Jaruk Tigaron, Kimchinya Orang Banjar

 

Bubuhan ikam nang ketuju banar lawan drama korea pasti tahu banar sudah lawan kimchi, Iya kalo?

 

Beh, nang pina kenyamanan dilihati. Apalagi mun oppa kesayangan nang mamakan. Lalu ja timbul rasa handak beolah sorang. Kapasar manukar sawi putih, mengacaki lawan bubuk lombok. Ham, padih lah tangan? Haha

 

Suah ai sudah beimajinasi meolah kimchi. Tapi sadar diri haja sorang ni liur banjar. Mun kada temakan daur kena gawi.. 😂

 

Jadi am sorang memakan kimchi ala urang banjar ja. Tahulah napa?

 

Tahulah Sudah Lawan Jaruk Tigarun?

 

Nah urang banjar tapi kada tahu lah lawan tigarun?

 

Beh, kada gaol piyan tuh.

 

Sini ulun bawa bajalanan. Kepasaran kita nah. Pasar mana handak?

 

Mun lagi musim banyak urang bajual jaruk tigarun nih. Hampir dimana-mana ada haja.

 

Handak tahu tigarun tuh spesies napa lah?

 

Itu tuh kambang. Nah, kambangnya nih mun sudah mekar diputik imbah itu dijaruk. Tahulah lawan arti dijaruk?

 

Mun ujar oppa tuh ngarannya difermentasi. Ham, supaya awit. Inilah ngarannya kimchinya urang banjarmasin. Jadi banjar tuh kada terkenal lawan wadi pakasam haja lah. Ada kimchinya jua, tigarun ngarannya.

 

Kayapa Cara Beolah Jaruk Tigarun

 

Jadi kayapa beolah kimchinya urang banjar nih? Perlu kah kita nukar bubuk cabai, menumbuk ebi sambil menambahi dauh bawang jua?

 

Kada usah, beh liwar nyamannya kalinya meolahnya nih. Bemodal uyah wara. Lawan mantra sadikit lah. Bebismillah ujar urang tuh.

 

Pertama tu bunganya nih dibasuh. Imbah itu dirandam banyu hangat. Ingatakan hangat lah. Jangan jua banyu hanyar manggurak. Masak lunyut kena.

 

Imbah dirandam didiam akan ai sampai beberapa hari. Sampai takaluar warna habang dibanyunya. Ham, nyaman banar kalo. Kanakan gin bisa meulah. Makin nyaman dirandam, rasanya makin nyaman jua.

 

Mun handak mamakan, bubuhi uyah. Handak nyaman lagi buati vetsin. Nyaman tahulah. Model kriuk-kriuk tuh rasanya.

 

Nang Cocok Dimakan Duet Lawan Jaruk Tigarun

 

Makannya nih lawan nasi putih ja lah?

 

Ya kada seengken itu jua pang. Keengkenan ngarannya mun kada beiwak.

 

Paling kada dikawani lawan iwak karing kah. Modal iwak sapat gin tenyaman jua sedikit. Handak tenyaman iwak karing telang. Atau intalu masin kah nyaman jua.

 

Tapi piyan handak tahu lah nang paling nyaman lagi?

 

Olahakan iwak bepanggang. Barang ja iwak haruan kah, papuyu kah, atau peda kah. Nyaman lagi mun bepanggang di bara pang.

 

Nah, imbah itu beolah acan. Acan masak kah, acan mantah kah. Inya macam-macam resep acan urang tuh.

 

Sajiakan ai ketiganya.

 

Beh, mintuha lewat kada tetahu tu pang. Kada betawaran saking kenyamanannya. Ham, begayaan lah..😂

 

Uuuy, barapa harganya jaruk tigarun?

 

Murah haja, sebungkus harganya 5 ribu. Isinya dua ikat tuh, kawa gasan 2 kali makan. Tapi mun lagi kada musim harganya larang am, bisa 2 kali lipat.

 

Mun handak marasai manukar sebungkus haja dulu. Inya ada nang cucuk liurnya, ada jua nang kada.

 

Tapi mun handak murah lagi batanam sorang ai bunganya. Ham, kawa gasan dijual di pasar siring. Jadi duit. Wkwk.

 

Aja, sudah dulu gin lah. Mun kacar langsung aja cuss nukar ka pasar. Berelaan berataan.

 

 Nang Manulis: Aswinda Utari