Rekomendasi Wadah Parawatan Murah di Banjarmasin

Marawat awak mulai atas kapala sampai ka hujung batis nang paling ulun sarankan pian datangi di Banjarmasin

***

Assalamualaikum,

Masih awal tahun kalo ini walau sudah akhir bulan tapi masih ada ai sako duit buhan pian ya lo gasan marawat awak atau akhir bulan kaini sudah ada yang gajihan jua nah biasanya, ya lho? 😂 Ulun handak memadahi buhan pian wadah gasan parawatan awak mulai atas sampai bawah supaya kita tahun 2022 ini "glowing say" jer urang wahini tuh.

Ulun wayahini masih di Bandung. Ulun rasa ngalih mancari wadah parawatan di sini karena marasa wadah hanyar lho jadi masih bingung lawan kada tahu nang mana nang sasuai kantong atau nang mana ada nan murah manurut ulun. Nah makanya itu ulun manulis-akan nang ini wadah parawatan nang murah di Banjarmasin. Sakira tahu di mana nang murah gasan buhan pian atawa gasan urang nang hanyar datang ka Banjarmasin.

Sabujurnya ulun balum pang mancari-i di google jua nang di Bandung nih dimana yang sesuai kantong wan harganya murah 😅 soalnya ulun wayahini lain di kotanya bujur pang nih, di kabupatennya jua mun di Banjar tuh di Gambut kalo lah, kada jauh pang pada kota tapi disini nih jalannya asa ngari manurut ulun jadi pina koler mancari kulik-kulik wadah parawatan jua. 

Ulun kambali ka panderaan awal tadi nang handak mamadahi wadah parawatan murah di Banjarmasin lah, yang jalas kada tapi menguras kantong talalu banyak atawa harganya murah dibandingkan wadah nang lainnya. 

Nah, wadah parawatan murah di Banjarmasin nang mulai ujung kapala ka ujung batis, yaitu :

DM Salon & Clinic

Lokasinya nih di jalan nang rami lawan baparakan lawan sakulahan wan wadah kuliah, jadi rame ai matan dahulu asa ulun karena jadi populer di kalangan buhan sakolahan lawan anak kuliahan tadih. Ulun tahu wadahnya ini dari SMP am karena awalannya smoothing rambut di sini lawan kaka ulun. 

DM salon & clinic ini nih lengkap banar pang wahini gasan parawatan mulai dari gasan rambut, muha, awak, kuku, sabarataan-ai asaan ada di sini jua tapi jer ulun paling rekomendasi gasan parawatan awaknya tarutama luluran di sini, nyaman banar pang mana murah lagi. 

Harga parawatan awak tuh sudah sepaket inya tuh mulai dari lulur awak lho abis itu di bleaching awak terakhir di masker awak, itu haraganya 80 ribu haja, hon murah lho.

Mun perawatan rambut ulun suah smoothing itu bedua kaka harganya 500 ribu jadi sorangan tuh 250 haja, labih murah daripada tempat lain asaan ulun nih mana hasilnya bagus pian tapi tagantung nang manggawi jua pang pulang soalnya banyak banar pegawainya di sini.

Suah jua ulun creambath di sini, tapi dahulu tuh yang sepaket lawan perawatan awak. Ini nyaman banar jua kepala tapi ulun kada tau harganya mun bayar creambathnya wara. Bisa-ao buhan pian cek Instagram-nya sorangan kalo lah. Cari haja sesuai namanya nih, ada aja muncul. 

Alamat : Jl. Sultan Adam No.79 - 80, Sungai Miai, Kec. Banjarmasin Utara, Kota Banjarmasin, Kalimantan Selatan 70122.

Glasy Nail

Nah, sekarang kita ke perawatan kuku lah. Siapa nang katuju bakutek kayak ulun lawan kawan-kawan. Wajib tuh pang tahu tempat murah nih. Tapi asa ngalih am lokasinya nih dicari karena asa banyak belokan kaitu mana asaan kadada plang namanya waktu itu, tahu am wahini, sako ada-ai kalo soalnya inya nih kaya rumah biasa aja am asa ulun lah. 

Alamat : Jl. Pembina IV D No.15, Sungai Lulut, Kec. Banjarmasin Tim., Kota Banjarmasin, Kalimantan Selatan 70653. 

Sasuai lawan namanya lah di sini gasan nail art jadi nang katuju kukunya digambar-gambar lucu, wajib am mencobai buhan pian. Kuteknya halal disini. Ulun pas nail art disini minta gambar wadai lawan es krim kaitu di kuku, asli hasilnya bagus banar am, langsung katuju lawan hasilnya. Amun kada salah ingat harganya 80 ribu aja rasanya gasan kuku ulun tuh. 

Pas ulun ka sini waktu itu balum ada gasan parawatan kuku nang ngarannya menicure-pedicure tapi pas wahini sudah ada jer kawan ulun. Kena am ka sini lagi mun bulik dari Bandung. Hehe.

Junjung Buih Beauty 

Nang buhan pian uyuh bagawi, awak asaan kada nyaman karena kauyuhan, bisa banar ka wadah ini nang ngarannyaJunjung Buih Beauty. Lokasinya nyaman am dicari karena di pinggir jalan wan ganal ngrannya lawan wadahnya. 

Alamat : Jl. P. Antasari, Pekapuran Laut, Kec. Banjarmasin Tengah, Kota Banjarmasin, Kalimantan Selatan 70234.

Bepijat disini nih bekamar masing-masing jadi aman kesan privasi jer urang tuh. Sekamar sorangan dengan seikung tukang pijatnya. Di sini bisa minta pas dipijat tuh bisa minta gancangi bisa jua minta kada tapi gancang. Kisaran bepijat disini nih 100 ribu rasanya nah. 

Disini tuh kada gasan beurut ja pang kawa gasan luluran jua, ada paketannya. Ada jua gasan parawatan rambut. Ulun suah am dahulu rasanya potong rambut lawan smoothing rambut disini tapi talarang daripada DM Salon & Clinic yang jer ulun tadi. Nang pasti ulun rekomendasi-akan gasan bepijat tadi pang di sini karena nyaman. 

Hafabi

Sabujurnya ulun balum suah ka sini, tapi orang rame am ka sini gasan balulur karena murah di sini luluran daripada dimana-mana, harga kanakan sekolah. Mun kada salah lihat am waktu itu kisaran 50an aja disini balulurnya, tamurah lagi daripada DM Salon & Clinic tadi tapi kada tahu am ulun nyaman kadanya lah. Yang jelas disini pakai lulur banjar inya. 

Ading ulun nang katuju kasini tapi kada gasan luluran inya, tapi gasan creambath rambut. Jernya murah lawan nyaman disini. 

Hafabi nih banyak cabangnya di Banjarmasin. Ada 7 apa 8 cabang rasanya jadi bisa tinggal pilih handak nang dimana. Kaina ulun mencobai ai bila bulik ke Banjarmasin. 😅

Alamat : JL. S. Parman, Gang Purnama Rt. 25, Kertak Baru Ilir, Kec. Banjarmasin Tengah, Kota Banjarmasin, Kalimantan Selatan 70123.

Natasha Skincare

Ulun sudah mencobai beberapa klinik kecantikan gasan parawatan muha tapi masih tatap katuju lawan Natasha nih pang dibandingkan lawan nang lain karena disini nih sakali harga langsung lengkap kaitu perawatannya namun nang dilain tuh dipisah-pisahnya harganya lalu kaliatan murah padahal mun digabung asa larang perasaan ulun am dibanding disini. 

Sudah tahu jua kalo buhan pian mun Natasha nih ada dimana-mana am jadi walau buhan pian pindah kota kah kemana kah kadada masalah, tatap-ai kawa perawatan disini karena data kita tetap ada. 

Ulun paling katuju parawatan chemical peeling pang disini karena cocok di muha ulun. Pernah parawatan nang lainnya asa kada tapi cocok. Jadi cocok an am lah namanya wadah parawatan nih nang kaya skincare jua toh. 

Disini tuh biaya facial-nya 100an aja sudah lengkap lah semuanya, mun chemical peeling nang jer ulun 250ribuan tapi jer bahasa inggris nya tuh worth it haja daripada nukar skincare sabiji tapi kada keliatan hasilnya.

Alamat : Jl. A. Yani, Pemurus Dalam, South Banjarmasin, Banjarmasin City, South Kalimantan 70234.

***

Nah, itu pang nang wadah parawatan nang ulun rekomendasi akan gasan buhan pian cobai gasan parawatan mulai ujung rambut sampai ka ujung batis. 😂 Mudahan cocok pas mancubainya lah.

***

Nang manulis: Rima @ www.rima-angel.com

Nang manyunting: Ira @ www.irabooklover.com