Pian sabarataan banyak haja kalo nang tahu mun 22 Desember tuh diparingati jadi Hari Ibu. Nah semalam Female Blogger of Banjarmasin meulah webinar nang disprosori Gloskin Banjarmasin, Hati Indonesia lawan Ina Cookies.
Ketulusan Cinta Dan Kasih Sayang Ibu Di Era New Normal
Webinar nang khusus diadakan gasan Hari Ibu ini bertema "Ketulusan Cinta dan Kasih Sayang Ibu di Era New Normal". Nah nang paling spesial di acara webinar ini ada tiga narasumber "wanita inspiratif" :
Hj. Rr. Ina Wiyandini, nang beisi Ina Cookies
Hj. Aida Muslimah Rosehan, SE, Ketua DPC IWAPI Kota Banjarmasin
Siti Sarah, Psi, sidin nih psikolog.
Acara nang diumpat kurang labih 50 urang ini rami banar. Pembawa acaranya Kak Putri Santoso Ketua FBB lawan Pak Ferdhy dari Hati Indonesia. Nang labih rami tuh ulihnya ada doorprize banyak banar.
Buhan pian suah lah umpat webinar hadiahnya skincare lawan perawatan? Nah semalam hadiah webinarnya skincare lawan perawatan. Manyasal tu pang mun kada umpatan.
Balajar Beusaha Lawan Ibu Rr. Ina Wiyandini
Suah lah pian disariki pas lagi uyuh, lapar, atau pas hanyar bangun guring? Kaya apa rasanya? Kada nyaman kalu. Nah semalam pas di webinar, Ibu Ina menjelasakan mun kita tuh kada bulih menyariki kanakan pas inya hanyar bangun guring, uyuh lawan lapar. Kada baik gasan psikologi si anak.
Ibu Ina ini sudah meulah 135 resep wadai! Uma luar biasa banar lah sidin nih. Sidin jua menjelasakan sekira sukses beisi usaha itu harus :
Cerdas. Harus beisi wawasan luas lawan bisa menahan emosi jadi kada gampang sarik.
Ambisius. Mun hendak usaha kita maju, kita harus meluruskan niat beusaha. Niatnya tuh mun Ibu Ina hendak memberi manfaat gasan banyak urang.
Niat. Niatkan jua usaha kita tu gasan ibadah.
Tekun. Usaha tuh kada selawasnya di bawah kalu, kada jua selawasnya di atas. Jar urang tuh hidup baputar ya lah. Nang kayatu jua usaha. Makanya harus tekun, atau jar urang Banjar tuh cangkal.
Ikhlas. Jar guru sekulah bahari, ikhlas tuh ilmu nang paling tinggi. Ngalih banar tapi mun bisa sampai ikhlas, nikmatnya luar biasa.
Inovasi. Nah jangan kada ingat meulah inovasi hanyar. Soalnya semakin lawas, semakin banyak jua kita beisi saingan usaha. Jadi harus bisa meulah inovasi.
Amal. Jangan kada ingat jua mun kita harus tetap beamal. Sedikit kah, banyak kah ulihan, tetap harus beamal.
Belajar Jadi Ibu Dari Ibu Hj. Aida Muslimah Rosehan
Ulun tuh sampai wahini mun ingat webinar semalam rasanya bauntung lawan himung banar. Ibu Ida ini bebinian yang cocok banar jadi role mode. Sidin nih biar aktif dibanyak organisasi tapi tetap manjalanakan kewajiban sidin sebagai ibu.
Ujar sidin mun hendak beisi anak nang baik akhlaknya kita harus baisi sifat sabar, rajin berzikir, lajari anak mun hendak beapa-apa harus minta ridho kuitan, lawan jangan katinggalan harus menanamkan sifat pemaaf.
Kesimpulan
Rami lo acara webinar semalam. Hadiahnya banyak, lawan ilmunya banyak banar. Kena mun FBB baulah acara webinar, jangan kada ingat umpatan lah.
Komentar
Posting Komentar