Langsung ke konten utama

Belajar Istilah Banjar

belajar istilah banjar 

Halo! Apa habar buhan pian sabarataan? Mudahan baik ajaa lah sabarataan, sehat selalu dan dijauhkan dari panyakit.

 

Nah kali ini ulun handak memadahkan beberapa istilah dalam bahasa Banjar yang mungkin banyak dari pian masih balum tahu karena kada tebiasa berbahasa banjar sehari-hari, atau hanyar aja pindah ke banjar. Oiya, ulun ingat banar bahari pas SD balajar bahasa Banjar muatan lokalnya, amun wahini masih jua kah kakanaan tahu di istilah ni?

 

Berikut beberapa istilah dalam bahasa Banjar:

 

1. Salesmaan

 

Salesma sabujurnya adalah ngaran virus yaitu virus salesma, yang begejala behingusan atau pilek. Nah rancak urang tetap menyambat salesmaan jua amun ada nang kena flu karena gejala si salesma lawan flu nih mirip yang nyata bahingusan lawan batukan.

 

2. Hawai

 

Hawai nang ini lain ngaran wilayah lah, hawai nang dimaksud di sini tu artinya semacam sunyi tu nah, misalnya urang tebiasa di kota lalu bejalanan ke desa pasti lain suasananya, tebiasa pina rami lalu pina sunyi kada tapi banyak urang tu hawai.

 

3. Tepelecok

 

Tepelecok ni rasanya kada nyaman lalu, lawan supan-supannya pang biasanya tuh munnya sampai tegugur. Bahasa Indonesianya kalau kada salah tu terkilir, tepelecok tu engkel batis kita tu nah tiba-tiba te ke dalam pas kitalagi bejalan, bahari ulun tekutan banar mun lagi makai heels tu tepelecok karena memang rancak banar pas be heels ulun ni tepelecok hahaha.

 

4. Tetilantang

 

Nah kalau tepelecok tu bisa gugur bisa kada amun kawa menahani, tetilantang tu bujuran tegugur, jadi tegugurnya ke belakang dan posisinya telentang,makanya istilahnya tetilantang.

 

Istilah gugur dalam bahasa banjar nih macam-macam kaya bahasa sunda jua toh, ada tejungkang = gugur ke belakang dari posisi tinggi, tejerungkup = gugur ke muka, biasanya muha bedahulu gugurnya

 

5. Sahibar

 

Kalau sahibar pang ada yang tahu lah apa artinya? Sahibar tu artinya sekedar.

 

6. Tehantup

 

Biasanya urang menyambat kejedot atau bahasa Indonesianya terbentur, jujur nah lah ulun sampai googling karena kada ingat apa bahasa bakunya kejedot hahaha. Jadi tehantup itu terbentur yaa kekawanan.

 

Contoh katanya "aku tehantup lawang" yang artinya "aku terbentur pintu"

 

7. Tawing

 

Amun tawing ni pang ada yang tahu laah apa artinya, tawing tu artinya dinding. Jarang pang wahini sudah nang manyambat tawing, jadi mun pian baluman tahu, tawing tu sama dengan dinding lah.

 

8. Tesilahu

 

"kalopina anak tesilahu, lakasi bawa baurut" biasanya kalau kekanakan pina panas awak pasti disuruh urang tuha beurut, kalopina tesilahu jar. Apa gerang tesilahu tuh? Tesilahu artinya keseleo.

 

9. Jihing-jihing / tekujihing


Siapa yang asing lawang kata ini? Biasanya nang lagi jatuh cinta tu pasti rancak Jihing-jihing ni, alias lagi ketuju senyum-senyum sendiri. Jadi arti dari Jihing-jihing itu adalah senyum-senyum sendiri yaaa.

 

10. Galai

 

Galaai? Apaan tuh? Apakah artinya geli? Galai tu artinya lambat say ai, jadi begawian tu nah lambat banar nang kaya siput kada kawa ancap.

 

Nahh itu tadi beberapa istilah dalam bahasa banjar atau Kosa Kata dalam bahasa banjar sehari-hari. Mudahan bisa membantu pian nang bingung dengan beberapa kata di atas, mohon maaf lah ulun kada kawa banyak-banyak memadahiakan, kena akun kebanyakan ngaran webnya lain Female Blogger lagi, tapi jadi kamus bahasa banjar hehehe.

 

 Nang Manulis: Lidya

Komentar

  1. Amun pian-pian ka pahuluan cara manyambatnya talain sadikit lah. Mun di wadah ulun di Amuntai, manyambatnya kata-katanya nih salismaan, tapalicuk, tatilantang, tahangkup, tasilahu lawan takujihing, ehehehe

    BalasHapus
  2. Tahantak, tajuramba, bakuling, puruk/mamuruk/tapuruk , wah banyak masih sebenarnya kosa kata Bahasa Banjar ni tapi kadang kada tapi hapal jua sorang nah.

    BalasHapus
  3. yang sahibar hanyar tahu nah. rasa kada pernah mendangar urang tuha menyambat itu

    BalasHapus
  4. kwkwkkkw aku rancak disambat galai kalo bagaian alias lelet banar hahaha

    sahibar hanyar mandangar jua nah

    BalasHapus
  5. Duh Eny Hawai banar nah handak bejalanan wkwkwk bahasa yg jarang dipakai tapi Eny paham artinya hahaa

    BalasHapus
  6. Bahasa banjar nih lucu lucu. Apalgi banyak banar bahasa yang belum atau bisa kada ingt makna nya haha

    BalasHapus

Posting Komentar

Postingan populer dari blog ini

Tidak Kalah dengan Ibukota Provinsi, Ini 4 Kafe di Barabai yang Wajib Dikunjungi

Halo Kaka-Kaka bungas yang lagi membaca tulisan ini, mudahan sehat sabarataan lah. Kenalkan dulu nah, ulun Eca anggota FBB jua dan tulisan ini nih tulisan perdana ulun di Banjar Corner. Selamat membaca 🤗 Tau lah bubuhan pian di wadah ulun Barabai bisi 4 kafe nang kada kalah lawan di Banjarmasin? Han kada tau kalo, makanya bacai sampai tuntung lah. Barabai Hulu Sungai Tengah sabujurnya lain kota kelahiran ulun. Tapi, kayapa pun jua, ulun sudah lawas bagana di sana dan sudah tarasa jadi tanah kelahiran ulun saurang. Ulun mulai bagana di Barabai semenjak kelas 1 SMP. Waktu ulun masih sakulah itu, dasar balum ada nang ngarannya kafe nginih. Ulun lawan kakawanan dahulu bejalanan ke kedai atau depot haja. Nah, wahini lumayan banyak sudah cafe yang kawa dipakai hagan “feed” Instagram bubuhan pian. Ini nah yang menurut ulun musti pian kunjungi. 1. Hero Cafe Nah, kabalujuran banar ulun lawan anggota FBB nang lain suah bakumpulan di Hero Cafe ini mun pas handak betamuan. Di sini rami

Bajukung di Atas Rawa

jejakrekam.com Di Kalimantan Selatan daerah pahuluan selain gunung dan sungai jua ada daerah rawa. Terutama di 3 kabupaten hulu sungai selatan, tengah, dan utara tergabung 3 daerah rawa.Nah di rawa ngini kadakawa pakai alat angkutan nang ganal jadi harus pakai jukung nang ramping supaya muat lawan kada santuk lawan di bagian bawah bila kamarau pas banyu surut. Jadi di awal bulan Juni samalam ulun sawat mancobai bejukung di rawa ngini. Tepatnya di daerah perbatasan antara hulu sungai tengah dan hulu sungai utara. Di permukaan rawanya hibak lawan tumbuhan banyu. Jadi jukung tu harus mambuka jalan dahulu. Bila takana rumputnya nang jadi sarang nyamuk benyamuk tunpang disangati nang di atas jukung. Makanya paman-paman nang mambawa jukung besangu obat nyamuk. Kada tahan jua obat nyamuk saking banyaknya nyamuknya. Oya, jukung ni dipakai gasan alat pengawasan kelompok pencari iwak. Rata-rata di sini mata pencaharian orang mencari iwak tarus pang. Tapi takana ada nang menyalahi aturan yaitu ma

8 Macam Wadai Banjar

Assalamualaikum, Dangsanak berataan. Kayapa habarnya nih? Mudah-mudahan sihat berataanlah. Aamiin.  Hari ini ulun handak menyambatakan ngaran-ngaran wadai khas urang Banjar. Banyak banar macamnya, tapi nang ulun kisahakan hari ini 8 buting haja. Amun handak sebarataan, dua hari dua malam kada tuntung kita bekisahan. 1. Wadai Lapis sumber : http://dapurummumusasyi.blogspot.com/2013/10/kue-lapis-kakao.html Wadai nang pemulaan ngarannya wadai lapis. Kamiran atawa adonannya biasanya diulah dua warna, imbah itu disumap salapis-salapis beliung-liung warnanya. Bila sudah pina karas salapis, hanyar dindaki lapisan di atasnya pulang. Harus sabar pang tu pang meulah wadai lapis ngini. Warna nang paling rancak diulah tu hijau putih atau cuklat putih. Meulah wadai lapis ngini biasanya di dalam cipir ganal nang dimasukakan ka dalam panci badandangan. Bila sudah masak kaina hanyar dihiris halus-halus sasuai salira. 2. Lumba Sumber : http://beritainfo.web.id/ Lumba ni tamasu