Langsung ke konten utama

Piduduk

(Sumber gambar: Facebook Habar Budaya)

Assalamualaikum kakawanan sabaratan. Kayak apa habar? Mudahan sihatan haja samuanya lah.

Hari ini ulun handak bakisah tentang piduduk. Sabalumnya, piduduk nang handak ulun kisahakan ne berdasarkan sepengatahuan ulun haja lah sebagai urang awam, lain sebagai ahli budaya atawa ahli agama, hihihi.

Napa garang piduduk tuh? Nah, bila ada pian malihat wadah atawa kantungan beisi baras, nyiur, gula habang, hintalu, banang lawan jarum jahit pas urang Banjar beacaraan, itu tu nang ngarannya piduduk. Selain rancak cungul di acara adat, piduduk rancak jua ada bila kakanakan basunat atau bila bayi binian handak ditindik.

Ujar urang bahari, piduduk ni syarat nang harus ada bila urang Banjar handak bakagiatan. Harapannya supaya kagiatan nang dilaksanakan ne lancar. Bila kada, bisa kapuhunan. Kapuhunannya ne bisa macam-macam, bisa ada nang pingsan, ada nang garing, ada nang kasurupan, cuaca hatan acara kada bagus, sampai lambat waras bila piduduknya ne gasan kakanakan basunat atau batindik.

Kada tahu ne lah bujur kadanya kayakinan urang tuha bahari ne. Nang pasti manurut ulun pribadi, kadada salahnya pang maulah piduduk ne pas hatan bakagiatan. Nang partama supaya bubuhan paninian kada bamamai dulu, hihihi, *dicatuknini*. Nang kadua nang paling panting tuh bujurakan niatnya supaya kada takana dosa syirik atawa musyrik. Salah satunya manurut ulun piduduk ne kawa dijadiakan makanan gasan basalamatan. Sebagai rasa syukur terhadap Tuhan karena sudah dibari rajaki gasan bakagiatan. InsyaAllah bapahala kita mambari makani urang banyak. Dapat doa pulang dari sidin-sidin.

Malantur ulun sadikit lah, bila bakisahan tentang piduduk ne ulun jadi kaingatan kisah waktu masih halus bahari.

Jadi kisahnya tu kayak ini, almarhum abah ulun tu dahulu mantri di kampung, jadi banyak urang nang mambawa anaknya basunat ka rumah kami sambil mambari-i piduduk jua. 

Lucunya tu bila kakanakan ne imbah basunat, kabanyakan kadada nang ingatnya lagi mambawa bulik sandal. Napa rata-rata kakanakan nang imbah basunat ne bulik sambil manangis minta digendong lawan urang tuanya. 

Sampai banyak rajin tu sandal-sandalnya disusuni mama dengan harapan yang empunya maambil balik. Tapi jarang ada nang hakun babulik meambil sandal nang tatinggal. Jadi jer ulun kalo dasar dibariakan urang ha Ma ai sandal tuh gasan piduduk, kalo mau tacapat waras sunatannya, hihihi.

Nah, sekian dulu lah kisah ulun. Bagian pian mun ada kisah tentang piduduk boleh banar ditulisakan di sini jua. 

Mudah-mudahan kita kawa bajumpa lagi di post Banjar Corner nang barikutnya lah. Dadaaah. 

***
Ditulis oleh: Ira @ www.irabooklover.com

Komentar

  1. Satuju ulun, tagantung niatnya maulah piduduk ne gasan apa. Mudahan bujur aja niatnya dan mudahan dapat pahala alih-alih dosa ^^

    BalasHapus
  2. Mun bekawinan piduduk ni kada kawa tetinggal. Pamali jar urang tahu.

    BalasHapus
  3. Piduduk ni dasar banyak diacara urang2 baaruhan.apalagi bakawinan.makasih kisahnya

    BalasHapus
  4. urang banjar nih dasarnya kada kawa tetinggal sudah jadi tradisi dari behari

    BalasHapus
  5. Lucunya tertinggal sandalnya hihi. Itu sunat begitu berarti gak pakai anastesi kan ya?

    BalasHapus
  6. Bujur banar nah, membujurakan niatnya itu pang yang utama leh, ulun dulu anak basunat lawan batindik kada memakai piduduk pang olehnya di rumah sakit prosesnya

    BalasHapus
  7. umaaa hanyar tahu nah ulun lawan piduduk nih. sekalinya ada jua lah tradisi banjar nang kayani

    BalasHapus
    Balasan
    1. Inggih Ka, di tradisi banjar ada mengenal nang ngarannya piduduk ^^

      Hapus

Posting Komentar

Postingan populer dari blog ini

Tidak Kalah dengan Ibukota Provinsi, Ini 4 Kafe di Barabai yang Wajib Dikunjungi

Halo Kaka-Kaka bungas yang lagi membaca tulisan ini, mudahan sehat sabarataan lah. Kenalkan dulu nah, ulun Eca anggota FBB jua dan tulisan ini nih tulisan perdana ulun di Banjar Corner. Selamat membaca 🤗 Tau lah bubuhan pian di wadah ulun Barabai bisi 4 kafe nang kada kalah lawan di Banjarmasin? Han kada tau kalo, makanya bacai sampai tuntung lah. Barabai Hulu Sungai Tengah sabujurnya lain kota kelahiran ulun. Tapi, kayapa pun jua, ulun sudah lawas bagana di sana dan sudah tarasa jadi tanah kelahiran ulun saurang. Ulun mulai bagana di Barabai semenjak kelas 1 SMP. Waktu ulun masih sakulah itu, dasar balum ada nang ngarannya kafe nginih. Ulun lawan kakawanan dahulu bejalanan ke kedai atau depot haja. Nah, wahini lumayan banyak sudah cafe yang kawa dipakai hagan “feed” Instagram bubuhan pian. Ini nah yang menurut ulun musti pian kunjungi. 1. Hero Cafe Nah, kabalujuran banar ulun lawan anggota FBB nang lain suah bakumpulan di Hero Cafe ini mun pas handak betamuan. Di sini rami

Pantun Basa Banjar Gasan Manjaga Warisan Budaya

Assalamualaikum sabarataan. Alhamdulillah ulun akhirnya berkesempatan manulis lagi disini. Buhan pian penasaran apa yang handak ulun kisahakan kah? Lakasi baca lah. Di tulisan ini ulun handak bakisah soal pantun basa Banjar. Buhan pian mungkin sudah tahu, urang Melayu tu kada talapas lawan kabiasaan bapantun. Urang Banjar nang sarumpun lawan Melayu damintu jua, harat-harat baulah pantun. Pantun basa Banjar kada balain pang lawan pantun basa lain. Ada katantuannya jua nang musti diumpati. Mun kada diumpati pantun nang diulah kada baik atawa bisa jua kada kawa disambat pantun. Mun kita maulah wadai tu ada tuangannya. Mun maulah baju, ada polanya. Sama haja lawan pantun. Pantun nang baik ada katantuannya, ada tuangan, ada polanya jua, ngini nah: 1. Pantun nang bagus tu baisian ampat buting baris. Dua baris nang panambaian ngarannya sampiran. Dua baris nang pauncitan ngarannya isi. 2. Pantun nang bagus tu ada pola bunyinya, atawa pola parsajakannya. Polanya tu: ab-ab. 3. Pantu

8 Macam Wadai Banjar

Assalamualaikum, Dangsanak berataan. Kayapa habarnya nih? Mudah-mudahan sihat berataanlah. Aamiin.  Hari ini ulun handak menyambatakan ngaran-ngaran wadai khas urang Banjar. Banyak banar macamnya, tapi nang ulun kisahakan hari ini 8 buting haja. Amun handak sebarataan, dua hari dua malam kada tuntung kita bekisahan. 1. Wadai Lapis sumber : http://dapurummumusasyi.blogspot.com/2013/10/kue-lapis-kakao.html Wadai nang pemulaan ngarannya wadai lapis. Kamiran atawa adonannya biasanya diulah dua warna, imbah itu disumap salapis-salapis beliung-liung warnanya. Bila sudah pina karas salapis, hanyar dindaki lapisan di atasnya pulang. Harus sabar pang tu pang meulah wadai lapis ngini. Warna nang paling rancak diulah tu hijau putih atau cuklat putih. Meulah wadai lapis ngini biasanya di dalam cipir ganal nang dimasukakan ka dalam panci badandangan. Bila sudah masak kaina hanyar dihiris halus-halus sasuai salira. 2. Lumba Sumber : http://beritainfo.web.id/ Lumba ni tamasu