Langsung ke konten utama

4 Wisata Berkonsep Hutan di Banjarbaru

Assalamualaikum, selamat pagi, napa habar buhannya berataan. Ulun tahuai pian membaca artikel ini pasti karena penasaran wan judulnya kalo leh. Atawa dipaksa kah membaca artikel ngini karena saling sayangan lawan FBB, hehehe. Nah, langsung aja lah berhubung ulun handak mangisahkan wisata hutan di kota ulun nah, Banjarbaru.

1.    Taman Hutan Hujan Tropis Indonesia

Taman Hutan Hujan Tropis Indonesia (TH2TI) atau rajin disambat Tropical Rain Forest Miniature adalah salah satu hutan olahan di kota Banjarbaru nang bangunannya tepat di wilayah perkantoran Banjarbaru, jadi lokasinya parak lawan kantor Gubernur Kalimantan Selatan. Taman hutan ni luasnya 90 hektare, dibuka matan Februari 2020 gasan dikunjungi masyarakat wan turis gasan wisata di Banjarbaru. Pohon-pohonnya sudah kalihatan mulai ganal pang, hijau, maka asri banar jua.

Taman Hutan Hujan Tropis Indonesia (ruliretno.com)

TH2TI ngini di bangun sudah takonsep banar nang tujuannya gasan kasaimbangan alam di kota Banjarbaru. Dari 90 hektare ini nang sudah ditanami mencapai 58 Ha nang banyaknya ada 4 blok. Nah, dalamnya tuh macam-macam, jumlahnya aja ada 48.072 batang pohon, ulun gin takajut-kajut sebanyak itu te.

 Isinya tuh pohon matan berbagai endemik hutan hujan tropika dataran rendah, misalnya kelompok tanaman meranti, rimba campuran, jenis pohon unggulan lokal dan berbagai jenis tanaman langka penghasil buah di Kalsel.

Ulun himung banar membawa kekanakan kesana sambil balajar tentang hutan lawan macam-macam pohon. Maka ada jogging tracknya jua, tempatnya berasih, paling daun banaram behamburan nang gugur dari pohon, ada wc nya berasih, udaranya sejuk, nyaman banar gasan sabtu ahad ke sana-an. Ada gazebonya jua sadikit kawa tu makan siang ala-ala di saung ya kalo, hehehe. Nang balum kesini nah, cobai kaina.

2.    Hutan Pinus Banjarbaru

Mun ngini tuh orang banyak pang sudah tahu, karena sudah ada mulai bahari, hutan nang isinya pohon pinus berataan nih adanya di tangah kota. Tahulah pian lapangan murdjani, nah kada jauh dari situ, di kelurahan Mentaos, Banjarbaru Utara. Dulunya pina ngeri pang hutan kota ini nih, tapi wahini terawat sudah. Mun kesana rami membawa kekanakan. Kawa duduk-duduk di hamock, makan pentol dan jajanan lainnya jua.

Hutan Pinus Mentaos, banjarbaru (Banjarmasin Post)

Maka lokasinya kada ngalih dicari, tempatnya berasih haja, banyak daun lawan kembang pinus ja beguguran. Wc nya ada jua berasih haja, makanannya gin harganya biasa haja kada larang. Dulu tuh padahal ngini ni daerah percontohan gasan budidaya pinus, sekalinya wahini di Kelola pemerintah jadi objek wisata. Mun koler bepanas-panas bejauh-jauh bawai aja keluarga kesinian lah.

3.    Bangkal Forest

Bangkal forest nih wisata hanyar di Banjarbaru, tempatnya di cempaka, inya tuh model kaya kabun belakang rumah haja, tapi pang model kaya ada hutan-hutannya jadi model kaya kawa bakemah tu nah. 

Ada kemah nang halus gasan saurangan, gasan bekawan sampai nang ganal gasan sakaluarga. Mun kulir bakimah ada jua rumah halus model kaya villa, han lengkap kalo. Maka ada kolam renangnya jua, ada jua layanan makanan BBQ-nya. Masuknya gin murah Cuma 20 ribu haja, tapi mun bemalam bakemah lain lagi bayarannya beasa. Inya jadi dingarani forest olehnya banyak pohon-pohon ganal jadi rasa di hutan padahal kabun belakang haja.

Bangkal Forest (habarkalimantan)

Cocok gasan pian membawa kekanakan atau keluarga tapi koler jauh-jauh ke hutan dan cocok jua gasan yang waktu liburnya terbatas atawa dana yang terbatas. Cuma tulaknya aja pang agak jauh ke cempaka situ. Gasan beacara rami jua disitu misalnya gathering kantor, acara keluarga, atau acara perpisahan sekolah.

4.    Kebun Raya Banua

Kebun raya banua ini sudah lawas dah ada, kada tapi jauh matan taman hutan hujan tropis Indonesia tadi. Jadi kada jauh jua dari Gubernuran provinsi Kalsel. Mungkin ada nang taingat lawan kebun raya di Bogor, belum seasri itu pang suasananya kaya hutan, tapi pohon-pohonnya sudah lebih ganal kena pasti bakal bagus jua kaya kebun raya di Bogor.

Kebun Raya Banua (kebunrayabanua.kalselprov.go.id)

Kebun raya tu artinya kan Kawasan konservasi tumbuhan secara ex situ, ada beisi koleksi bermacam-macam tumbuhan nang terdokumentasi dan ditata sasuai lawan klasifikasi dan taksonomi, bioregion, tematik atau kombinasinya. Gunanya gasan pendidikan, wisata dan menjaga lingkungan.

Nah wisata di kabun raya banua ini ada taman Labirin, rami loh disana bisa sasat-sasat beramian tapuntal, hehehe. Ada jua rumah kaca, ada jua wahana main gasan kekanakan kaya dungsuran, ayunan, wan area hijau gasan babukahan. Lalu tanamannya jua banyak, dikumpulkan kalo. Misalnya lokasi khusus tanaman obat, ada Taman Bromelia, Gedung Herbanium sampai ke Plasa Utama. Pokoknya lengkap gasan wisata. Luasnya ganal banar yaitu 100 ha, dijamin uyuh bakuliling berataan.

Jadi itu tadi rekomendasi wisata bila handak ke Banjarbaru melihat wisata yang bakonsep hutan gasan membawa kaluarga. Sabujurnya tu mun jar urang tu banyak banar lagi wisata hutan di Banjarbaru ngini, mulai mandiangin, tahura, kiram, bukit batas, matang kaladana, napa-napakah mun dihitung sako ada 20 butingan, tapi ulun maingatakan lah, bahwa itu semua masuk wilayah kabupaten Banjar. Jadi mun dimasukakan ke wisata Banjarbaru tesalah am. Supan kalo masa urang lokal jar kada tahu lokasinya masuk kota mana. Mudahan buhan pian imbah ni kada tapuntal lagi melihat posisinya. Makasih lah sudah membaca sampai habis jangan kada ingat singgah ka Banjarbaru.

 ***

Nang manulis: Ruli @ www.ruliretno.com
Nang manyunting: Ira @ www.irabooklover.com

Komentar

  1. Diantara 4 wisata n ulun pernah ke Hutan Pinus ja nah. Mudahan kawa jua kaena ke 3 tempat wisata lainnya. Aamiin 🤲

    BalasHapus
  2. Sudah lawas pang belum ke KRB lagi, pinanya magin bebagus isinya dan makin rimbun. Kena pang kesana lagi nah, terakhir kesana sebelum pandemi pang

    BalasHapus
  3. Banjarmasin dan banjarbaru ini juga kaya akan objek wisata ya kak min. Saya udah lama banget gak ke Banjarbaru nih, semoga ada rejeki ke sana

    BalasHapus

Posting Komentar

Postingan populer dari blog ini

Tidak Kalah dengan Ibukota Provinsi, Ini 4 Kafe di Barabai yang Wajib Dikunjungi

Halo Kaka-Kaka bungas yang lagi membaca tulisan ini, mudahan sehat sabarataan lah. Kenalkan dulu nah, ulun Eca anggota FBB jua dan tulisan ini nih tulisan perdana ulun di Banjar Corner. Selamat membaca 🤗 Tau lah bubuhan pian di wadah ulun Barabai bisi 4 kafe nang kada kalah lawan di Banjarmasin? Han kada tau kalo, makanya bacai sampai tuntung lah. Barabai Hulu Sungai Tengah sabujurnya lain kota kelahiran ulun. Tapi, kayapa pun jua, ulun sudah lawas bagana di sana dan sudah tarasa jadi tanah kelahiran ulun saurang. Ulun mulai bagana di Barabai semenjak kelas 1 SMP. Waktu ulun masih sakulah itu, dasar balum ada nang ngarannya kafe nginih. Ulun lawan kakawanan dahulu bejalanan ke kedai atau depot haja. Nah, wahini lumayan banyak sudah cafe yang kawa dipakai hagan “feed” Instagram bubuhan pian. Ini nah yang menurut ulun musti pian kunjungi. 1. Hero Cafe Nah, kabalujuran banar ulun lawan anggota FBB nang lain suah bakumpulan di Hero Cafe ini mun pas handak betamuan. Di sini rami

Belajar Istilah Banjar

  Halo! Apa habar buhan pian sabarataan? Mudahan baik ajaa lah sabarataan, sehat selalu dan dijauhkan dari panyakit.   Nah kali ini ulun handak memadahkan beberapa istilah dalam bahasa Banjar yang mungkin banyak dari pian masih balum tahu karena kada tebiasa berbahasa banjar sehari-hari, atau hanyar aja pindah ke banjar. Oiya, ulun ingat banar bahari pas SD balajar bahasa Banjar muatan lokalnya, amun wahini masih jua kah kakanaan tahu di istilah ni?   Berikut beberapa istilah dalam bahasa Banjar:   1. Salesmaan   Salesma sabujurnya adalah ngaran virus yaitu virus salesma, yang begejala behingusan atau pilek. Nah rancak urang tetap menyambat salesmaan jua amun ada nang kena flu karena gejala si salesma lawan flu nih mirip yang nyata bahingusan lawan batukan.   2. Hawai   Hawai nang ini lain ngaran wilayah lah, hawai nang dimaksud di sini tu artinya semacam sunyi tu nah, misalnya urang tebiasa di kota lalu bejalanan ke desa pasti lain suasananya, tebiasa pina rami

Kisah Intingan wan Dayuhan

Halo sabarataan, batamuan pulang lawan ulun, Nisa. Kali ini, ulun handak mangisahakan kisah Intingan wan Dayuhan nang rajin tu selalu dikisahakan bila ulun handak guring waktu lagi halus dulu. Kisahnya ni turun temurun dari zaman datu, nini, mama, anak sidin, dan cucu sidin, bisa jua kaina sampai ka buyut sidin. Kisahnya nih rami, sampai taguring guring mandangari kisah ini ja, lucu pulang han. Bila pian suah mandangar kisah Intingan wan Dayuhan, bararti kita sama. Zaman bahari kadada pang yutube wan intirnit. Nang ada kisah dari muntung ka muntung ja. Nang kaya apa kisahnya, ni ulun kisahakan nah ka bagian pian sakira kada panasaran. Kisah Intingan wan Dayuhan  Zaman bahari ada dua ikung badua ba-ading nang bangaran Intingan wan Dayuhan. Kisahnya Intingan nang jadi kaka, Dayuhan ading nya. Ibarat kata, si Dayuhan nih inya orangnya kada tapi paham apa yang di padah-akan tu, atau bahasa kitanya, ada nang kurang kaitu nah. Ujar kisah si ading nih kada hakun sakulah, mac