Langsung ke konten utama

Rumah Batu Unik nang Maapung di Atas Banyu


rumah batu banjarmasin
Gambar : www.99.co
Ulun handak bakisah soal rumah unik di Banjarmasin. Ulun nih aslinya Bugis, jadi di Banjarmasin ni ulun statusnya parantau. Pasnya tu parantau di Kabupaten Barito Kuala pang.

Ulun parak 6 tahunan sudah badiam di Kalimantan ni. Ulun tulak sorangan ka sini gasan bagawi. Banyak banar pian hal nang unik nih di sini. Balain banar lawan di Makassar tuh.

Mulai dari acara kawinannya, nang kalo kita datang, makanannya tuh sudah disiapakan nang ampun acara. Ada piring-piring sudah bajajar ba-isi iwak atawa sayuran. Tinggal kita ja lagi handak manambahi nasi saapakah (itu mun isiannya ayam atawa daging), ditambahi kuah kah (mun isiannya soto Banjar), atau ditambahi bumbu kacang mun isiannya gagaduh.

Amunnya di kampung ulun prasmanan aja kayak biasa. Balum lagi ada mejanya pulang. Di Makassar kursi ja nang ada.

Nah, imbah tuh ada lagi nang unik, rumah maapung di Banjar.
Amun rumahnya nang maapung ni dari kayu rancak ja lo kita lihat di tivi-tivi tu rajin. Tapi ngini rumahnya rumah batu. Pamulaan ulun malihat tu rasa takajut banar tu pang.

Pas waktu sakitar satahunan di Banjar dulu, kawan ulun minta tulungi. Sidin handak minta kawani malihat rumah di perumahan parak wadah kami bagawi. Nah pas ulun lihati, rumah-rumahnya tuh maapung sabarataan. Padahal itu rumah batu nang basemen tuh, lain rumah nang dari kayu.

Di bawah rumahnya tuh kayu ulin ja nang ada. Tapi jar Mama ulun kayu ulin tu dasar kuat pang, apalagi bila tarandam banyu, makinnya bakuat jar.

rumah apung banjar
Gambar : facebook.com

Jadi dasarnya di Banjarmasin tuh kota rawa, kota saribu sungai jar urang. Sabarataan ditimbuk kalau handak mambangun apa-apa tuh.

Wadah bagawi ulun sekitar 8 hektar ditimbuk barataan gasan gadung-gadungnya. Jadi kada talalu kalihatan rawanya.

Nah di parumahan ni, kalo kita handak manukar rumah, bujuran nukar di atas rawa tuh pang. Jadi kadada jambatan atawa halamannya. Kita manimbuk sorang atawa baulah sorang tambahan ambin panggungnya.

Lumayan pulang harganya gasan manimbuk tuh, pas tabarungan ulun manikah lawan kawan bagawi. Kami nukar rumah di sini. Jadi kami mamasan tanah gasan manimbuk supaya kawa masuk rumah lawan supaya kawa mamarkir motor.

Unik pang dah. Di kampung ulun, rumah nang mamakai tihang kayu tuh rumah kayu ja. Kadada ruamh batu nang kaya ngini. Rumah panggung di kampung ulun di atas tanah, tinggi ka atas.
Di sini unik, rumahnya randah aja panggungnya. Banyu di bawahnya.

Ka sini nah lihati.




Nang manulis : Tri (10% ja Banjarnya)
Nang menterjemah akan :  irabooklover.com


Komentar

  1. Lucunya alihai malihat rumah beton di atas rawa. Kaitu Banjar, handak pakai kayu, haraganya sing larangan wahini, apalagi ulin, hmmm

    BalasHapus
  2. Dasar lho, larang meolah rumah gara2 fondasinya yg meolah larang jer urang tuh. Huhu :(

    BalasHapus
  3. Dibanjar nih baolah rumah larang meolah tihang bawah nya lawan menukar tanah gasan manimbuk ka ae pada meolah rumah nya.. Maka mun tesalah salah menajak tihang bawahnya tu bisa rumbih rumah tejelapak...

    BalasHapus
  4. hihi amun urang jawa takutan tu pang bediam di rumah nang di atas rawa ni. sako dikira di bawahnya ada buaya. tapi dasar bujur pang rancak ada biawak. he

    BalasHapus
  5. Bahari lagi kada tahu dikisah handak bebukah2 dilahan gambut gaya india. Sekalinya dipadahi pacar situ rawa. Ham untung dipadahi jaka tida tecabur.., 😂

    BalasHapus
  6. Rumah mama ulun di Pelaihari bepondasi biasa. Nah rumah ulun di banjar nih persis kaya yang pian kisahkan tuh. Pas awalnya kada tau pang lah mun harus menambah kayu sekira kada goyang pas ada mobil lewat. Ingat banar dulu bingung rumahnya begoyang pas truck lewat

    BalasHapus

Posting Komentar

Postingan populer dari blog ini

Tidak Kalah dengan Ibukota Provinsi, Ini 4 Kafe di Barabai yang Wajib Dikunjungi

Halo Kaka-Kaka bungas yang lagi membaca tulisan ini, mudahan sehat sabarataan lah. Kenalkan dulu nah, ulun Eca anggota FBB jua dan tulisan ini nih tulisan perdana ulun di Banjar Corner. Selamat membaca 🤗 Tau lah bubuhan pian di wadah ulun Barabai bisi 4 kafe nang kada kalah lawan di Banjarmasin? Han kada tau kalo, makanya bacai sampai tuntung lah. Barabai Hulu Sungai Tengah sabujurnya lain kota kelahiran ulun. Tapi, kayapa pun jua, ulun sudah lawas bagana di sana dan sudah tarasa jadi tanah kelahiran ulun saurang. Ulun mulai bagana di Barabai semenjak kelas 1 SMP. Waktu ulun masih sakulah itu, dasar balum ada nang ngarannya kafe nginih. Ulun lawan kakawanan dahulu bejalanan ke kedai atau depot haja. Nah, wahini lumayan banyak sudah cafe yang kawa dipakai hagan “feed” Instagram bubuhan pian. Ini nah yang menurut ulun musti pian kunjungi. 1. Hero Cafe Nah, kabalujuran banar ulun lawan anggota FBB nang lain suah bakumpulan di Hero Cafe ini mun pas handak betamuan. Di sini rami

Belajar Istilah Banjar

  Halo! Apa habar buhan pian sabarataan? Mudahan baik ajaa lah sabarataan, sehat selalu dan dijauhkan dari panyakit.   Nah kali ini ulun handak memadahkan beberapa istilah dalam bahasa Banjar yang mungkin banyak dari pian masih balum tahu karena kada tebiasa berbahasa banjar sehari-hari, atau hanyar aja pindah ke banjar. Oiya, ulun ingat banar bahari pas SD balajar bahasa Banjar muatan lokalnya, amun wahini masih jua kah kakanaan tahu di istilah ni?   Berikut beberapa istilah dalam bahasa Banjar:   1. Salesmaan   Salesma sabujurnya adalah ngaran virus yaitu virus salesma, yang begejala behingusan atau pilek. Nah rancak urang tetap menyambat salesmaan jua amun ada nang kena flu karena gejala si salesma lawan flu nih mirip yang nyata bahingusan lawan batukan.   2. Hawai   Hawai nang ini lain ngaran wilayah lah, hawai nang dimaksud di sini tu artinya semacam sunyi tu nah, misalnya urang tebiasa di kota lalu bejalanan ke desa pasti lain suasananya, tebiasa pina rami

Kisah Intingan wan Dayuhan

Halo sabarataan, batamuan pulang lawan ulun, Nisa. Kali ini, ulun handak mangisahakan kisah Intingan wan Dayuhan nang rajin tu selalu dikisahakan bila ulun handak guring waktu lagi halus dulu. Kisahnya ni turun temurun dari zaman datu, nini, mama, anak sidin, dan cucu sidin, bisa jua kaina sampai ka buyut sidin. Kisahnya nih rami, sampai taguring guring mandangari kisah ini ja, lucu pulang han. Bila pian suah mandangar kisah Intingan wan Dayuhan, bararti kita sama. Zaman bahari kadada pang yutube wan intirnit. Nang ada kisah dari muntung ka muntung ja. Nang kaya apa kisahnya, ni ulun kisahakan nah ka bagian pian sakira kada panasaran. Kisah Intingan wan Dayuhan  Zaman bahari ada dua ikung badua ba-ading nang bangaran Intingan wan Dayuhan. Kisahnya Intingan nang jadi kaka, Dayuhan ading nya. Ibarat kata, si Dayuhan nih inya orangnya kada tapi paham apa yang di padah-akan tu, atau bahasa kitanya, ada nang kurang kaitu nah. Ujar kisah si ading nih kada hakun sakulah, mac