Jangan Kada Ingat Marasai Laksa di Banjarmasin

Laksa, kuliner Banua nang kada asing...

Laksa sebujurnya lain hal nang asing bagi ‘urang Banjar’.  Meski jadi pertanyaan apakah Laksa ni kuliner khas Banjar ataukah lain tapi pas di Banua ada nang bajualan Laksa.  Biasanya kuliner nang disajikan kada Laksa haja.  Kawannya ada Surabi, Lupis, Puracit, Petah, jua Putu Mayang.  Amun mambaca ngaran-ngaran kuliner nitu pastinya kada asing kalo. 

Kenapa jadi kada asing karena mun palihat ti kada hanya disajikan di Banua haja, ya kalo.  Tapi amun sudah kada awam lagi ada di Banua apalagi nang baulah dan bajual adalah urang Banjar, jadi rasa sreg haja amun kuliner Laksa menjadi kuliner Banua.

Asal muasal laksa...

Ulun pun masih penasaran sabujurnya, matan mana gerang Laksa ini wan kaya apa inya bisa ka Banua. Sabujurnya amun malihat aktivitas urang-urang nang katuju berkelana termasuk nang baisi keahlian bemasak pastinya kada heran pang lah, wajar haja Laksa pun bisa sampai ka Banua.

Di Malaysia, Singapura, Thailand, wan Indonesia ternyata Laksa ada di negara-negara tersebut. Profesor Penny Van Esterik dalam buku sidin, Budaya Makanan di Asia Tenggara, bahwa Laksa dilahirkan karena ada Silk Road (Jalur Sutra).  Berarti melanglang buana bujur lah Laksa ni.  Jadi jangan heran jua bila tampilan saat disajikan nitu ti berbeda antara Laksa nang di Banua wan di wilayah lain.

Amun masalah wilayah, Wikipedia mengesahkan bahwa Laksa ini ada Laksa Kari nang ternyata ada di Malaysia, Thailand & Singapura. Ada jua Laksa Assam nang bisa kita dapati di Malaysia jua seperti daerah Ipoh, Kelantan, Johor, Pulau Pinang dan seterusnya. Amun Laksa Indonesia bisa kita dapati jua di beberapa daerah dan bahan kuahnya pun berbeda.  Contohnya Laksa Banjar kuahnya ni terasa banar iwak haruannya meski nang dijual awam pang ada iwaknya, tapi rasa kuahnya dasar terasa kaldu iwak haruan nih.  Amun dibandingakan wan Laksa Bogor dasar lain pang nah, karena Laksa Bogor ada oncomnya.  Jadi intinya jangan tekajut bila memesan Laksa dari daerah yang berbeda ternyata tampilannya beda wan Laksa nang ada di Banua.

Bahan gasan maulah laksa... 

Laksa ini bahan dasarnya diulah dari gelapung (tepung) beras. Ada pang urang nang menyambat Laksa ini mie tapi amun Laksa Banjar dibentuk mie tapi tebal imbah tu dibuat di wadah bulat.  Jadi bentuknya kaya nang di foto ini. Jadi bentuk Laksanya mienya kada memanjang tapi disajikan bulat & lepeh.

Saat ulun memakan Laksa nih dasar rasa kurang afdhol nah kedada lauknya.  Jadi bepasan ae gasan dibawa bulik.  Di rumah sudah siap hintalu ayam bejarang (kaina handak mencobai pang pakai hintalu hitik).  Caburakan ae hintalunya ti ka dalam kuah Laksa.  Beeuhh nyaman banar.  Tambahi jua sambalnya.  Asli dasar sedap banar Laksa nang padas wan baintalu ni.

Amun meumpatakan liur ni bisa jua tambahi iwak haruan (harau jadi kaingatan Katupat Kandangan am), pina nyaman jua pang nah.  Amun ayam atau daging asa lain pang nah.. parasa ulun tenyaman pakai hintalu atau iwak haruan.

Penutup...

Pian katuju bemasak, bisa ja tu mencobai memasak Laksa.  Amun ulun ni katuju praktisnya haja pang, karena ada haja nang bajual di Banua.  Kecuali handak menambahi lauknya tadi, mau ae meolah sorang di rumah.  Tapi amun ada nang bajual Katupat Kandangan hakun menjuali iwaknya haja nah kawa tu ditukari gasan lauk makan Laksa.

Pina taliur nah nang membaca tulisan ulun nih hehehe.  Tapi dasar nah, Laksa wahini jadi kuliner favorit ulun. Sedap banar tu pang judulnya.

***

Nang manulis: Mia @ www.ummvc.com

Nang manyunting: Ira @ www.irabooklover.com