4 Modal Awal Pabila Handak Jadi Bloger Profesional

Bloger itu sebuah profesi nang membanggakan sekaligus manjanjiakan hagan dijalani baik bagi nang anum atawa nang tuha. Bisa dikatakan siapa haja bisa banar mun handak jadi bloger.

Profesi bloger ini juga banyak banar ditekuni bahkan di kota-kota halus. Kada mesti begana di ibu kota atau kota nang ganal haja. Apabila begana di desa gin masih kawa banar jadi bloger. Intinya hanyalah tersedianya jaringan internet. 

Nah, bagi siapa haja nang tertarik menjadi bloger tapi masih haja ragu atau bingung mamulainya dari mana, maka ulun di sini handak sadikit sharing tentang 4 modal awal untuk jadi bloger nang baik dan terlihat profesional. 

Tapi maaf lah di sini ulun kada manulis “niat” atau “semangat” sebagai salah satu dari 4 modal awal karena ulun yakin nang membaca ini pasti sudah ada niatan untuk jadi bloger. Jadi kita bahas nang lebih spesifik haja lah.

1.    Tahu Perbedaan Blogspot dan Wordpress

 

Blogspot dan Wordpress adalah platform yang bisa kita pakai sebagai wadah hagan blog kita. Sebujurnya masih banyak platform lainnya tapi nang paling digunakan ya nang 2 ini.

Keduanya jelas berbeda. Tapi jelas jua kadada nang gratis. Sebuah blog akan talihat profesional kalau blog itu sudah berbayar. Nah tapi mun pian memilih platform Wordpress, bayarnya lebih banyak karena harus menyewa hosting. Sedangkan blogspot itu sudah disediakan penyimpanan gratis oleh Google.

Nah tapi pian jua harus tahu bahwa perbedaannya yang lebih penting diketahui itu bukan soal duitnya haja tapi tentang fiturnya jua yang bisa buhan pian baca di pencarian Google. Jangan sampai pian salah pilih dan lalu handak beganti pulang kaina. Lebih baik tentukan bujur-bujur dari awal. 

2.    Tahu Ejaan Bahasa Indonesia Nang Bujur

 

Kada mesti sempurna, nang penting pian tahu kayapa penulisan nang bujur untuk kata-kata common. Contohnya, kata “sekedar” itu salah. Nang bujur tu “sekadar”. Kata “intropeksi” itu salah. Nang bujur “introspeksi”. Dan masih banyak lagi. Pian bisa akses KBBI Daring untuk memastiakan apakah kata yang pian tulis sudah bujur atau balum. 

3.    Bergabung Lawan Komunitas Bloger

 

Kenapa harus gabung di komunitas? Nah ini karena bloger akan lebih berkembang kalau masuk ke sebuah komunitas. Biasanya di komunitas itu ada sesi sharing, bisa saling betakun dan menjawab. Bisa babagi ilmu sesama bloger. 

Selain itu, pian bisa berkesempatan umpat event dan menambah luas relasi jua sehingga kredibilitas pian sebagai bloger lebih meyakinkan. 

Ada banyak banar jua sudah komunitas-komunitas bloger ni mulai dari yang nasional sampai yang di daerah-daerah termasuk kayak Female Blogger of Banjarmasin ini. Syarat bergabungnya pun kada ngalih. Buhan pian jangan ragu untuk begabung. 

4.    Menulis Rutin

 

Nah, yang ini paling penting am. Harus banar pian lakukan. Bloger kalau kada menulis asa kada sah disambat bloger. Jadi pian harus banar menulis alias maisi blog pian lawan konten secara rutin. Semakin rancak update semakin bagus. Semakin banyak tulisan pian di blog, semakin baik. 

Nah, itu haja pang modal awal atau modal utama yang harus buhan pian miliki bila handak jadi bloger nang profesional. Bila ada nang lain, pian bisa tambahkan di kolom komentar. Intinya siapa haja pasti bisa. Semangat tarus hagan kita para bloger dan salam sukses!

Nang manulis: Hairun Nisa aka Eca (kataeca.com)

Gambar: unsplash.com