5 Nang Penting Disiapkan Bila Banjir Datang (Lagi)

 

Photo by Jéan Béller on Unsplash

Assalamualaikum warahmatullahi wabarakatuh. Apa habar buhan pian? Mudahan baik, sehat selamat kada kurang apapun. 

 

Asa masih sigar banar di ingatan beberapa minggu yang lalu dangsanak-dangsanak kita di salah satu kota di Kalimantan Selatan, yakni Barabai, takana banjir. Banjirnya liwar dalam lawan daras-darasnya, nang ujar tutuha di kampung ulun tu, liwar lawasnya kada suah manamui banjir yang bangat banar ini, pahabisan pas masih ada kumpeni ujar baliau. 

 

Kada wara harta haja yang hilang, nyawa gin ada yang hilang di musibah banjir samalam itu. Ulun nang bagana di Kandangan haja gin marasaakan jua am kabanjiran saking limpuarnya banyu hujan. Bahkan pas ulun bajalanan ke ampah loksado, ada beberapa jalan nang tangalih dijalani oleh karena guguran tanah gunung nang longsor. Mungkin tanahnya kada tapi pisit lagi marga banyak hutan yang digundul lawan baalih lahan jadi parkabunan sawit.

 

Alhamdulillah, mandangar habar-habar nang tasabar di WA lawan di sosial media, bubuhan kita di banua hancap haja batutulungan dana, makanan, lawan tanaga nang sakiranya kawa maringanakan cubaan kulawarga disana. 

 

Nah, balajar dari kajadiaan samalam tu ada babarapa hal nang ulun kira panting hagan kita ingatakan tarkait banjir lawan lamunnya ada hujan labat, diantaranya:

 

Menyimpan Dokumen Berharga di Tempat yang Aman

 

Nang ini ulun andak pamulaan karena ini bekal kita hidup lawan bacari nafkah. Ulun maandak dokumen atau surat manyurat panting ke atas lamari, dalam map plastik, yang bebungkus pulang lawan plastik dan basimpan dalam tas-tasan. Jadi sakiranya nyaman dibawa lawan bila katitikan kada langsung basah atawa rabit. 

 

Dokumen nang harus ada basadia, diantaranya:

• Kartu Tanda Penduduk (KTP)
• Kartu Keluarga (KK) lawan Akte kelahiran keluarga.
• Ijazah Sekolah
• Surat Berharga lainnya, misal sertifikat tanah, surat kandaraan.

 

Manyiapkan Pakaian Barasih

 

Nang ini papadahan kuitan ulun. Ujar sidin salalu siap sadia baju barasih parak lawan tas-tasan yang kita pakai manyimpani dokumen tadi. Karana nang ngarannya bala tu, jar sidin, kada mamandang waktu. Salain baju biasa, jangan tatinggal jua baju dalaman.

 

Mamatikan Arus listrik

 

Banyak kajadian satrum marga kada sangaja takana genangan banyu nang dialiri listrik. Biar rancak tu PLN bisa haja mamatikan listrik amun ada indikasi banyu banjir cagar tinggi, tagal kadada salahnya lamun kita bainisiatif saurang mamatikan sabalum kajadian napa-napa, karena bisa haja jua banyu banjir tu hancap banar banaiknya.

 

Salain itu jangan tatinggal jua paralatan nang tapakai banar mun misalnya listrik dipagat orang, yaitu:

- Senter
- Lampu emergency
- power bank
- Lilin dan korek api.

 

Obat nang Dikonsumsi

 

Masalah obat ni jua panting banar, tarlabih lagi lamunnya pian, kuitan, atau kaluarga pian ada baisian aritan yang bisa gawat lamun kada dikinumi. Misalnya ada aritan asma atawa aritan jantung, mun kawa ada tarus basadiaan obat balabih di rumah gasan siaga. Ada jua babarapa obat nang tapakai banar salama ada musibah, jadi kawa di stok di rumah, misalnya:

 

• Paracetamol gasan sakit kepala atawa awak panas
• Asam mefenamat kalaunya ada nyeri
• Diapet hagan kalo parut kada nyaman / diare.

 

Makanan 

 

Apabila bantuan kada langsung datang, makanan siap saji jadi pilihan nang paling baik. Salain nyaman dimasaki, makanan siap saji biasanya jua kawa awet disimpani kada langsung sakali dimasaki harus habis dalam jangka waktu nang singkat. Misal makanan nang kawa gasan jadi persediaan:

 

• Abon ayam atau daging lainnya
• Mie instan
• Biscuit karing nang manganyangi

 

Nah, kikira lima tu pang dahulu manurut ulun nang paling panting kita siap sedia anggaran kada sampai kalumpanan mun sawaktu-waktu kada diduga musibah datang, Naudzubillahi min Dzalik.  Mudah-mudahan kita barataan salalu dalam lindungan Allah Yang Maha Kuasa dan mudahan barataan musibah nang turun jadi penebus dosa lawan meingatkan kita bahwa dunia ni samantara haja dan harta kita titipan-Nya samata.

 

Wassalamualaikum warahmatullahi wabarakatuh

 

Nang Manulis: Zulaeha