamarau pas banyu surut. Jadi di awal bulan Juni samalam ulun sawat mancobai bejukung di rawa ngini. Tepatnya di daerah perbatasan antara hulu sungai tengah dan hulu sungai utara. Di permukaan rawanya hibak lawan tumbuhan banyu. Jadi jukung tu harus mambuka jalan dahulu. Bila takana rumputnya nang jadi sarang nyamuk benyamuk tunpang disangati nang di atas jukung. Makanya paman-paman nang mambawa jukung besangu obat nyamuk. Kada tahan jua obat nyamuk saking banyaknya nyamuknya. Oya, jukung ni dipakai gasan alat pengawasan kelompok pencari iwak. Rata-rata di sini mata pencaharian orang mencari iwak tarus pang. Tapi takana ada nang menyalahi aturan yaitu ma

8 Macam Wadai Banjar

Assalamualaikum, Dangsanak berataan. Kayapa habarnya nih? Mudah-mudahan sihat berataanlah. Aamiin.  Hari ini ulun handak menyambatakan ngaran-ngaran wadai khas urang Banjar. Banyak banar macamnya, tapi nang ulun kisahakan hari ini 8 buting haja. Amun handak sebarataan, dua hari dua malam kada tuntung kita bekisahan. 1. Wadai Lapis sumber : http://dapurummumusasyi.blogspot.com/2013/10/kue-lapis-kakao.html Wadai nang pemulaan ngarannya wadai lapis. Kamiran atawa adonannya biasanya diulah dua warna, imbah itu disumap salapis-salapis beliung-liung warnanya. Bila sudah pina karas salapis, hanyar dindaki lapisan di atasnya pulang. Harus sabar pang tu pang meulah wadai lapis ngini. Warna nang paling rancak diulah tu hijau putih atau cuklat putih. Meulah wadai lapis ngini biasanya di dalam cipir ganal nang dimasukakan ka dalam panci badandangan. Bila sudah masak kaina hanyar dihiris halus-halus sasuai salira. 2. Lumba Sumber : http://beritainfo.web.id/ Lumba ni tamasu