Langsung ke konten utama

Bakisahan Tentang Kuyang

source : liputan6

Assalamu 'alaikum. Hari ini kita bekisahan tentang hantu nang ada disekitaran Kalimantan haja lah, beramian haja bekisahnya. Nama hantunya nitu kami menyambatnya Kuyang, mun buhan bali nyambatnya Leak pinanya pang. Jadi, kuyang itu hantu nang melepas kepalanya dari awak, nah kapalanya ini nang tarbang lawan isian parutnya segala kaya empedu, usus dan lain-lainnya pokoknya bagian parut.

Kuyang neh jer ada 2 versi kaitu nah, ada nag kuyang hantu, ada jua nang kuyang manusia. Kuyang hantu nih nyata sudah karena urang mati jadi hantu kalo. Nah, mun kuyang manusia nih kuyang yang manusia tapi mehakuni jadi hantu pabila tengah malam, ujar kesan supaya lakinya sayang. Hen, ada-ada aja kalo manusia nih. Mun ulun kada hakun am kekaituan, parai. 😄

Nah, sudah tahu lho kuyang tuh ada 2 versi. Habis tuh pulang nang kuyang manusia neh ada 2 pulang. Sutingnya nang jer ulun belepas kepala tadi, nang sutingnya nang beawak bujur tapi awaknya jer lincar terus bajalannya cepat banar, ini neh batisnya sekilan dari bumi tapi manusia jua. Hon ada 2 versi jua.

Merinding am nah menceritakan, bubuhannya pang request ulun menulis kisah hantu, lalu eiy menuliskan ulun neh. 🙈 Hakun jua te disuruhi buhannya. Hahaha 😝 Kuyang manusia nang 2 versi tuh, keduanya sama-sama becarian tembuni kesan dimakankan ke laki dan keduanya supaya laki sayang juga. Adudu ~~

Ulun handak mulai bekisah kejadian tentang kuyang nih lah tapi ini lain kisah ulun tapi kisah abah ulun bahari nang rajin bekisah hantu mun malam jumat. Nang ulun kisahkan nih keduanya kisah kuyang manusia lah.

Kuyang manusia nang pertama nih nang belepas kepala tadih jer ulun. Ini nih ada minyak nang dikasai ke gulu pas tengah malam jadi lalu lepas kepalanya dan keluar beserta ususnya. Ini kejadiannya di kampung halaman abah ulun.

source : inibaru.id

Kisahnya kaini, jadi pas tengah malam, lakinya sudah guring kalo. Nah, inya mulai mengasai akan minyak di gulunya neh. Habis tuh awaknya nih disimpannya di higa lawang. Mulai kalo inya keluar dan beraksi mencari tambuni kesan dimakan akan ke laki. Tambuni nang dicarinya neh tambuni orang nang habis melahirkan banar, lain tambuni nang sudah dikubur habis tuh ditabuknya, lain lah.

Nah si kuyang nih tadi bejalan eiy kalo mencari nituh. Pas malam tuh kenapa kah lakinya nih tebangun handak bekamih. Biasanya kada biasa tabangun tengah malam. Ujar urang jua lah, lakinya bubuhan kuyang nih dasar kaya guring mati tuh bila kuyangnya beraksi, model kaya ada ilmu kekaitu nah makanya lakinya teguring banar. Ini banar eiy kebalajuran lakinya bangun hen.

Pas tebangun tadi, lakinya nih kada melihat bininya, asa bingung jua kalo kada meliat bini dihiga maka kadada. Bakamih eiy dulu kalo sidin neh. Habis tuh mencari bininya sarumahan, maka kadada. Eh, habis itu tatamu awaknya dihiga lawang tapi kadada kepalanya, takajut eiy lakinya nih dipadahkannya eiy ke orang kampung betengah malaman, maka tumbur kemana-mana. Ada nang paham tentang kaini kalo, jer urang kampung situ, masuk akan aja papaci jer ke dalam awaknya. Nah, dimasuk akan kalo papaci ke awaknya sampai hibak seawakan sampai ke gulunya. Menunggui eiy sampai pagi tadih.

Pas sampai orang handak azan subuh, asli bebulik kalo kepala si bininya tadi. Menangis lakinya melihat bininya kaitu, lalu si kepala bininya nih tadi jer takajut kalo meliat awaknya kaitu padahal handak masuk ke awaknya, kaina bila sudah azan kada kawa lagi masuk jer tapi lakinya kada hakunan lagi mengeluarkan papaci tadi di awaknya.

Habis kisahnya nih kaini aja, model gantung kaitu, kada tahu kayak apa nasib bininya tadi pas sudah kada kawa bebulik tadi.

Sebelumnya lah, orang kampung sana tuh sudah curiga jua jer karena biniannya nih malah siang tuh inya beselendang tarus di gulu. Manusia nang jadi kuyang nih, yang beminyak kuyang tadi bila siang dasar betanda habang jer melingkari gulunya makanya inya baselendang. Banyak eiy padahal gosip tapi ya kadada bukti tadih sampai yang tejadi kayak jer ulun di atas tadi tuh.

Bebiniannya nih kaitu karena jua ujar lakinya tuh pemukulan kaitu nah lawan inya, kadada kasih sayang napa-napa kaitu makanya inya bekisah lawan urang kaya apa supaya lakinya sayang, sekalinya ada nang menyarankan kada baik kaitu, ngaran inya kahandakan disayang laki lalu menggawi nang kaitu.

Kasian banar lah, salah pergaulan jer kita wahini nih. Caka sidin tatamu kawanan nang baik, kada am sako menggawi nang kaitu. Mudahan haja nah damai-damai sidin di sana, kada tahu jua damai nang kek apa. Hahaha Pokoknya kita doakan nang baik-baiknya haja gen kesan sidin.

Eh, panjang sudah kisah sekalinya nah. Handak mengisahkan kuyang manusia nang seikungnya tadih yang awak lincar itu tapi pinanya kapanjangan eh. Kaina gen lagi ulun kisahkan, kaina bekisah jua lawan kuyang hantu bujur nituh nah.

Kisah nang pertama nih sampai disini dulu gen lah, koler kalo kepanjangan kada dibacai buhan pian atau disekip oleh buan pian aja kisahnya. Haha

***

Nang manulis : Rima Angel (www.rima-angel.com)
Nang manyunting : Ira (www.irabooklover.com)

Komentar

  1. Bujur, sidin nang hakun manggawi nang kayak ini ni gara-gara salah pargaulan. Sadih hati malihat :(

    BalasHapus
  2. Hi seramnya. Mudahan kita dibari selamat sabarataan. Amin.

    BalasHapus
  3. Seramnya
    Timbul ingat pas bahari rancak bejamur baju malam (pasi-sore begawi pang)
    Napa kah semingguan anak tetangga pina menangis tarus...
    Eh pas malam2 bejamur, di belakang wadah rumah tetangga tuh ada bebinian kayatu... Rasa merinding amun teingat. Langsung jara bejamur baju malam2

    BalasHapus
    Balasan
    1. Aiiii, suah manamui kah pian? Seramnya Ka. Umpatan marinding ulun nah.

      Hapus
  4. Hiy, horornya. Ulun kada suah wani mun bekisahan masalah kuyang nih. Jar urang bila dipandearakan inya mau beparak. Hoho.

    BalasHapus
    Balasan
    1. Inggih Ka, ulun suah jua mandangar jar urang bila dipandirakan inya ada datang badiam di parak lawang rumah kita, hiiiiiiiiii.

      Hapus
  5. Behari lagi halus, mun bangun guring ada biru kaya lebam tu diawak, ngintu di igut kuyang nak ae jar mama, imbah tu disuruh mama mengasai pakai bawang habang. Supaya kepadihan mata kuyang nya jar mama ahahhaha

    BalasHapus
  6. Raminya kisah kuyang nih lah. Habis dibuati papaci tu ada jua yang. Memadahkan bininya mati karena kda bisa bebulik lagi.

    Macam macam ja kelakuan bini, ada yang hndk disayang laki melakukan akan kaitu. Pas tia kda kawa bebulik lagi

    BalasHapus
  7. Kasiannya lah inya jadi kuyang karena lakinya kdrt. Jaka tinggalkan ha lakinya tu daripada jadi kuyang. He

    BalasHapus

Posting Komentar

Postingan populer dari blog ini

Tidak Kalah dengan Ibukota Provinsi, Ini 4 Kafe di Barabai yang Wajib Dikunjungi

Halo Kaka-Kaka bungas yang lagi membaca tulisan ini, mudahan sehat sabarataan lah. Kenalkan dulu nah, ulun Eca anggota FBB jua dan tulisan ini nih tulisan perdana ulun di Banjar Corner. Selamat membaca 🤗 Tau lah bubuhan pian di wadah ulun Barabai bisi 4 kafe nang kada kalah lawan di Banjarmasin? Han kada tau kalo, makanya bacai sampai tuntung lah. Barabai Hulu Sungai Tengah sabujurnya lain kota kelahiran ulun. Tapi, kayapa pun jua, ulun sudah lawas bagana di sana dan sudah tarasa jadi tanah kelahiran ulun saurang. Ulun mulai bagana di Barabai semenjak kelas 1 SMP. Waktu ulun masih sakulah itu, dasar balum ada nang ngarannya kafe nginih. Ulun lawan kakawanan dahulu bejalanan ke kedai atau depot haja. Nah, wahini lumayan banyak sudah cafe yang kawa dipakai hagan “feed” Instagram bubuhan pian. Ini nah yang menurut ulun musti pian kunjungi. 1. Hero Cafe Nah, kabalujuran banar ulun lawan anggota FBB nang lain suah bakumpulan di Hero Cafe ini mun pas handak betamuan. Di sini rami

Belajar Istilah Banjar

  Halo! Apa habar buhan pian sabarataan? Mudahan baik ajaa lah sabarataan, sehat selalu dan dijauhkan dari panyakit.   Nah kali ini ulun handak memadahkan beberapa istilah dalam bahasa Banjar yang mungkin banyak dari pian masih balum tahu karena kada tebiasa berbahasa banjar sehari-hari, atau hanyar aja pindah ke banjar. Oiya, ulun ingat banar bahari pas SD balajar bahasa Banjar muatan lokalnya, amun wahini masih jua kah kakanaan tahu di istilah ni?   Berikut beberapa istilah dalam bahasa Banjar:   1. Salesmaan   Salesma sabujurnya adalah ngaran virus yaitu virus salesma, yang begejala behingusan atau pilek. Nah rancak urang tetap menyambat salesmaan jua amun ada nang kena flu karena gejala si salesma lawan flu nih mirip yang nyata bahingusan lawan batukan.   2. Hawai   Hawai nang ini lain ngaran wilayah lah, hawai nang dimaksud di sini tu artinya semacam sunyi tu nah, misalnya urang tebiasa di kota lalu bejalanan ke desa pasti lain suasananya, tebiasa pina rami

Kisah Intingan wan Dayuhan

Halo sabarataan, batamuan pulang lawan ulun, Nisa. Kali ini, ulun handak mangisahakan kisah Intingan wan Dayuhan nang rajin tu selalu dikisahakan bila ulun handak guring waktu lagi halus dulu. Kisahnya ni turun temurun dari zaman datu, nini, mama, anak sidin, dan cucu sidin, bisa jua kaina sampai ka buyut sidin. Kisahnya nih rami, sampai taguring guring mandangari kisah ini ja, lucu pulang han. Bila pian suah mandangar kisah Intingan wan Dayuhan, bararti kita sama. Zaman bahari kadada pang yutube wan intirnit. Nang ada kisah dari muntung ka muntung ja. Nang kaya apa kisahnya, ni ulun kisahakan nah ka bagian pian sakira kada panasaran. Kisah Intingan wan Dayuhan  Zaman bahari ada dua ikung badua ba-ading nang bangaran Intingan wan Dayuhan. Kisahnya Intingan nang jadi kaka, Dayuhan ading nya. Ibarat kata, si Dayuhan nih inya orangnya kada tapi paham apa yang di padah-akan tu, atau bahasa kitanya, ada nang kurang kaitu nah. Ujar kisah si ading nih kada hakun sakulah, mac