Langsung ke konten utama

Kalau Jalan-jalan ke Barabai, Jangan Lupa Coba Makanan Tradisional Ini


Kayapa habar bubuhan pian barataan? Baik haja kalu lah? Sadikit bakisah hulu nah. Asal mulanya ulun ni handak manulis tampat wisata nang hanyar “booming” di Barabai ngini. Tapi, bahujung kada jadi  manulis sebab ulun kada tapi panjalan ka tampat wisata.

Nah, jadi ulun handak mambahas makanan haja nah. Buhan pian nang pina pangacaran, basiap-siap ha lah. Bisa langsung mang-gas handak mancari makanan nang ulun tulis ni di Barabai, Hulu Sungai Tengah.

(Dasar bujurr melilih banyu liur, pas parut laparr pank tabaca nah *serbit mana serbit) 

1. Apam Barabai
Han, sapalih buhan pian pasti tahu sudah lawan wadai nangini. Ada dua buting pilihan rasa. Ada nang disambat urang apam putih. Ada jua nang disambat urang apam habang. Nang sabujurannya kada habang kada, tapi koneng eh kuning maksud ulun tih.

(koneng tu nang gigi bemaju sikit kalo lah ka muka? Eh lain pulang lih, ngitu boneng) 

Wadai ini sampai wayahini masih payu. Masih jua dijadiakan urang oleh-oleh hagan kaluarga atawa kakawanan. Harganya banaik sadikit pada dahulu. Wajar haja lawan kada talalu larang jua. Bamacam-macam harganya ni. Mulai 8 – 10 ribuan.

Amun pian handak mancubai, wadai ngini tasadia haja di sapanjang jalan. Di mana-mana ada urang bajual. Apalagi amun pian bajalan ka pasar hanyar situ. Hibak urang bajual apam haja.

Nah, amun nang “recommended” ujar urang-urang di sini tu ada di Bulau. Masuk arah Kambang Melur mun pian mulai simpang ampat Bulau lampu habang situ. Sadikit ha bamasuk. Ada sabalah kanan toko cat putih. Ujar habar di situ nyaman.
Tapi ulun saurang kada tapi bapilih. Ulun baganti-ganti tampat manukar apam ini biasanya. Kada di sisitu haja. Parasa ulun kita baik jua marasai nang lain. Intinya amun pian nukar di Barabai, nyaman.

2. Balik Kuhai
Ujar kawan ulun, ngaran wadai nang ini ni sabujurannya “Balik Luh ai”. Tapi, urang manyambat jadi balik kuhai. Lalu ai rikit, sampai wahini disambat balik kuhai.

Nah, amun malihat sakilaran, wadai ini mirip nang jar urang “waffle”.  Mamasakinya caranya dibalik-balik panggangnnya. Bahan dasar wadai ngini tapung, santan, hintalu, lawan gula habang.
Waffle nya urang Barabai
Sumber: nfitriah.blogspot.com

Sapalih urang mamadahi bila handak wadai ngini harus bangun subuh. Imbah tu tulak ka pasar tradisional. Amun jar ulun, kada pang. Ulun parnah manukar wadai ini hagan kawan ulun di Banjar jam 9 pagi. Masih ada si padagangnya mamasakan panas-panas.

Pian datang haja ka pasar hanyar Barabai, andakan nini nang bajualan ni di dalam pang. Pian baiknya batakun haja lawan urang di pasar situ. Urangnya ramah-ramah haja atau batakun haja lawan ulun. Asal dibayariakan, ulun hakun haja mangganiiakan *EH

3. Apam Surabi
Apam pulaang muncul. Tapi nangini balain sadikit. Apamnya putih lawan taganal han. Mamakannya gin bakuah gula habang. Mun kada bakuah, apamnya wara, nyata kahambaran pian.

Nah, apam ngini asalnya adanya tu subuh haja. Jadi ulun lawan kaka ulun tu biasanya habis “jogging” pagi hanyar kasiniaan “ma-apam” jar urang Barabai. Tapi wahini kada musti lagi basusubuhan ari ka pasar.
Sumber: Indirania.com

Sisiang sadikit masih haja jua ada urang nang bajual apam surabi nang liwar nyaman ngini. Tampatnya baparakan haja lawan nang bajual Balik Kuhai tadi tih. Batakun ha jua pian di pasar tu. Lakas haja tu urang mamadahakan.

Nah, makanan nang ulun bahas ini kabatulan manis sabarataan. Mudah-mudahan pian katuju haja lawan nang manis-manis tamasuk nang kaya ulun nih *minta dikipai. Ayuha tu, tarima kasih pian sudah mambaca tulisan ulun.

Penulis: Hairun Nisa / Eca (author www.kataeca.com)
Editor: Latifika Sumanti (author www.fika-su.com)

Komentar

  1. Penasaran lawan waffle barabainya. Adakah di banjarbaru?

    BalasHapus
  2. Penasaran lawan waffle barabainya. Adakah di banjarbaru?

    BalasHapus
  3. Akur banar lawan tulisannya. Parasaan ulun gin apam tu nang panyamannya iya apam ulahan urang Barabai nang dijual disana. Ta-ubuy tupang pas sagala-gala takarannya. Han, lapar am ulun mambaca ngini

    BalasHapus
  4. Wahhhh itu kue pesanan aya waktu itu wkwkwk, aku suka banget sama kue” tradisional yang ada di barabai, apalagi apam 😍

    BalasHapus
  5. Han, tebaca pulang tengah malam, lapar pulang ulun. Apalagi nang bekuah santan gula habang tuh, tambahi durian pulang, labaram..da usah lagi benaik ke timbangan ��

    BalasHapus
  6. Yg nomer 2 aku baru tau ca, tapi aseli apam barabai itu sebungkus talah sorangan, apalagi apam surabi. Caaaaa, bhungkuuuushhhh

    BalasHapus
  7. Uma nang balik kuhai itu, hanyaram tahu, matan halus disini asa kada suah tahu wadai ngitu. Nang apam lawan surabi ada haja terasai pang sudah walaupun kada rancak

    BalasHapus
  8. Sabuting lagi wadai cincin yg bulat kaya cincin,eh maksudnya yg bulat pang yg biasanya banyak lobang nya lo.yg ini yg lobang nya sauting haja.nyaman karanyas

    BalasHapus
  9. Apa Barabai wajib banar menukar Mun ke barabai pokoknya ����

    BalasHapus
  10. ulun ketuju banar lawan apam barabai. amun ada yang membawakan pasti langsung habis. wkwkwk. hanyar tahu nah lawan balik kuhai

    BalasHapus
  11. Uma.. Aku nang diatas tu plg ketuju dah lawan apam barabai. Khas banar tu nah rasa lwn tampilannya. Dsr lain nang asli bkr dibarabai lwn nkr disini. Heh timbul hdk kebarabai. Haha

    BalasHapus
  12. Wah, komentar di tulisan sendiri nih. Hehe... hayuk mana wadai favorit kalian dah? Kalau ulun kayaknya no 3 deh. hehe.. Wajib coba ini.

    BalasHapus
  13. Eh kenapa serabi jadi ada "apam"nya ya kalo d sini? Kalo d jawa serabi aja wkwk

    Yg kaya waffle itu aku penasaran haha

    BalasHapus

Posting Komentar

Postingan populer dari blog ini

Tidak Kalah dengan Ibukota Provinsi, Ini 4 Kafe di Barabai yang Wajib Dikunjungi

Halo Kaka-Kaka bungas yang lagi membaca tulisan ini, mudahan sehat sabarataan lah. Kenalkan dulu nah, ulun Eca anggota FBB jua dan tulisan ini nih tulisan perdana ulun di Banjar Corner. Selamat membaca 🤗 Tau lah bubuhan pian di wadah ulun Barabai bisi 4 kafe nang kada kalah lawan di Banjarmasin? Han kada tau kalo, makanya bacai sampai tuntung lah. Barabai Hulu Sungai Tengah sabujurnya lain kota kelahiran ulun. Tapi, kayapa pun jua, ulun sudah lawas bagana di sana dan sudah tarasa jadi tanah kelahiran ulun saurang. Ulun mulai bagana di Barabai semenjak kelas 1 SMP. Waktu ulun masih sakulah itu, dasar balum ada nang ngarannya kafe nginih. Ulun lawan kakawanan dahulu bejalanan ke kedai atau depot haja. Nah, wahini lumayan banyak sudah cafe yang kawa dipakai hagan “feed” Instagram bubuhan pian. Ini nah yang menurut ulun musti pian kunjungi. 1. Hero Cafe Nah, kabalujuran banar ulun lawan anggota FBB nang lain suah bakumpulan di Hero Cafe ini mun pas handak betamuan. Di sini rami

Belajar Istilah Banjar

  Halo! Apa habar buhan pian sabarataan? Mudahan baik ajaa lah sabarataan, sehat selalu dan dijauhkan dari panyakit.   Nah kali ini ulun handak memadahkan beberapa istilah dalam bahasa Banjar yang mungkin banyak dari pian masih balum tahu karena kada tebiasa berbahasa banjar sehari-hari, atau hanyar aja pindah ke banjar. Oiya, ulun ingat banar bahari pas SD balajar bahasa Banjar muatan lokalnya, amun wahini masih jua kah kakanaan tahu di istilah ni?   Berikut beberapa istilah dalam bahasa Banjar:   1. Salesmaan   Salesma sabujurnya adalah ngaran virus yaitu virus salesma, yang begejala behingusan atau pilek. Nah rancak urang tetap menyambat salesmaan jua amun ada nang kena flu karena gejala si salesma lawan flu nih mirip yang nyata bahingusan lawan batukan.   2. Hawai   Hawai nang ini lain ngaran wilayah lah, hawai nang dimaksud di sini tu artinya semacam sunyi tu nah, misalnya urang tebiasa di kota lalu bejalanan ke desa pasti lain suasananya, tebiasa pina rami

Kisah Intingan wan Dayuhan

Halo sabarataan, batamuan pulang lawan ulun, Nisa. Kali ini, ulun handak mangisahakan kisah Intingan wan Dayuhan nang rajin tu selalu dikisahakan bila ulun handak guring waktu lagi halus dulu. Kisahnya ni turun temurun dari zaman datu, nini, mama, anak sidin, dan cucu sidin, bisa jua kaina sampai ka buyut sidin. Kisahnya nih rami, sampai taguring guring mandangari kisah ini ja, lucu pulang han. Bila pian suah mandangar kisah Intingan wan Dayuhan, bararti kita sama. Zaman bahari kadada pang yutube wan intirnit. Nang ada kisah dari muntung ka muntung ja. Nang kaya apa kisahnya, ni ulun kisahakan nah ka bagian pian sakira kada panasaran. Kisah Intingan wan Dayuhan  Zaman bahari ada dua ikung badua ba-ading nang bangaran Intingan wan Dayuhan. Kisahnya Intingan nang jadi kaka, Dayuhan ading nya. Ibarat kata, si Dayuhan nih inya orangnya kada tapi paham apa yang di padah-akan tu, atau bahasa kitanya, ada nang kurang kaitu nah. Ujar kisah si ading nih kada hakun sakulah, mac