• Abah Guru Sakumpul, Ulama Banua Nang Kuat Maingkut Syariat

     


     

    Bulan Rajab bulan yang istimewa bagi umat Islam. Selain ada peristiwa isra mi'raj bagi urang Banua ada peristiwa lain nang selalu diganang. Yaitu meninggalnya ulama besar ar-razi Kalimantan Selatan.

     

    Kada urang Banua haja tapi hampir saluruh Indonesia bahkan ada nang matan luar negeri badatangan ka Martapura setiap bulan Rajab. Sabarataan bakumpul gasan menghadiri haul Abah Guru Sekumpul. Bila parahatan bahaul Abah Guru, manusia nang kaya samut di Martapura. Hibak. Sasak jalanan kada kawa lewat.

     

    Siapa garang Sidin nih jadi mahibak urang mendatangi. Pasti buhan pian kada asing lagi lawan Sidin tapi kada salahnya di sini ulun mengisahkan pulang sabahagian dari riwayat hidup sidin nang luar biasa.

     

    Ngaran asli sidin Kyai Haji Muhammad Zaini  bin Abdul Ghani. Tapi sidin rancak dikiyau lawan galaran Guru Ijai atau Guru Sakumpul. Ngaran abah sidin Abdul Ghani bin Abdul Manaf bin Muhammad Seman. Uma sidin Haji Masliah binti Haji Mulya bin Muhyiddin.

     

    Abah Guru Sakumpul ini dasar sudah alim matan di halus. Sidin sudah hafal Al-Qur'an pas baumur 7 tahun. Hafal Kitab Syarah Jalalain umur 9 tahun. Dasar luar biasa. Matan di halus jua Sidin ini cinta banar lawan ulama. Menurut riwayat, sidin ini lagi halus katuju banar menunggui al-Alim al-Fadhil Syekh Zainal Ilmi nang handak tulak ka banjar di muka kartak. Dihadangi sidin sekadar gasan basa hasaman lawan mencium tangan sidin. Uma dasar bagus banar akhlak Sidin matan di halus.

     

    Abah Guru Hidup di Keluarga Sederhana nang Taat Syariat

     

    Keluarga Sidin bahari lain urang baduit. Tapi bagi Abah mama sidin kada masalah, tatap Kawa mandidik anak jadi urang bailmu. Buhan sidin tabiasa makan nasi sabungkus lawan hintalu sabigi dibagi Ampat. Abah Uma sidin, sidin wan ading beninian sidin. Tapi kada suah mangaluh sedikit-dikit.

     

    Manurut kisah, Abah sidin bahari baisi warung minum. Sakira sisa banyu teh urang kada tabuang sidin minta izin lawan nang manukari sakura sisa banyu tehnya diminta sidin gasan keluarga. Tamasuk gasan gasan Abah guru sekumpul.

     

    Artinya tuh lah kuitan sidin ini luar biasa bajaga banar apa nang masuk ke parut anak. Biar hidup kada tapi ada, tatap Nang dimakan minum harus nang halal. Pelajaran gasan kita jangan sampai tabari makani anak nang kada baik  zatnya atawa cara mendapatinya.

     

    Ulama Nang Sakaligus Pangusaha

     

    Abah sidin malajari Sidin bausaha mulai Sidin kakanak. Akhirnya sidin pun jadi ulama nang sekaligus pengusaha Nang luar biasa. Hebatnya usaha sidin sampai wayah ini sidin sudah kadada lawas usaha sidin masih lancar dan maju. Mun bagi ulun hebatnya sidin ini sibuknya bausaha kada maulah sidin lupa lawan Allah Ta'ala. Pengajian tatap diutamakan sidin padahal sidin jua pasti harus maurusi usaha sidin.

     

    Tapi tabukti bahwa kasibukan sidin dalam menolong agama Allah kada maulah bisnis sidin surut. Malah sasain rami hari ka hari. Bedanya lawan kita wayahini bila usaha pina rami lalu bakurang aja ibadah lawan menuntut ilmunya. Mudahan kita jua kawa maumpati sidin. Kawa mautamaakan akhirat daripada dunia.

     

    Abah Guru Mahatiakan Banar Masalah Interaksi dan Aurat

     

    Parahatan hidup sidin sangat menjaga interaksi lawan Bu buhan babinian. Menurut riwayat nang Ulun dapati sua pas Sidin masih bujang mengisi pengajian di Keraton. Tiba-tiba ada Nang rubuh dan kayu patah sakalinya suara tirai pembatas langgar rubuh gegara bubuhan bebinian baturuyuk di situ handak maintipakan. (Sumber: FB Santri Hadramaut, 27/7/2016). Artinya matan bahari sidin bila maisi pangajian pasti terpisah lakian lawab binian.

     

    Sama jua lawan usaha sidin baik usaha kuliner atawa usaha baju-baju muslim kadada karyawan sidin nang babinian. Sabarataan lakian, mungkin sakira aman batajak di tangah urang banyak.

     

    Bujur-bujur ulama nang kuat maingkut syariat sidin ini. Makanya am wajar haja bila panduduk bumi ikhtirom lawan sidin Barakat amalan sidin nang memang patut banar jadi taladan.

     

    Sabuting lagi nang kawa ulun kisahakan di sini takait Abah Guru Sakumpul Rahimahullah. Sidin ini urangnya panggaya jua tapi bagayanya sidin kada suah malalain. Tatap kada kaluar pada syariat Allah Ta'ala.

     

    Dalam salah satu caramah sidin, sidin suah bapasan supaya kita kada tatipu lawan nang aneh-aneh. Jar sidin nang ngaran karamah itu anugrah dari Allah Ta'ala. Jadi jangan handak baniat dapat karamah dengan manggawi ibadah atau wiridan-wiridan haja. Jar sidin karamah nang paling harat tu adalah Istiqomah di jalan Allah.

     

    "Mun ada urang bakaku saurang, baisian karamah tapi sambahyangnya kada mangaruan itu lain bakaramah, tapi bakarmi (penyakit cacingan di anus)"

     

    Di lain waktu sidin suah juga bagaya lawan jamaah. Jar sidin tabilanya kena aku wafat, kantor, sakulahan dan madrasah samuaan diliburakan. Asalkan aku maninggalnya hari Minggu. Jamaah langsung tatawaan mandangar ujung kalimat sidin. Hebatnya sidin mancairakan suasana, bagaya tapi kada sama sekali tabuat dusta dan pandiran nang carubu. Banyak urang wahini bagaya tapi kada mahatiakan agama. Ya badusta lah, mahina agama lah, atawa bapandir nang cabul-cabul. Bila ditagur alasannya bagaya. Padahal handak bagaya kah, apalagi kada bagaya, dusta, cabul dan mahina agam tu tatap kada bulih digawi.

     

    Parahatan Abah Guru Wafat

     

    Sidin sawat dirawat di Rumah Sakit Mount Elizabeth di Singapura 10 hari. Tanggal 9 Agustus  2005 (Selasa Malam) sidin hampai di Bandara Syamsuddin Noor Banjarbaru. Rabu 10 Agustus akhirnya habar nang manyakitkan hati warga Banua itu tasiar jua ka mana-mana.

     

    Apa nang suah sidin gaya akan itu bujuran kajadian. Kantor-kantor pamarintahan kada tapi jalan hari itu. Tuku-tuku di pasar gin kadada bamanusia. Sabarataan takumpul di Sakumpul. Musola Ar-Raudah wadah kadiaman sidin hibak, kajal manusia. Asing-asingnya handak umpat malapasakan wafatnya ulama mulia Banua Nang luar biasa.

     

    Belasan Tahun Beliau Tiada, Ajaran Sidin Masih Ada

     

    Manuntung. Saking kuatnya sidin maingkut syariat sampai sidin kadada lagi, masalah hukum syariat ini masih tajaga. Salah satunya di kubah sidin itu WC nya liwar barasih. Tapisah bujur lakian lawan binian. Batutup rapat kada bataha kaliatan aurat mun pas baudu. Lawan ada lamari tapih baastilah diandaki. Tabilanya ada bebinian nang ziarah mamakai salawar ada patugasnya nang maingatiakan sakira mamakai tapih. Karena tumat bahari sidin rancak manyampaikan bahwa babinian itu kada bulih manyarupai lalaki, basalawar.

     

    Selain itu panulis suah jua pas handak mencari wadah gasan baacaraan. Bajajanak di AZ Sakumpul, kada talihat ruangan nang kawa disiwa. Luas tapi barataan tabuka. Mbah tu batakun ai lawan panjaganya. Masihkah di AZ Banjarbaru ada ruangan nang batutup nang kawa disiwa. Ujar karyawan Sidin, "kadada lagi Bu ai, Apang mbah anu dipakai urang gasan banyanyanyian, Abah guru kada katuju Nang kaya itu lalu dibongkar Bu ai ruangannya."

     

    Masya Allah luar biasa sidin ini kada lalu takutan usaha sepi. Yang panting bagi sidin kaya apa caranya parinsip Islam tatap dijalanakan. Kada kaya kabanyakan pangusaha wayah ini kada tapi mahatiakan halal haram, baik wan kadanya. Nang panting umsit banyak.

     

    Sampai di sini dulu nang kawa ulun kisahakan. Satitik ilmu dan kebaikan dari samudra ilmu dan kebaikan nang sidin pernah cuntuhakan. Mudahan kita kawa maumpati samuaan teladan baik sidin. Karna hakikat cinta adalah maumpati apa nang digawi ulih urang nang kita cintai. Jangan bakaku cinta ulama mun kada mau manggawi apa nang sidin amalakan. Jangan bakaku cinta agama bila apa ajaran agama kada kita hirauwakan. Mudahan tulisan ini kawa jadi panambah samangat kita untuk taat lawan syariat Allah SWT. Aamiin. [Umi Diwanti]

     

     

  • 8 komentar:

    1. Aamin...mudahan kita sabarataan jadi umat nang batambah taat imbah tahu kisah hidup abah guru sekumpul ini

      BalasHapus
    2. Sidin kaya masih hidup haja lagi, ajaran sidin masih banyak diamalakan dan kubah sidin rami tarus kada baampihan urang datangan.

      BalasHapus
    3. Masya Allah Abah Guru Sakumpul ini ilmunya tetap dikaji dan diamalakan ulih masyarakat. Amun jarku, sidin ne memang sosok yang tak tergantikan sebagai ulama Banua.

      BalasHapus
    4. Luar biasa karomah sidin ni lah. tiap haul sidin hibak tarus jamaahnya. tapi tahun ini pinanya kdd acara haul sidinlah

      BalasHapus
    5. Mudahan kita kawa maamalakan barataan kabaikan nang kaya Abah guru gawi salawas hidup.

      BalasHapus
    6. Mudahan kota berataan urang banua kawa tunggal gamatan meamalakan gawian sidin nang baik2. Ulama nang luar biasa koramahnya. Luar biasa baiknya.

      BalasHapus
    7. Beruntunglah banua kita punya ulama yang sangat pantas menjadi teladan dan sangat di hormati semua masyarakat.

      BalasHapus
    8. Kangennya ke kubah guru sekumpul lawas banar kada kesana ih ziarah sekeluarga

      BalasHapus