Langsung ke konten utama

Kisah Acil Pinggiran Sungai Pangeran


Tahulah buhan piyan, amun Banjar ni dingarani kota saribu sungai? Kanapa garang lah jadi dingarani kayatu? Karna dasar sungai di Banjar nih banyak banar. Handak ulun sambati kah ngaran-ngarannya? Beh, beliuran muntung. Apalagi urang Banjar nih dasar katuju mengarani sungai mamakai galar nang kada-kada. Ham, babanyak pulang ngarannya.

Mun piyan suah bajalanan ka Banjar pasti dah tahu mun banyak urang banjar nang barumah di atas sungai. Bingung piyan pasti malihati pemandangan ngitu. Kada usah piyan, ulun ja bingung malihat bahari lagi halus. Tapi bingungnya tu model himung pang. Jar ulun tu, “Uma raminya leh jaka baisi rumah di atas banyu, bakunyung tu pang saban hari."

Sakalinya kahandak ulun kabul pas kuliah. Ulun dasar bagana mangontrak rumah nang di atas sungai. Beh, jaka pang bujur kawa bakunyung saban hari, bakunyung ja kada bisa. Bisa ai gaya batu. Lawan lah mun dipikir-pikir jaka bisa bakunyung kawa jua kah mandi di situ? Palingan supan, awak ja ganal sudah. Ya kalo? Hahaha…

Kanapa garang jadi mamilih badiam di atas sungai? Ham, piyan kira urang Banjar nih kawa batajak rumah di atas tanah kaya biasa lah? Ngalih tahulah barumah di Banjar nih. Tanahnya gambut, mun buhan piyan menyambat bahasa kerennya tuh kami nih hidup di ‘kawasan rawa’. Kenapa kaya itu? Mun dasar kaya itu takdirnya kayapa pang. Ham te.. Jawaban urang pangulir..

Jadilah leluhur urang Banjar bahari nih banyak nang barumah di atas sungai. Kanapa yu jadi katuju urang masing-masingnya barumah di atas sungai? Jawaban buhannya nyaman banar, “nyaman ding ai meambil banyu.. “ 😅

Jadi kisahnya, bahari banyu di Banjar nih dasar ngalih. Banyu sungai nih bahari banyu elit tu pang. Bubuhan nang jauh pada sungai nih paksa mancibuk banyu ka sungai. Ada jua nang bepompa banyu mealirakan banyu sungai. Nang jauh pada sungai kaya apa? Baulah sumur bor ai. Maka lah sumur bor bahari tuh terkenal tu pang pasti bau kada nyaman kaya banyu sungai pang.

Jadi dari malihat sejarah bebanyuan nih diambil kesimpulan bahwa nang wahini masih barumah di pinggiran sungai tu iya leluhurnya urang Banjar wahini. Tetuhanya toh modelnya.

Kada parcaya? Takuni ja piyan sapanjangan sungai tuh. Pasti banyak urang nang tuha-tuha. Amun pas hari raya Idul Fitri tuh, hibak tu pang kampung pesungaian nih diilangi urang. Mailangi tatuhanya masing-masingnya basalaman.

Lawas tahulah bahari ulun ni bagana di rumah di atas sungai tuh. Ngaran sungainya tuh Sungai Pangeran. Ulun kira lah bahari tu nyaman badiam di atas sungai tu, pasti sejuk. Sakalinya uma panas tahulah, liwar tu pang nang kaya di sauna mun siang tuh (kaya suah ja merasai basauna). Ham, kanapa jadi curhat. Ulun ni kisahnya maka handak bekisah nang iyanya? 😂

Jadi kisah bubuhan masyarakat kampung sungai nih dasar unik banar. Ulun katuju banar mamarhatiakan kabiasaan bagiannya nih. Kabiasaan nang balum tapangaruhi lawan kacanggihan-kacanggihan wahini. Sabagai babinian, ulun salut luar biasa lawan cara bertahan hidup bubuhan acil-acil pinggiran sungai nih.

Acil pinggiran sungai, ngarani ja kayatu lah.


Acil pinggiran sungai nih dasar rajinan urangnya. Ulun parhatiakan kadida buhan acil sini nang pina pangulir. Ada ja nang digawinya. Gawiannya tuh model kuno barataan kadida pang model kantoran atawa manggawi hape tarus kaya ulun nih. Ada nang bajualan di pasar terapung, ada nang baulah wadai, ada nang tukang urut, ada jua nang jadi pambantu. Tapi nang ulun salut bagiannya nih kadida nang mangaluh kekaya urang wahini. Bahagia tarus, kanapa kah. Rasa himung hati malihat.

Kanapa lah jadi sanang tarus? Marga lingkungannya ni pang kada gaya sosialita kaya urang kota. Lingkungannya mangampung. Takananya ulun katuju bajalanan pagi ka pinggiran sungai nih balalihat, sasakali batatukar. Model himung mun bajalan ka sini nih, model tumbuh tuh langsung rasa syukur malihati sanyum acil-acil.

Baisukan acil-acil pinggiran sungai nih masing-masingnya asik lawan gawiannya. Acil-acil nih sungsung jam 4 manyalai kayu api sudah bamasak. Musim kompor gas leh sudah banyak ja buhan acil-acil nang katuju bamasak di kayu. Suah sakali ulun takuni kanapa, tahulah jawabannya napa?

“Nyaman ding ai asa lain banyunya, nasi gin asa nyaman bamasak dikayu jua.”

Uma leh dalam hati lun nih. Dasar handak maimit gas kah dasar sudah kabiasaan kah, kada mangarti jua.

Imbah tuntung gawian, bajalan acil. Kada katinggalan tu pang mangasai pupur dingin ka muha. Pupur klasik ala acil-acil nih diulah matan macam-macam bahannya. Ada nang resepnya baras ditumbuk, ada nang ba janar, ada nang ba sirih, macam-macam tu pang. Gasan napa garang bapupur dingin?

“Gasan supaya kada hirang tu pang, mun rajin mamakai baputih tu pang awak.”

Ham, modal bungas acil-acil yet. Pupur dingin tu nang kaya sun screen+bb cream+bedak tabur tu pang bagi acil. Bisa sama lawan cushion jar. Rancak sidin baulah saurang pupur tuh. Mun manukar larang kah? Kada, sidin bajual saribu ja sabungkus. Nyaman pada pupur dingin Ovale tahu lah. Ham..

Himung sudah acil-acil bapupur dingin. Saurang gincu salusin masih kada basyukur.. Heh..

Pagi sampai siang bagawi acil. Sore beapa? Bakumpulan kah? Marotet kah?

Bakumpulan rami bubuhan acil-acil. Masing-masingnya mambawa lasung. Beapa? Beolah galapung baras. Kanapa kada manukar? Kada nyaman jar acil. Ham.. Engken kah acil ni lah?

Kada, acil nih kada engken. Manumbuk galapung baras besamaan bekumpulan tetangga tuh sakalinya dasar banyak hikmaknya. Tatawaan, bapandiran, bagawian baramian tuh sama ai jua lawan silaturahmi. Apa jar nabi kita? Silaturahmi tu mamanjangakan umur lawan mambanyaki rajaki kalo? Ham bujur tu pang..

Banyak masih hal-hal nang maulah ulun salut dari kahidupannya buhan acil-acil nih. Pokoknya banyaki basyukur hidup tuh, lihati ja ka bawah jangan ka atas tarus. Makasih banyak lah bubuhan acil-acil pinggiran sungai. Piyan menginspirasi kahidupan banua.

Penulis: Aswinda Utari (author on www.shezahome.com)
Editor: Gita Puteri Yani

Komentar

  1. Uma ih kaganangan acil nah mamakai pupur dingin, bahari banyak banar urang mamakai kada sing supanan. Wahini urang pina kada tapi mamakai lagi leh, taganti ka pupur nang bamirik jar.. Hihihi

    BalasHapus
  2. Lagi SD aku ketuju pakai pupur dingin. Wahini kada suah lagi mamakai. Bisa batukar macam-macam pang sudah, haha. Mun wadah mintuha di kampung masih banyak nang mamakai pupur dingin, gasan ka pahumaan.

    BalasHapus
  3. Aku katuju banar jua melihati penduduk pinggiran sungai ni pian.... Apalagi yg di Sungai Jingah beuh ay rumahnya masih banyak yg masih rumah bahari, huhu, ulun katuju banar sekaligus terharu bubuhan sidin masih mempertahankan tradisi rumah Banjar... Melihatnya jadi adem jua krn biasanya semangat Islamnya masih tinggi. Ya ala ala bubuhan Banjar wayah dulu...

    BalasHapus
  4. Dasar asli lain pang rasanya tuh cil ae mun bamasak di kompor gas atawa bamasak bakayu. Biar nasinya hangit atawa karak hidung latat gen, banyak haja nang manggawi. Mama Ulun saikung, padahal kada badiam di pinggir pabanyuan cil ae

    BalasHapus
  5. Paling katuju ulun bila acil acil bejualan disungai bekayuh jukung nih biasanya murah banar amun lihai menawar tapi am amun kada bisa menawar apalagi nang pina dilihat sidin aksi wan baduit hingga dilarangi sidin wkwk

    BalasHapus
  6. Salut banar lawan buhan Acil" yang mempertahan kan budaya Banjar nih, bujur banar jar Ka Eni, misalnya di liat pina aksi lalu ja belakang harga nya 🤣

    BalasHapus
  7. Acil uy acil, pupur pian tabal banar. Maraha, jar acil, biar tambah langkar aku. Haha. Bujur banar ka ai, bila malihat kahidupan acil2 di pinggir sungai ni rasa supan tu pang saurang. Banyak kanyamanan nang dirasaakan tapi kada banyak syukur. Acil2 te, biar kayapa hidup sakit, senyum haja sidin2. Woles kah jar urang tu istilahnya.

    BalasHapus
  8. Jadi ingat almarhum nini bahari rancak beulah pupur dingin. Padahal itu skincare alami banar sako tapi sorang koler memakai

    BalasHapus

Posting Komentar

Postingan populer dari blog ini

Tidak Kalah dengan Ibukota Provinsi, Ini 4 Kafe di Barabai yang Wajib Dikunjungi

Halo Kaka-Kaka bungas yang lagi membaca tulisan ini, mudahan sehat sabarataan lah. Kenalkan dulu nah, ulun Eca anggota FBB jua dan tulisan ini nih tulisan perdana ulun di Banjar Corner. Selamat membaca 🤗 Tau lah bubuhan pian di wadah ulun Barabai bisi 4 kafe nang kada kalah lawan di Banjarmasin? Han kada tau kalo, makanya bacai sampai tuntung lah. Barabai Hulu Sungai Tengah sabujurnya lain kota kelahiran ulun. Tapi, kayapa pun jua, ulun sudah lawas bagana di sana dan sudah tarasa jadi tanah kelahiran ulun saurang. Ulun mulai bagana di Barabai semenjak kelas 1 SMP. Waktu ulun masih sakulah itu, dasar balum ada nang ngarannya kafe nginih. Ulun lawan kakawanan dahulu bejalanan ke kedai atau depot haja. Nah, wahini lumayan banyak sudah cafe yang kawa dipakai hagan “feed” Instagram bubuhan pian. Ini nah yang menurut ulun musti pian kunjungi. 1. Hero Cafe Nah, kabalujuran banar ulun lawan anggota FBB nang lain suah bakumpulan di Hero Cafe ini mun pas handak betamuan. Di sini rami

Bajukung di Atas Rawa

jejakrekam.com Di Kalimantan Selatan daerah pahuluan selain gunung dan sungai jua ada daerah rawa. Terutama di 3 kabupaten hulu sungai selatan, tengah, dan utara tergabung 3 daerah rawa.Nah di rawa ngini kadakawa pakai alat angkutan nang ganal jadi harus pakai jukung nang ramping supaya muat lawan kada santuk lawan di bagian bawah bila kamarau pas banyu surut. Jadi di awal bulan Juni samalam ulun sawat mancobai bejukung di rawa ngini. Tepatnya di daerah perbatasan antara hulu sungai tengah dan hulu sungai utara. Di permukaan rawanya hibak lawan tumbuhan banyu. Jadi jukung tu harus mambuka jalan dahulu. Bila takana rumputnya nang jadi sarang nyamuk benyamuk tunpang disangati nang di atas jukung. Makanya paman-paman nang mambawa jukung besangu obat nyamuk. Kada tahan jua obat nyamuk saking banyaknya nyamuknya. Oya, jukung ni dipakai gasan alat pengawasan kelompok pencari iwak. Rata-rata di sini mata pencaharian orang mencari iwak tarus pang. Tapi takana ada nang menyalahi aturan yaitu ma

8 Macam Wadai Banjar

Assalamualaikum, Dangsanak berataan. Kayapa habarnya nih? Mudah-mudahan sihat berataanlah. Aamiin.  Hari ini ulun handak menyambatakan ngaran-ngaran wadai khas urang Banjar. Banyak banar macamnya, tapi nang ulun kisahakan hari ini 8 buting haja. Amun handak sebarataan, dua hari dua malam kada tuntung kita bekisahan. 1. Wadai Lapis sumber : http://dapurummumusasyi.blogspot.com/2013/10/kue-lapis-kakao.html Wadai nang pemulaan ngarannya wadai lapis. Kamiran atawa adonannya biasanya diulah dua warna, imbah itu disumap salapis-salapis beliung-liung warnanya. Bila sudah pina karas salapis, hanyar dindaki lapisan di atasnya pulang. Harus sabar pang tu pang meulah wadai lapis ngini. Warna nang paling rancak diulah tu hijau putih atau cuklat putih. Meulah wadai lapis ngini biasanya di dalam cipir ganal nang dimasukakan ka dalam panci badandangan. Bila sudah masak kaina hanyar dihiris halus-halus sasuai salira. 2. Lumba Sumber : http://beritainfo.web.id/ Lumba ni tamasu