Assalamu’alaikum kekawanan seberataan. Lawas rasanya nah kada bekisahan di blog Female Blogger Banjarmasin. Nah, kali ini ulun handak bekisah tentang pengalaman bemalam di Pantai Batakan Baru. Amun urang Banjar pasti tahu lho lawan Pantai Batakan Baru ini?
Pantai Batakan ini lokasinya di Desa Panyipatan di Kabupaten Tanah Laut sana. Di Kabupaten Tanah Laut ni dasarnya wadahnya wisata pantai di Kalimantan Selatan. Amun bahari tu kita tahunya pantai Takisung lawan Batakan wahini sudah banyak pantai lain yang dibuka kaya Pantai Turki dan pantai lainnya.
Nah, jadi kisahnya waktu hari raya Idul Fitri semalam ulun sekeluargaan bejalanan ke Pantai Batakan. Total ada 13 urang nang tulakan. Ada yang bemobil bedempetan ada jua nang bekendaraan. Kami tulak pas hari raya kedua lebaran menurut pemerintah tu nah, pas banar lho gasan piknikan.
Mulai Banjar kami tulak sekitar jam 11. Amun hari normal ke Pantai Batakan tu biasanya 2-3 jam haja kalo lah. Nah, berhubung kami tulakan pas Hari Raya, jalanan liwar macetnya. Mulai dari muka desa Panyipatan tu mobil temandak mehadangi antrian masuk ke Pantai Batakan. Kanakan dalam mobil mulai munyak wan membawai turunan aja bejalan jar. Dikira parak sako bejalan mulai wadah macet ke pintu masuk Pantai tu.
Imbah meantri kurang lebih 3 jam akhirnya kami kawa masuk ke Pantai Batakan. Jadi imbah kami tulak jam 11 dari Banjar tu sekalinya hanyar sampai di pantainya jam setengah enam sore. Pas banar tu sambil mehadang sunset jadinya.
Untung sebelum tulak tu sudah memesan kamar di Pantai Batakan jadi imbah mobil diparkir kami langsung aja menuju penginapan yang dipesan tu. Andakannya kada jauh pang pada tepi pantai.
Bemalam di Pantai Batakan Baru
Amun handak mengunjungi Pantai Batakan Baru, setiap pengunjung harus menukar tiket seikung urang 5000. Nah, amun handak bemalam, kita kawa memesan kamar di dalam pantai harganya 250 ribu semalam. Di sepanjang pantai Batakan Baru ini bejejer tu pang wahini penginapannya ada yang penginapan haja ada jua yang lawan warungnya. Jadi kada pacangan kelaparan tu pang karena warungnya di muka kamar. Hehe.
Kamarnya nang ada di penginapan Pantai Batakan ni jujur halus banar pang kada kaya kamar hotel. Di kamar jua disediakan kipas angin wan tilam ukuran queen haja. Jadi paling muat beempat aja kamarnya ni. Nyamannya tu ya itu pang kawa guring nyaman dibanding guring betenda atau di mobil pas bemalam di pantai.
Di Pantai Batakan Baru ni sekalinya kalau malam ada pasarnya. Di sini banyak urang bejualan mulai dari baju, makanan, mainan, oleh-oleh lawan pastinya ada wahana bemainan kanakan. Jadi siap-siap membawa duit haja amun bejalanan di pasar di dalam pantai Batakan Baru.
Nah, di parak area pasar tu sekalinya ada juga tenda gasan glamping atau tenda mewah yang tarifnya sama kayak kamar di penginapan. Di tenda glamping ni sudah disediakan jua tilam lawan kipas angin sama kayak penginapan. Asik pang kayaknya nah amun bemalam di tenda glamping ni, campingnya dapat tapi tetap nyaman.
.jpeg)
Kegiatan di Pantai Batakan Baru
Ngarannya pantai pastinya kegiatan yang dilakukan kada jauh-jauh dari bekunyung lawan main banyu. Nah, imbah bemalam semalam paginya kanakan langsung bukah ke pantai gasan bekunyung. Amun belum bisa bekunyung kawa menyewa ban di pantai harganya 20 ribu kawa dipakai sepuasnya rasanya. Imbah itu ada juga kegiatan banana boat, naik motor ATV lawan naik kuda di pantai Batakan ni.
Nah bagi kekawanan yang muslim jua kada perlu khawatir di Pantai Batakan ni karena ada musalanya yang jua menyediakan mukena. Jadi kada usah bingung pas waktu salat tiba kawa ja langsung datang ke musala. Ada jua aula gasan bekumpulan lawan komunitas pas ada acara. Imbah tu ada jua taman bermain halus gasan kanakan main belungsuran di area pantai.
.jpeg)
.jpeg)
Sayangnya ada satu hal pang nah yang ulun kurang ketujui dari Pantai Batakan Baru ni. Sampahnya di mana-mana soalnya kdd disediakan wadah sampah gasan pengunjung. Padahal di Pantai Batakan ni urang ada yang bemalam, bemasak mie instan lawan bejualan pento pasti ada sampah plastiknya. Harusnya ada pang disediakan wadah sampah jadi kada tehambur di pantai itu sampah plastiknya.
Itu pang tadi kisah ulun bemalam di Pantai
Batakan. Semoga bemanfaat gasan kekawanan sekalian
***
Nang manulis: Antung @ ayanapunya.com
Nang manyunting: Ira @ irabooklover.com
Masyaallah, tulaknya siang banar dah hari tu jam 11, plus macet lagi ya. Aku biasanya kalo mantai berangkat pagi2 wkwkwk.. Auto eksotik habis dari batakan baru ya
BalasHapusAku paling suka ke pantai dulu ketika di Balikpapan, Kalimantan Timur. Ternyata di Kalsel juga ada pantai yang tidak kalah indahnya
BalasHapus