Langsung ke konten utama

Bapidara, Tradisi Banjar untuk Penyembuhan Anak Sakit

bapidara
unsplash.com

Amun buhan pian baisi anak nang masih halus pasti buhan pian rancak kalo merasai anak garing panas awak. Terutama garing panas awak nang bisa datang pebila haja, kada tahu siang kada tahu malam. Biasanya amun anak garing tuh ujar dokter diberi minumi obat gasan menurunakan panas awak atawa amun pina bangat biasanya disuruh dokter begana di rumah sakit sehari dua hari. 


Ujar pepatah bahari tu dimana bumi dipijak disitu langit dijunjung. Nang artinya tuh dimana kita berada disitu kita mehormati adat dan budaya diwadah kita badiam. Masing-masing daerah didunia nih pastinya baisi budaya dan tradisi nya sorang, di sabarataan aspek kehidupan. Salah satunya tamasuk tradisi dan budaya meampihakan urang garing. 

 

Di Daerah kita Kalimantan Selatan nginih ada nang ngarannya bapidara, nang digawi urang banjar gasan maampihakan urang kapidaraan. Biasanya nang takana garing kapidaraan nginih kakanakan lawan bayi. 


Bila biasanya kakanakan garing panas tuh jar dokter bisa gagara bahingusan, batukan, bahiraan atawa bisa jua tipes. Nah, amun urang banjar selain dari penyakit dokter ngintuh ada lagi tambahan perkiraan garingnya. 

 

Biasanya bila anak panas dua tiga hari kada baampihan bisa karna tasilahu atawa kapidaraan. Makanya biasanya mun anak garing tuh pasti dah salain ka dokter, pasti dah urang banjar nih mambawa anak baurut wan bapidara. Ulun nih tamasuk jua nang rancak dibawa mama ulun baurut wan bapidara pas lagi halus bahari mun garing.


Amunnya baurut tahuai kalu sudah, sa Indonesia raya tahu haja baurut tuh nangkaya apa gawiannya, diurut pang pokonya awak. Nah amun bapidara nih lain pulang gawian nya, bapidara nih urang-urang nya haja nang bisa lawan kada banyak lagi wahini urang nang bisa mamidarai tuh. Bapidara nih dasar tradisi bahari nang sudah sudah lawas turun-temurun digawi urang banjar, makanya bubuhan urang tuha haja biasanya nang biasa memidarai nih.


Kakanakan nang dibawa kuitannya bapidara nih biasanya karna di perkirakan takana kapidaraan. Jadi, kapidaraan tuh ujar urang Banjar, kakanakan nih dirawa urang halus atawa urang subalah. Di rawa tuh lah lainnya rawa danau tuh, tapi di ganggui kaya itu nah oleh makhluk nang kada talihat mata. 

 

Biasanya karna kakanakan atawa bayi tuh lamah buluan baluman kuat lagi inya, lalu garing kapidaraan.
Bila mambawa anak bapidara tuh, urang nang mamidarai nih mamakai janar gasan bapidara. Selain janar, biasanya peralatan nang dipakai gasan mamidarai urang nih ada sadikit baras, lading, parudan, lawan bakul gasan mambasuh baras. 

 

Satahu ulun selama malihat urang mamidarai tuh, cara bapidara tuh pamulaan nya janar tuh dibalah dua hanya diparut pakai parudan, imbah itu digumpal halus-halus. Imbah itu hanyar disapuakan ka awak nang dipidarai. Biasanya disapuakan ka dahi, belakang talinga, bahu, lipatan siku tangan, talapak tangan, lintuhut, lawan talapak batis.


Mencoret awak urang nang kapidaraan nih pakai janar tuh kada asal coret, jadi coretannya ngintuh bentuk symbol tambah atawa silang kaya itu. Ngintuh ngaran nya tanda cacak burung jar urang Banjar. Selain bacoret-coret tuh bapidara nih nang iyanya tukang pidara tuh babacaan jua, ada bacaan nya gasan mamidarai tuh. 

 

Kada nang asal coret-coret haja, mu nasal coret haja kakanakan TK gin bisa. Ulun sorang kada tahu jua nagapa bacaan nya, mun handak tahu bacaan nya balajar wan batakun lawan urang nang bisa mamidarai. Kalupina pian kawa jua jadi tukang pidara wehehehee… Bagaya haja laah…
Biasanya amun si anak ngintuh dasar garing kapidaraan wan lain garing medis, imbah dipidarai tuh si anak langsung wagas wan lanyap awaknya ampih panas. 

 

Tapi amun dasar garing nya panyakit medis lain kapidaraan, biar bapuluh kali mamidarai kada ja pang pacangan ambih garing inya. Makanya bapidara nih biasanya nangkaya pilihan tuh gasan kuitan, mun misal anak nih di ubati dah kadokter masih ha garing liyut panas. Sadang ae dipidari, kalu pina inya kapidaraan. 

 

Atawa biasanya mun kakanak nih garing panas awak tapi talinga, batis wan tangan dingin, bararti iya tu dah kapidaraan ngintuh ngarannya.
Bila imbah tuntung mambawa anak bapidara nih, jangan kada ingat pian mambari pikaras gasan nang mamidarai. 

 

Pikaras ngintuh nangkaya duit upahan kayaitu nah tapi sapambari nya haja kada batikas barapa, gasan tanda tarimakasih. Barang ae saraba sadikit, barapa sanggup saikhlasnya mambari. Karna amunnya pian kada mambari pikaras, anak pian kada mau ampih garing wan jua nang tukang pidarai bisa taumpat garing sidin.

Nang manulis: putrihaneen.com

Komentar

  1. Mun di wadah ulun di Amuntai, bapidara ni kada pakai baras, tapi pakai janar lawan kapur.

    Dasar bujur, bapidara lawan baurut ni kada mau tatinggal bila ada kakanakan garing. Di keluarga ulun sampai ada istilahnya 3D bila handak ampih garing, yaitu Disuntik, Diurut, Dipidarai XD

    BalasHapus
  2. Nah, aku kada suah mamidarai anak. Wallahu'alam. Biasanya mun garing panas sudah ikam jelaskan kenapa-kenapanya. Tapi pinanya ada nang tatinggal nah, yaitu perkara tasilahu atawa handak tumbuh gigi bisa jua kada nyaman awak. Bukannya kada percaya kapidaraan lah tapi ya intinya kita sebagai ortu bebanyak ae jua beibadah sekira kawa melindungi anak kita dari rawa'an warga subalah.

    BalasHapus
    Balasan
    1. Bepidara to cil e obat tradisional mksud ny
      Kdnya sejanis musryik atau np pang
      Memang lagi padatuan2 sudah nng keto cranya
      Bahari kala to mn ad dokter tabib ad atau tetuha kmpung jurang yg phm

      Hapus
    2. Mun kd suah berarti lain asli kalimantan

      Hapus
  3. Uma dasar bujur nih, sampai wahini nih masih rancak mendangar istilah kapidaraan nih

    BalasHapus
  4. Anak ulun nang pertama kd suah bapidara. Nang kedua nih suah ai sekali. Hihi. Mudahan sehatan aja kanakan dibanjar nih berataan

    BalasHapus
  5. di keluarga ulun mulai ulun lagi halus kada kawa tatinggal bapidara lawan baurut nih mun garing, sampai anak ulun suah jua dibawa mama bapidara...

    BalasHapus
  6. Bapidara wan janar nih, bila janar tu hasilnya habang fiks jar orang bahari kapidaraan. Sampai hawini bila kakanakan garing panas awak pasti jar kapidaraan. Hibak awak wan janar dikasai wkwk

    BalasHapus
  7. Ingat banar dlu dikasai Jabar di jidat... Kalo lagi beselamatan gin rancak dikasai Janar jua biar sudah tuha Kya ini wkk

    BalasHapus

Posting Komentar

Postingan populer dari blog ini

Tidak Kalah dengan Ibukota Provinsi, Ini 4 Kafe di Barabai yang Wajib Dikunjungi

Halo Kaka-Kaka bungas yang lagi membaca tulisan ini, mudahan sehat sabarataan lah. Kenalkan dulu nah, ulun Eca anggota FBB jua dan tulisan ini nih tulisan perdana ulun di Banjar Corner. Selamat membaca 🤗 Tau lah bubuhan pian di wadah ulun Barabai bisi 4 kafe nang kada kalah lawan di Banjarmasin? Han kada tau kalo, makanya bacai sampai tuntung lah. Barabai Hulu Sungai Tengah sabujurnya lain kota kelahiran ulun. Tapi, kayapa pun jua, ulun sudah lawas bagana di sana dan sudah tarasa jadi tanah kelahiran ulun saurang. Ulun mulai bagana di Barabai semenjak kelas 1 SMP. Waktu ulun masih sakulah itu, dasar balum ada nang ngarannya kafe nginih. Ulun lawan kakawanan dahulu bejalanan ke kedai atau depot haja. Nah, wahini lumayan banyak sudah cafe yang kawa dipakai hagan “feed” Instagram bubuhan pian. Ini nah yang menurut ulun musti pian kunjungi. 1. Hero Cafe Nah, kabalujuran banar ulun lawan anggota FBB nang lain suah bakumpulan di Hero Cafe ini mun pas handak betamuan. Di sini rami

Belajar Istilah Banjar

  Halo! Apa habar buhan pian sabarataan? Mudahan baik ajaa lah sabarataan, sehat selalu dan dijauhkan dari panyakit.   Nah kali ini ulun handak memadahkan beberapa istilah dalam bahasa Banjar yang mungkin banyak dari pian masih balum tahu karena kada tebiasa berbahasa banjar sehari-hari, atau hanyar aja pindah ke banjar. Oiya, ulun ingat banar bahari pas SD balajar bahasa Banjar muatan lokalnya, amun wahini masih jua kah kakanaan tahu di istilah ni?   Berikut beberapa istilah dalam bahasa Banjar:   1. Salesmaan   Salesma sabujurnya adalah ngaran virus yaitu virus salesma, yang begejala behingusan atau pilek. Nah rancak urang tetap menyambat salesmaan jua amun ada nang kena flu karena gejala si salesma lawan flu nih mirip yang nyata bahingusan lawan batukan.   2. Hawai   Hawai nang ini lain ngaran wilayah lah, hawai nang dimaksud di sini tu artinya semacam sunyi tu nah, misalnya urang tebiasa di kota lalu bejalanan ke desa pasti lain suasananya, tebiasa pina rami

Kisah Intingan wan Dayuhan

Halo sabarataan, batamuan pulang lawan ulun, Nisa. Kali ini, ulun handak mangisahakan kisah Intingan wan Dayuhan nang rajin tu selalu dikisahakan bila ulun handak guring waktu lagi halus dulu. Kisahnya ni turun temurun dari zaman datu, nini, mama, anak sidin, dan cucu sidin, bisa jua kaina sampai ka buyut sidin. Kisahnya nih rami, sampai taguring guring mandangari kisah ini ja, lucu pulang han. Bila pian suah mandangar kisah Intingan wan Dayuhan, bararti kita sama. Zaman bahari kadada pang yutube wan intirnit. Nang ada kisah dari muntung ka muntung ja. Nang kaya apa kisahnya, ni ulun kisahakan nah ka bagian pian sakira kada panasaran. Kisah Intingan wan Dayuhan  Zaman bahari ada dua ikung badua ba-ading nang bangaran Intingan wan Dayuhan. Kisahnya Intingan nang jadi kaka, Dayuhan ading nya. Ibarat kata, si Dayuhan nih inya orangnya kada tapi paham apa yang di padah-akan tu, atau bahasa kitanya, ada nang kurang kaitu nah. Ujar kisah si ading nih kada hakun sakulah, mac