Langsung ke konten utama

Mengenal Kain "Si Galuh Langkar" Sasirangan



Assalamu'alaikum

Uy, sanak, apa dihabar? Jangan muyak lah basinggah ka Banjar Corner bubuhan FBB. Di sini dasarannya kami babahasa Banjar aseli, sualnya mun kada kita nang malastariakan siapa lagi, ya luku? Mun nang di luar buhan Banjar biar ha situ roaming 😂 Purunnya ih lah, hahaha.

Selain bahasa Banjar nang masih lestari ada lagi sanak ay nang lestari di adat kita sampai hari ini, bahkan makin lawas makin tarkanal.

Apa yu lah?

Apa lagi mun kada si galuh langkar Sasirangan
sumber: koleksi foto Vee Sasirangan


Bahari kain sasirangan ni biasa aja ulun liat, sagan saragam sakulah palingan ya lu? Malah ada nang jadi taplak meja haja 😂 Tapi wahini, beeehh..... asing-asingnya urang bebengkeng-bengkeng lawan sasirangan. Ada nang jadi kerudung lah, gaun pesta lah, ada nang diulahnya jadi tas lah, ada jua nang hakun mamudifikasinya jadi pakaian
travelling. Naik daun bujur pokoknya Sasirangan ni.
sumber: Koleksi foto Rabita Collection


Tapi tahulah bubuhan pian sejarah Sasirangan ni?? Hen, ya kalo pina musti haja ah bisi kainnya di rumah 😝 Sini nah acil padahi kisahnya.
Jeng jeng jeeeng..... (pajahi lampu utama, nyalai lampu sorot)
Jadi kisahnya tu abad ke-12 wayah Lambung Mangkurat jadi Patih Negara Dipa (taulah sudah kisah Negara Dipa? Ay kada tahu lah? Jangan membari supan acil nah, lakasi gugling, kaya acil 😂 *timbai gayung). Naah, kisah nang berkembang di masyarakat Kalsel bahwa kain Sasirangan ini diulah olehnya patih Lambung Mangkurat imbah betapa 40 hari 40 malam di atas rakit. Pas handak tuntung masa betapanya rakitnya sampai di daerah Rantau. Di sini, sidin mandangar suara babinian kaluar matan sagumpal buih, lalu dingaranilah Putri Junjung Buih.
Tapinya putrinya ni kada hakun meliatakan wujudnya kacuali Lambung Mangkurat mahakuni kahandak inya. Si putri itu handak minta ulahakan sabuah istana Batung lawan minta ulahakan kain nang ditenun wan dicalap ka pawarna oleh 40 putri dengan motif wadi/padiwaringin. Kadua kahandaknya tu harus tuntung dalam satu malam. Nah, kain nang dicalap tu lalu dikenal sebagai kain sasirangan nang pertama kali diulah.
Zaman bahari tu jar, kain ini diparcaya baisi kakuatan mistis gasan batatamba. Tapi wahini kaparcayaan ngitu sudah mamudar marga arus globalisasi mode. Selain itu jua marga pangaruh agama Islam kaparcayaan ngitu mulai luntur.
Banyak motif kain sasirangan ni  di antaranya: sarigading, ombak sinapur karang (ombak menerjang batu karang), hiris pudak (irisan daun pudak), bayam raja (daun bayam), kambang kacang (bunga kacang panjang), naga balimbur (ular naga), daun jeruju (daun tanaman jeruju), bintang bahambur (bintang bertaburan di langit), kulat karikit (jamur kecil), gigi haruan (gigi ikan gabus), turun dayang (garis-garis), kangkung kaombakan (daun kangkung), jajumputan (jumputan), kambang tampuk manggis (bunga buah manggis), dara manginang (remaja makan daun sirih), putri manangis (putri menangis), kambang cengkeh (bunga cengkeh), awan beriring (awan sedang diterpa angin), benawati (warna pelangi), dan sisik tanggiling.
Hoon, banyak bonor sakalinya 😍, babuihan acil menyambat.
Kayapa baulahnya bubuhan pian tahulah? Acil bahari sakulah SMA dilajari guru seni maulah kain sasirangan, padahal sidin urang Jawa tapi marga menghargai budaya lokal makanya kami dilajari ini. Amun kain batik tu ada seni melukis motif, maka kain sasirangan ni terletak pada keterampilan menjahit. Jadi, kain kosong tu diulah dulu motifnya handak kayapa, digambar pakai pensil pank biasanya. Habis digambar tu dijahit sesuai pola. Imbah tu ditarik jahitannya tu sampai takarucut pisit, lalu diikat simpul benangnya sampai polanya habis. Lalu kain nang sudah takarucut tu dicalapakan satu-satu lawan pawarnanya, handak warna apa tesarah haja sesuai kreativitas. Bila sudah samuaan diwarnai, terakhir calapakan ka pawarna dasar kain. Jamur am imbah itu. Bila sudah karing, dilapasi jahitannya tadi, lalu diurak... Tadaaaaaa jadi aam salambar kain sasirangan nang langkar salangkar acil *ubuy 😂
Nah kayatu pank samalam dilajari. Mungkin itu proses sederhananya, jadi jangan manakuni acil pulang proses nang labih canggihnya lah.
Banyak haja dimana-mana nang bajual kain sasirangan ni, biasanya di toko oleh-oleh pasti ada pang. Harganya kada sama targantung jenis kainnya lawan motifnya. Makinnya rumit motifnya makinnya larang harganya. Setahu acil nang paling murah kisaran 90 ribu sameternya, nang larang lagi banyak.
Sasirangan go to nasional dalam Fashion Show bertema Global Culture di Surabaya Fashion Trend 2017.
Sumber: seruji.co.id



Penulis: Latifika Sumanti (author www.fika-su.com)
Editor: Gita Puteri Yani


Komentar

  1. Kaina cil ae mun handak menyambat nang panjang kisahnya pian basiap ja tisu dihiga. Jadi mun babuihan muntung lakas di lap. Supaya kada titikan, wkwkwkwn

    BalasHapus
  2. Sasirangan kain paling cantik khas urang banuaa the best hehe

    BalasHapus
  3. Selain makanan, kain sasirangan banyak dijadikan buah tangan karena motifnya yg beragam, tidak kalah menawan kain khas kalimantan selatan dengan daerah lain.

    BalasHapus
  4. Aku dulu pas sma di skolah belajar juga ini apalg yg negara dipa aku tauu.. Dulu sih masuk mapel mulok banjar ..wkwkw tapi kain sasirangan ini jadi bagus ya stelah disulap fashion designer :D

    BalasHapus
  5. Uma ai, ulun jadi kaingatan lagi sma nah beulah sasirangan. Kada tapi bisa beulah nyaman beolah wadai sasirangannya pang. Haha. Tap dasar khas banar kain sasirangan nih. Kededa nang menyamai. Bangga jadi urang banjar lun.

    BalasHapus
  6. wahini motif sasisarang bungas-bungas lawan warnanya bagus-bagus. aku jua pas smp bahari dilajari beulah kain sasirangan ni. lapah jua menarik jahitannya supaya kada longgar

    BalasHapus
  7. Alhamdulillah, kayaknya akan nambah lagi vocab banjarku dengan mampir ke blog FBb ��

    BalasHapus

Posting Komentar

Postingan populer dari blog ini

Pantun Basa Banjar Gasan Manjaga Warisan Budaya

Assalamualaikum sabarataan. Alhamdulillah ulun akhirnya berkesempatan manulis lagi disini. Buhan pian penasaran apa yang handak ulun kisahakan kah? Lakasi baca lah. Di tulisan ini ulun handak bakisah soal pantun basa Banjar. Buhan pian mungkin sudah tahu, urang Melayu tu kada talapas lawan kabiasaan bapantun. Urang Banjar nang sarumpun lawan Melayu damintu jua, harat-harat baulah pantun. Pantun basa Banjar kada balain pang lawan pantun basa lain. Ada katantuannya jua nang musti diumpati. Mun kada diumpati pantun nang diulah kada baik atawa bisa jua kada kawa disambat pantun. Mun kita maulah wadai tu ada tuangannya. Mun maulah baju, ada polanya. Sama haja lawan pantun. Pantun nang baik ada katantuannya, ada tuangan, ada polanya jua, ngini nah: 1. Pantun nang bagus tu baisian ampat buting baris. Dua baris nang panambaian ngarannya sampiran. Dua baris nang pauncitan ngarannya isi. 2. Pantun nang bagus tu ada pola bunyinya, atawa pola parsajakannya. Polanya tu: ab-ab. 3. Pantu

Tidak Kalah dengan Ibukota Provinsi, Ini 4 Kafe di Barabai yang Wajib Dikunjungi

Halo Kaka-Kaka bungas yang lagi membaca tulisan ini, mudahan sehat sabarataan lah. Kenalkan dulu nah, ulun Eca anggota FBB jua dan tulisan ini nih tulisan perdana ulun di Banjar Corner. Selamat membaca 🤗 Tau lah bubuhan pian di wadah ulun Barabai bisi 4 kafe nang kada kalah lawan di Banjarmasin? Han kada tau kalo, makanya bacai sampai tuntung lah. Barabai Hulu Sungai Tengah sabujurnya lain kota kelahiran ulun. Tapi, kayapa pun jua, ulun sudah lawas bagana di sana dan sudah tarasa jadi tanah kelahiran ulun saurang. Ulun mulai bagana di Barabai semenjak kelas 1 SMP. Waktu ulun masih sakulah itu, dasar balum ada nang ngarannya kafe nginih. Ulun lawan kakawanan dahulu bejalanan ke kedai atau depot haja. Nah, wahini lumayan banyak sudah cafe yang kawa dipakai hagan “feed” Instagram bubuhan pian. Ini nah yang menurut ulun musti pian kunjungi. 1. Hero Cafe Nah, kabalujuran banar ulun lawan anggota FBB nang lain suah bakumpulan di Hero Cafe ini mun pas handak betamuan. Di sini rami

8 Macam Wadai Banjar

Assalamualaikum, Dangsanak berataan. Kayapa habarnya nih? Mudah-mudahan sihat berataanlah. Aamiin.  Hari ini ulun handak menyambatakan ngaran-ngaran wadai khas urang Banjar. Banyak banar macamnya, tapi nang ulun kisahakan hari ini 8 buting haja. Amun handak sebarataan, dua hari dua malam kada tuntung kita bekisahan. 1. Wadai Lapis sumber : http://dapurummumusasyi.blogspot.com/2013/10/kue-lapis-kakao.html Wadai nang pemulaan ngarannya wadai lapis. Kamiran atawa adonannya biasanya diulah dua warna, imbah itu disumap salapis-salapis beliung-liung warnanya. Bila sudah pina karas salapis, hanyar dindaki lapisan di atasnya pulang. Harus sabar pang tu pang meulah wadai lapis ngini. Warna nang paling rancak diulah tu hijau putih atau cuklat putih. Meulah wadai lapis ngini biasanya di dalam cipir ganal nang dimasukakan ka dalam panci badandangan. Bila sudah masak kaina hanyar dihiris halus-halus sasuai salira. 2. Lumba Sumber : http://beritainfo.web.id/ Lumba ni tamasu