4 Cafe di Banjarmasin Nang Cocok Gasan Bagawian

Assalamualaikum, kayak apa habar pian sabarataan? Mudahan pian barataan sehat-sehatlah.

Ulun Ashya, nang beisi blog www.rizkyashya.com . Ulun handak batukar habar nah tentang café nang cocok banar gasan begawian di Banjarmasin. Siapa tau pian handak mencobai begawian di café, ulun bari rekomendasinya. Kalo pian panasaran jangan dilalui haja tulisan ulun nang ini lah.

Office Coffee

Ini café favorit ulun gasan begawi. Parak lawan kantor ulun, menunya lengkap mulai makanan barat sampai ringan, lawan colokannya banyak banar. Kalo ulun begawi disana, ulun pasti kada ingat diwaktu. Suah ulun bagawi dari jam 1 siang sampai 9 malam kada barasa karena tempatnya nyaman banar.

Nang mungkin minus dari café ini harganya larang banar, tapi asli nyaman rasa makanannya jadi ya kaya apa am lagi harga kada kawa didustai jar urang.

Alamat : Jalan M.T Haryono No 32, Banjarmasin

Instagram : @office.coffee.official

Harga : Rp 35.000,- sd Rp 100.000,-

Kawai Kofie

Nah, kalo café ini parak lawan kos ulun. Jadi kalo ulun sumpek banar dah bagawi di kos-an ulun meluncur ke Kawai Kofie. Café ini buka mulai isukan, jadi pas ulun handak bagawi sungsung ulun kawa ke café ini wan kawa dapat tempat bagus gasan begawi. Suasananya nyaman banar, lawan cafenya bungas jadi kawa befoto-foto.

Kadang café ini jadi wadah bakumpulan bubuhan motor atau komunitas, jadi lo kadang rame banar. Misalnya pian kada handak rame-rame, jangan pian ka café ini siang/sore takut piannya kada nyaman. Kalo pian pas bajalanan di Banjarmasin dan handak mencobai jangan lupa mamasan Chicken Grill Spinach, asli itu makanan kasuka-an ulun, nyaman banar.

Alamat : Adhyaksa, Sungai Miai, Banjarmasin

Instagram : @kawaikofie

Harga : Rp 35.000,- sd Rp 150.000,-

 

William Bakery

Kada usah batakun lagi, café ini terkenal banar roti lawan wadai-wadainya. Kakawanan ulun dari Banjarbaru ja sampai betitip-titip nukar roti disini soalnya jam 10 rotinya bisa habis tajual, kek rotinya limited kayak itu pang. Tapi kada usah khawatir kalo pian handak mampir ke café ini, selain roti mereka juga jual makanan berat kaya sphagetti, nasi, dll. Cuma ya kalo pian handak mencobai roti harus datang isukan banar.

Biasanya kalo kawan ulun bosen di kantor, kita istirahat melipir ke café ini gasan mencari suasana lawan inspirasi hanyar, kaya refreshing kayak titu nah. Tempat lawan lingkungannya asyik banar gasan begawi, syahdu kek itu pang. Dijamin ide lawan inspirasi kawa muncul kalo begawi disini

Alamat : Jalan Kacapiring III No 6, Banjarmasin

Instagram : @williambakery

Harga : Rp 35.000,- sd Rp 150.000,-

 

Café California

Meskipun café ini parak lawan pusat kota, cuma café ini jarang penuh jadi nyaman banget gasan begawian. Ulun jarang pang begawi disini karena jauh lawan kos ulun, tapi ulun pernah begawi disini nyaman banar. Apalagi kalo pilih duduk di balkon lantai dua,karena dudukannya menghadap jalan jadi ulun kawa sambil sesekali melihati orang-orang dan kendaraan lewat. Iya, ulun suka banar melihati aktivitas-aktivitas urang, kadang bisa dapat inspirasi dari bubuhan yang lewat-lewat itu.

Café ini kawa jua di reservasi gasan acara bridal shower ala-ala kayak itu nah, dekorasinya gratis, tapi ada minimal nukar makanannya sa-apa. Cuma ya lumayan lah kada usah nukar dekorasi. Oh ya, harga makanan disini tamurah daripada 3 café sebelumnya tadi.

Alamat : Jalan Kuripan No 11 A, Banjarmasin

Instagram : @cafecalifornia.id

Harga : Rp 35.000,- sd Rp 80.000,-

Nah nintu pang, tulisan ulun tentang 4 Café di Banjarmasin Nang Cocok Gasan Bagawian. Semoga tulisan ulun bermanfaat gasan pian berataan. Jangan lupa lah mampir ke blog ulun www.rizkyashya.com.

***

Nang manulis :  Ashya @ www.rizkyashya.com

Nang manyunting: Ira @ www.irabooklover.com