Langsung ke konten utama

Cara Mangguringakan Bayi Ala Urang Banjar



"Uma.. Kawa haja ikam bemacam-macam lah? Maka halus masih anak. Dimapa kisahnya tadih?"

"Dipukung cil ai.. Mun kada dipukung kada kawa beapa-apa tu pang ulun"

"Uma.. Dasar mantap mama anu neh"

Itu pang panderan nang ulun dangar pas ba-ilang wadah tetangga di Banjar nih. Sudah kada asing lagi dah urang sini harat mengguringakan bayi. Ada nang anak masih halus tapi kawa ja mamanya sambil bejualan. Ada nang baisi anak selisih setahun masih kawa ja mamanya beolah macam-macam. Ujar ulun, "Liwat haratnya mama mama Banjar nih"

TAHULAN BUHAN PIAN LAWAN BAPUKUNG?

Bapukung ngitu artinya cara mengguringkan bayi dengan mandudukan inya diayunan sambil dililit kain disekitar area pundak wan gulu supaya kada gugur. Sudah rancak kiranya urang Banjar memakai cara bapukung ini gasan mengguringkan bayi.

Saking nyamannya bayi guring di pukungan, bahkan ada yang sampai 2 jam labih taguring. Bahkan sampai dibangunakan mamanya. Ham, liwar kalo? Jaka kada dibangunakan guring tarus tu pang inya.

Bapukung ni mirip posisi bayi lawan pose gendongan M-shape. Asal bisa-bisa ja meanu kainnya, insya Allah aman. Dan jangan bawani-wani mencoba sorang bapukung nih mun kada belajar bujur-bujur. Baguru bujur-bujur mun handak belajar tuh. Kanapa? Karena banyak jua kasus gegara kada belajar bujur-bujur timbul kada kawa bahinak bayi.

Disini kada ulun jelaskan tutorial bapukung lah. Takutannya kena ada nang mencobai sorang tanpa baguru, timbul daur gawi. Mun handak balajar hayuk ka Banua sini. Buhan-buhan acil disini banyak nang harat mamukung bayi. Dijamin buhan acil pinggiran sungai di Banjarmasin neh hakun aja malajari.

AMUN SUDAH GURING PAS DIPUKUNG, DIAYUN AI LAGI

Bapukung neh jangan lawas-lawas, karna kasian jua bayinya kena kalo panat inya. Makanya imbah bapukung tu, biasanya pukungannya dilapas pas bayi sudah janak guring. Malapasnya hati-hati, dan cukup kain lilitan di area pundak lawan gulu haja nang dilapas. Karna bayi tu selain katuju dipukung, inya katuju jua diayun.

Mun jar urang tu, dipukung tu rasa ada diparut mamanya.. Sedangkan diayun tu rasa kaya dibawa mamanya bajalan. Ham, bayi-bayi gen imajinasinya jalan kalinya. Haha

Mun sudah diayun neh, jaga ai lagi ayunannya. Mun ayunan bemandak harus diayun pulang. Mun kawa jangan sampai bemandak pang. Kena bayinya bangun. Daur am gawi. Haha.

Baiknya tu mun lagi pas hauran sorang bejaga ja dibawah ayunan. Mehiris sayur sambil meayun bayi kah. Menguyaki bawang sambil meayun bayi kah. Ham, kayatu pang emak-emak leh. Mun sebiji ja gawian ya kada tuntung-tuntung gawian rumah. Kena mun laki datang kada nyaman lo mun masakan kadada lawan rumah rigat? Hiih mun laki ja nang datang, musiah mintuha iya jua.. Supan am.. Haha..

Ayuja, kaya ini ja kisah pengalaman ulun mengguringkan bayi. Basyukur banar jadi urang Banjar. Banyak pepadahan urang bahari nang kawa digawi. Alhamdulillah bemanfaat banar. Mudahan tulisan ngini bemanfaat jua. Minimal gasan jadi 'insight' para emak baru nang hanyar baisi anak. Tapi ingatlah.. Jangan balajar kada baguru.

***

Nang manulis : Aswinda Utari (www.shezahome.com)
Nang ma-edit : Ira (www.irabooklover.com)

Komentar

  1. nah pas awal pindah ke Banjar aku bingung liat bayi diginiin "bepukung", kaya insecure
    eeehhh tapi malah bobo nyenyak si dedek ^^

    BalasHapus
    Balasan
    1. Inggih Ka, janak guring si ading bayi bila guring dipukung ^^

      Hapus
  2. Bujur banar, ulun katuju bahari mempukung ading ulun. Ranai abis tuh kawa beapa-apa. Haha

    BalasHapus
    Balasan
    1. Waaaaaah, Kaka Rima keren bisa mampukung ading sudah ^^

      Hapus
  3. wahini jarang banar sudah melihat kanakan dipukung. rasa tinggalam ajaran urang bahari dapatnya ayunan nang babatrai.

    BalasHapus
    Balasan
    1. Inggih Ka, mudahan tradisi bapukung ni masih tetap lestari lah, kada kalah lawan ayunan babaterai ^^

      Hapus
  4. Belum pernah liat ulun kayak. Jika ulun tahu handak belajar nah. Bayi ulun kada kawa tidur sendiri. Kada kawa tidur di ayunan dulu. Nempel terus hehe

    BalasHapus
    Balasan
    1. Inggih Ka, mudah-mudahan pian kawa balajar mamukung ading bayi, insyaAllah janak inya guring ^^

      Hapus
  5. Ulun lagi halus katuju banar dipukung, rasa makin janak guring .. tapi imbah disuruh mama belajar mamukung ading, kda bisa wkwk

    BalasHapus
    Balasan
    1. Hihihi, mudah-mudahan kita-kita bisa jua kaena Ka lah mamukung ading bayi ^^

      Hapus
  6. Anak ulun sarik amun dipukung ni, kurang banjar banar sidin ni berarti lah wkwk. Biasanya mun bepukung ni sambil ada lagunya dinyanyikan gasan mengguringkan yang di dalam ayunan. Iya lo?

    BalasHapus
    Balasan
    1. Inggih Ka, ada lagunya, insyaAllah kaena kapan-kapan kami tulisakan jua di sini ;)

      Hapus
  7. cara meayun anak nang unik banar. entah kaya apa rasanya anak yang dipukung, mungkin enak tidurnya. soalnya keliatan nyenyak banaar

    BalasHapus
    Balasan
    1. Inggih Ka, janak si ading bayi guring bila bapukung, sanang hati malihatnya ^^

      Hapus
  8. Nang kaya digendong m shape pang posisinya. Jadi nyaman ai guring si bayi lah

    BalasHapus
    Balasan
    1. Inggih Ka, rasa digendong si ading bayinya, jadi nyaman sidin guring ^^

      Hapus
  9. Pertama kali melihat di pukung nih kasian sama si anak, eh tahu nya inya nyaman, mak Guring janak banar pulang. Jadi pas wahini kd Kasian lagi bila melihat anak siapa kah dipukung hah

    BalasHapus
    Balasan
    1. Inggih Ka, anak ulun malah sampat haja bagaya-an lawan nininya bila dipukung, tatawa-tatawa ha urangnya pas dipukung, hihihi

      Hapus
  10. dasar bujur bayi ni mun bepukung lawas guringnya. anakku bahari amun pina ngalih guring dipukung nininya. amun mamamnya kada bisa am memukung nah. haha

    BalasHapus
  11. Saya sampai sekarang belum terbayang cara membedong bayi seperti ini. Perlu cari tahu nih karena klasik banget.

    BalasHapus
    Balasan
    1. Inggih Ka, mudah-mudahan pian ada kesempatan malihat cara mamukung bayi ala urang Banjar ^^

      Hapus

Posting Komentar

Postingan populer dari blog ini

Tidak Kalah dengan Ibukota Provinsi, Ini 4 Kafe di Barabai yang Wajib Dikunjungi

Halo Kaka-Kaka bungas yang lagi membaca tulisan ini, mudahan sehat sabarataan lah. Kenalkan dulu nah, ulun Eca anggota FBB jua dan tulisan ini nih tulisan perdana ulun di Banjar Corner. Selamat membaca 🤗 Tau lah bubuhan pian di wadah ulun Barabai bisi 4 kafe nang kada kalah lawan di Banjarmasin? Han kada tau kalo, makanya bacai sampai tuntung lah. Barabai Hulu Sungai Tengah sabujurnya lain kota kelahiran ulun. Tapi, kayapa pun jua, ulun sudah lawas bagana di sana dan sudah tarasa jadi tanah kelahiran ulun saurang. Ulun mulai bagana di Barabai semenjak kelas 1 SMP. Waktu ulun masih sakulah itu, dasar balum ada nang ngarannya kafe nginih. Ulun lawan kakawanan dahulu bejalanan ke kedai atau depot haja. Nah, wahini lumayan banyak sudah cafe yang kawa dipakai hagan “feed” Instagram bubuhan pian. Ini nah yang menurut ulun musti pian kunjungi. 1. Hero Cafe Nah, kabalujuran banar ulun lawan anggota FBB nang lain suah bakumpulan di Hero Cafe ini mun pas handak betamuan. Di sini rami

Bajukung di Atas Rawa

jejakrekam.com Di Kalimantan Selatan daerah pahuluan selain gunung dan sungai jua ada daerah rawa. Terutama di 3 kabupaten hulu sungai selatan, tengah, dan utara tergabung 3 daerah rawa.Nah di rawa ngini kadakawa pakai alat angkutan nang ganal jadi harus pakai jukung nang ramping supaya muat lawan kada santuk lawan di bagian bawah bila kamarau pas banyu surut. Jadi di awal bulan Juni samalam ulun sawat mancobai bejukung di rawa ngini. Tepatnya di daerah perbatasan antara hulu sungai tengah dan hulu sungai utara. Di permukaan rawanya hibak lawan tumbuhan banyu. Jadi jukung tu harus mambuka jalan dahulu. Bila takana rumputnya nang jadi sarang nyamuk benyamuk tunpang disangati nang di atas jukung. Makanya paman-paman nang mambawa jukung besangu obat nyamuk. Kada tahan jua obat nyamuk saking banyaknya nyamuknya. Oya, jukung ni dipakai gasan alat pengawasan kelompok pencari iwak. Rata-rata di sini mata pencaharian orang mencari iwak tarus pang. Tapi takana ada nang menyalahi aturan yaitu ma

8 Macam Wadai Banjar

Assalamualaikum, Dangsanak berataan. Kayapa habarnya nih? Mudah-mudahan sihat berataanlah. Aamiin.  Hari ini ulun handak menyambatakan ngaran-ngaran wadai khas urang Banjar. Banyak banar macamnya, tapi nang ulun kisahakan hari ini 8 buting haja. Amun handak sebarataan, dua hari dua malam kada tuntung kita bekisahan. 1. Wadai Lapis sumber : http://dapurummumusasyi.blogspot.com/2013/10/kue-lapis-kakao.html Wadai nang pemulaan ngarannya wadai lapis. Kamiran atawa adonannya biasanya diulah dua warna, imbah itu disumap salapis-salapis beliung-liung warnanya. Bila sudah pina karas salapis, hanyar dindaki lapisan di atasnya pulang. Harus sabar pang tu pang meulah wadai lapis ngini. Warna nang paling rancak diulah tu hijau putih atau cuklat putih. Meulah wadai lapis ngini biasanya di dalam cipir ganal nang dimasukakan ka dalam panci badandangan. Bila sudah masak kaina hanyar dihiris halus-halus sasuai salira. 2. Lumba Sumber : http://beritainfo.web.id/ Lumba ni tamasu