Langsung ke konten utama

Kopi Liberika Bajuin, Kopinya Urang Kalimantan


Assalamualaikum

Hari ini ulun handak bakisah raminya bavespaan matan Banjar ka Tanah Laut. Tujuannya handak ka kebun kopi liberika. Han, tahulah bubuhan pian di Tanah Laut ada kebun kopi liberika? Jar bubuhan kopi tuh : emas hitam di tanah Borneo nang di putik, kada digali.

Ni pamulaan nah ulun bevespaan jauh banar. Hehehe. Rancak bakuliling Gambut-Banjarmasin haja. Kami tulakan ba-ampat ikung, lawan bubuhan kedai kopi. Buhannya handak maulah video dokumentasi kayatu gasan kedai kopi. Kalo ulun handak malangkapi Jurnal Kopi ulun tentang perkebunan kopi.

Ngopi di Tangkisung, Nge camp di Pantai THR Papadaan

Kami tulakan jam 2 siang. Mun ka kebun kopi kelandungan. Akhirnya kami ka Pantai Tangkisung jalan kurau. Umaaa liwar raminya tahulah bajalanan lewat kampung urang. Maka tahu aja lo vespa tu nyaring bunyinya. Jadi pas kami lewat tuh orang cangangan.

Sampai di Tangkisung tuh sudah sore. Jam 4-an kah rasanya kami hanyar sampai. Langsung menjarat hammock, maulah api unggun, tarus mamanasi banyu gasan maulah kopi. Nah pas dudukan, ada paman pentol lewat. Pas banar kalo, kopi lawan pentol nih. Hehehe.

Habis mahadangi sunset, kami tulakan ka Pantai THR Papadaan. Nge_camp_ di sana. Habis baisya, kami bamasakan. Nasi, bihun basanga, hintalu basanga, lawan gorengan tahu tempe jadi menu makam malam. No junk food junk food club. Nah pas sudah jam 1an, kami guringan. Karena ulun bibinian sorangan, jadi ulun guring bapisah lawan kakawanan.

Jam 6 pagi, kami bangunan dah. Masak nasi goreng gasan sarapan lawan maulah kopi. Imbah tu kami langsung manyimpuni tenda lawan mamanasi motor. Langsung ae tulak ka Bajuin.

Perkebunan Kopi Liberika Bajuin

Perjalanan dari Pantai THR Papadaan ka Bajuin sakalinya lumayan jauh lah. Tapi pang pamandangannya bagus banar. Lawan udaranya dasar sejuk banar. Mun bubuhan pian katuju durian, pian harus ka sini. Banyak banar pohon durian di sini. Pas samalam kami tulak tuh buahnya balum masak pang. Tapi sudah ganal-ganal.

Desa nang kami tuju namanya Desa Pemalongan. Di sini itu nang ada kabun kopi liberikanya. Namanya Pak Paidi. Petani kopi liberika dari Tanah Laut. Beliau ni asli Jawa, umpat transmigrasi ka Kalimantan pas zaman Pak Harto bahari jar sidin.



Pas kami datangan, bini sidin langsung manakuni : handak kopi hitam kah handak kopi jahe? Kopi nang disurung nih kopi dari kabun sidin. Di rumah sidin ada beberapa karung ukuran 15kg nang isinya kopi. Kopinya ada nang masih bakulit, ada jua nang sudah bakupas (green beans).

Kisah Kopi Liberika

Habis makan lawan minum kopi, kami tulakan ka kabun kopi sidin. Sakalinya kabun kopi sidin nih di belakang rumah sidin haja. Parak banar. Tapi perkebunan kopi liberika nih beda banar lawan kabun kopi arabika atawa robusta. Pohon kopi liberika ni tinggi. Kaya pohon nangka. Buahnya jua tesebar di dahan-dahannya. Jumlah pohon kopi nang di tanam Pak Paidi kurang dari 20 pohon dengan jarak tanam 2-5 meter.

Kopi liberika ni baisi julukan kopi nangka. Mungkin gara-gara pohonnya nang tinggi kaya nangka, lawan baunya dasar mirip nangka. Kopi liberika ni kopi yang berasal dari Liberia dan Afrika Barat. Kopi ini jua ada kisahnya lawan zaman Belanda. Jadi kopi ini pertama kali masuk ke Indonesia pas zaman Kolonial Belanda.

Pas itu ada penyakit kopi namanya karat daun. Kopi arabika lawan robusta kada tahan lawan penyakit ini. Akhirnya Belanda mendatangkan kopi ini gasan mangganti arabika lawan robusta. Buhan pian tahu lah, dari zaman Belanda tuh Indonesia sudah jadi salah satu negara pengekspor kopi taganal di dunia.

Babulik ke kopi liberika lagi lah. Sayangnya kopi ni kada tapi dikatujui oleh panikmat kopi wan petani kopi. Mun petani kada ketuju karena biarpun buahnya ganal, tapi bobot penyusutan rendah. Habis dikeringkan, bobot kopinya sisa 10% haja. Rugi petani karena ongkos produksi tinggi. Mun penikmat kopi tuh kada ketuju karena aromanya tajam lawan rasanya kurang intens. Tapi mun buhan pian hendak mencoba kopi ini, kawa ke Kedai Kopi Indie atau Brader Kopi Pelaihari.

Industri Kopi dan Masa Depan Petani Kopi

Alhamdulillahnya industri kopi nang bakambang tarus nih membawa habar baik gesan petani kopi kaya Pak Paidi ini. Walaupun kopinya kada tapi dikenal, tapi wahini banyak nang mancari. Karena banyak jua nang penasaran lawan rasanya.

Lawan wahini daerah-daerah yang potensial gasan mananam kopi, mulai basaing mananam kopi. Bagus kalo gesan pertanian di Indonesia. Daerah nang kurang tinggi mulai melirik kopi liberika. Di Bajuin tuh ketinggiannya kada lebih dari 300 mdpl. Cucuk haja gasan mananam kopi liberika ini. Karena dasarnya kopi ini cocok di tanam di dataran rendah.

Jar Pak Paidi, kandala sidin wahini di jumlah produksinya yang masih terbatas. Padahal permintaan kopinya sudah mulai banyak. Mun gasan proses kopinya sidin makai metode jamur kering (natural process). Mun sudah karing, lalu di tumbuk pakai lumpang gasan mangupas kulit kopinya. Gasan menyangrainya, sidin makai tungku lawan rinjing. Han tradisional banar kalo.

Malihat paminat kopi nang makin banyak, Pemerintah Daerah mamberi perhatian. Salah satunya handak mambari bantuan alat kopi kayak pangupas kulit kopi lawan masin sangrai. Pak Paidi jua sudah suah di tulakakan ka Jakarta gasan pameran hasil panen daerah.

"Bahari ulun mananam sawit. Tapi karena habis mananam sawit air sumur bakurang, akhirnya aku tabas ae. Alhamdulillah mulai normal pang ini. Mudahan ae kaina banyak nang sadar, mun sawit tuh kada salawasan baik. Jadi hutan kada ditabas tarus gasan kabun sawit. Tarus kawa jua mananam kopi", ujar Pak Paidi.

Ulun harap, kaina pamarintah bisa lebih perhatian. Selain alat proses kopi, tapi jua lahan gasan mananam pohon kopi.

***
Nang manulis: Putri @ https://www.lilpjourney.com/
Nang maedit: Ira @ https://www.irabooklover.com/

Komentar

  1. Kopi ini primadona yg bakatnya terpendam.
    Pasti sebelumnya belum banyak yg tau kan sama kopi ini hehehe

    BalasHapus
    Balasan
    1. Inggih Ka, hanyar tau ulun lawan kopi ngini. Makasih banyak sudah manulis tentang kopi ini Ka, *peluk sayang buat Ka Putri*

      Hapus
  2. Wah baca postingan ini jadi kangen jalan-jalan ke daerah gitu, sejuk soalnya.

    Oh iya, aku baru tau loh tentang kopi ini. Terima kasih atas pengetahuan barunya. Hahahaha

    BalasHapus
    Balasan
    1. Bujur Ka, mantap tu pang bajalanan ka daerah sejuk sambil malihat pamandangan kopi ^^

      Hapus
  3. Han alih ae kupi urang Banjar harat jua sakalinya. Ulun kira Bajuin tu ngaran suku, sakalinya daerah leh.

    BalasHapus
  4. Handaklah bajalanan ke sana. Sekalian mencobai kopi liberika plus liburan.

    BalasHapus
  5. Wah mantap bonor perjalanan demi kopi. Aku tahunya kopi nang di pasar martapura haja nang dijual ulih acil²

    BalasHapus
    Balasan
    1. Nah bujur Ka, ka Putri tahu sako kopi napa nang rancak dijual acil-acil di Martapura tu XD

      Hapus
  6. Hanyar tahu ulun pada di banjar ada jua betanam kopi.. mudahan kopi asli banua nih kawa terkenal jua nengkaya kopi jenis lainya yang ada di Indonesia nih....

    BalasHapus
  7. Hanyar tahu ih di pelaihari ada kopi juaa. Mudahan kena-kena kopi bajuin lebih banyak dikenal lah

    BalasHapus
  8. Uma ai himungnya kita baisian jua kabun kupi sekalinya leh. Mudahan kena tarkanal jua kaya kupi acih lawan kupi turaja tuh, aamiin

    BalasHapus
  9. Apa kabar nang urang pelaihari kads pernah terasai ini. Uma ih supannya kena mun ampih pandemi merasai gen nah

    BalasHapus
    Balasan
    1. Inggih Ka, mudahan kaena kita kawa jua umpat marasai kopi nangini ^^

      Hapus
  10. Ini seru deh, kok jadi pengen ikutan ya tapi aku ga suka kopi sih tp bisa lah ya mengenal kopi, tp sayang banget ya jadi penyusutan 10% ini ya jelas rugi petani lah ya.

    BalasHapus
    Balasan
    1. Bisa banar Ka, mungkin habis dikenal kaena pian bisa sayang jua lawan kopi, hihihi

      Hapus
  11. Kopi ini primadona yg bakatnya terpendam.
    Pasti sebelumnya belum banyak yang tau sama kopi ini....

    BalasHapus

Posting Komentar

Postingan populer dari blog ini

Tidak Kalah dengan Ibukota Provinsi, Ini 4 Kafe di Barabai yang Wajib Dikunjungi

Halo Kaka-Kaka bungas yang lagi membaca tulisan ini, mudahan sehat sabarataan lah. Kenalkan dulu nah, ulun Eca anggota FBB jua dan tulisan ini nih tulisan perdana ulun di Banjar Corner. Selamat membaca 🤗 Tau lah bubuhan pian di wadah ulun Barabai bisi 4 kafe nang kada kalah lawan di Banjarmasin? Han kada tau kalo, makanya bacai sampai tuntung lah. Barabai Hulu Sungai Tengah sabujurnya lain kota kelahiran ulun. Tapi, kayapa pun jua, ulun sudah lawas bagana di sana dan sudah tarasa jadi tanah kelahiran ulun saurang. Ulun mulai bagana di Barabai semenjak kelas 1 SMP. Waktu ulun masih sakulah itu, dasar balum ada nang ngarannya kafe nginih. Ulun lawan kakawanan dahulu bejalanan ke kedai atau depot haja. Nah, wahini lumayan banyak sudah cafe yang kawa dipakai hagan “feed” Instagram bubuhan pian. Ini nah yang menurut ulun musti pian kunjungi. 1. Hero Cafe Nah, kabalujuran banar ulun lawan anggota FBB nang lain suah bakumpulan di Hero Cafe ini mun pas handak betamuan. Di sini rami

Bajukung di Atas Rawa

jejakrekam.com Di Kalimantan Selatan daerah pahuluan selain gunung dan sungai jua ada daerah rawa. Terutama di 3 kabupaten hulu sungai selatan, tengah, dan utara tergabung 3 daerah rawa.Nah di rawa ngini kadakawa pakai alat angkutan nang ganal jadi harus pakai jukung nang ramping supaya muat lawan kada santuk lawan di bagian bawah bila kamarau pas banyu surut. Jadi di awal bulan Juni samalam ulun sawat mancobai bejukung di rawa ngini. Tepatnya di daerah perbatasan antara hulu sungai tengah dan hulu sungai utara. Di permukaan rawanya hibak lawan tumbuhan banyu. Jadi jukung tu harus mambuka jalan dahulu. Bila takana rumputnya nang jadi sarang nyamuk benyamuk tunpang disangati nang di atas jukung. Makanya paman-paman nang mambawa jukung besangu obat nyamuk. Kada tahan jua obat nyamuk saking banyaknya nyamuknya. Oya, jukung ni dipakai gasan alat pengawasan kelompok pencari iwak. Rata-rata di sini mata pencaharian orang mencari iwak tarus pang. Tapi takana ada nang menyalahi aturan yaitu ma

8 Macam Wadai Banjar

Assalamualaikum, Dangsanak berataan. Kayapa habarnya nih? Mudah-mudahan sihat berataanlah. Aamiin.  Hari ini ulun handak menyambatakan ngaran-ngaran wadai khas urang Banjar. Banyak banar macamnya, tapi nang ulun kisahakan hari ini 8 buting haja. Amun handak sebarataan, dua hari dua malam kada tuntung kita bekisahan. 1. Wadai Lapis sumber : http://dapurummumusasyi.blogspot.com/2013/10/kue-lapis-kakao.html Wadai nang pemulaan ngarannya wadai lapis. Kamiran atawa adonannya biasanya diulah dua warna, imbah itu disumap salapis-salapis beliung-liung warnanya. Bila sudah pina karas salapis, hanyar dindaki lapisan di atasnya pulang. Harus sabar pang tu pang meulah wadai lapis ngini. Warna nang paling rancak diulah tu hijau putih atau cuklat putih. Meulah wadai lapis ngini biasanya di dalam cipir ganal nang dimasukakan ka dalam panci badandangan. Bila sudah masak kaina hanyar dihiris halus-halus sasuai salira. 2. Lumba Sumber : http://beritainfo.web.id/ Lumba ni tamasu