Langsung ke konten utama

Kisah Barabut Durian di Kiram Park

Assalamualaikum warahmatullahi wabarakatuh.

Dimapa habar kakawanan? Musim panghujan nang kaya damini ni musti lagi musim-musimnya buah di banua. Sudahnya samalam tu parasa ulun ada musim kasturi, limbah itu musim tiwadak nang kulitnya rami diolah orang jadi mandai. Nah wayahini ne lawan jua buah nang disambati orang jadi raja buah jah. Ya, kada lain lagi pang nang ulun bahas ni adalah buah durian.

Samalam rami banar ada festival makan buah durian di Kiram Park nang diadakan olehnya Paman Birin, Gubernur Kalimantan Selatan.  Ujar habar nang ulun dangar ni nah, jumlah buah durian nang handak dibalah tu sampai 43.000 bigi!



Baluman lagi ditambahi lawan buah asli Kalimantan Selatan lainnya nang kaya kita kita tahu tuh sudah, musti maulah hancuy liyuy. Umaa heh kadalah kacar banar mandangar pian? Kada hiran pang lamun mandangar habartu jalanan jadi hibak banar lawannya antusiasme urang banua hagan makan durian gratis baimbaian.



Limpat raminya tuh lah, ujar habar kawan nang handak umpat tu jalanan bilang liwar macitnya! Habisam jar babulik inya ka rumah marga takutan kalandungan bulik mun tajanaki kaya apa macit di jalan teh.


Limbah mandangar habar tu, pas banar tabuka hape ulun mambaca jua di barita mun ada nang sawat baluka-luka marga kana kulit durian pas barabut di Kiram tu tadi. Laluai ulun tapikirakan, acara nang kaya ini ni koordinirnya dasar harus liwar bagus anggaran masyarakat sanang lawan salamat.

Pamarintah sudah baik mangganang kita inggannya kawa baramian manikmati buah yang nyaman-nyaman, kita jua harus babisa-bisa manjaga diri, iya kada?

Ulun? Uma ulun gin handak banar tulak. Apalagi mamakan durian gratis, parasa ulun mau haja hantup tarus amun disurungi garatis. Tapi mun mangganang lagi pas mambaca di berita tadi ada nang sawat baluka-luka, sampai ada jua kasus nang tapisah anak lawan kuitan saking hibaknya, ulun jadi bapikir ae ba asa. Jangan sampai muntung haja nang nyaman, awak sakit.

Mudahan ada pulang tahun kaina lah, nyaman kita kawa tulak. Patahu duriannya babanyak! (maharap banar acil hahaha). Kayapa buhan pian handak juakah tulak tahun kaina? Beimbai kita.

Wassalamualaikum warahmatullahi wabarakatuh.

***

Nang manulis: Leha (www.syunamom.com)
Nang ma-edit: Enny (www.ennyratnawati.com)

Komentar

  1. Umaylah ngeri banar berabutannya, mana mun ulun dari bjm jauh banar mendatangi baik nukar aja d bjm

    BalasHapus
  2. Raminya ihh, mendangar kisah haja pang jua kada wani tulak kesana olehnya macit tadi pang

    BalasHapus
    Balasan
    1. Inggih Ka, tinggi banar antusiasme masyarakat sampai tamacet-macet di jalan.

      Hapus
  3. raminya ya Allah. banyak banar, pastilah tuh barabutan. coba dikirim aja ke rumah masing-masing haha

    BalasHapus
    Balasan
    1. Ulun akur banar Ka ae bila dikirim ka rumah masing-masing, hihihi.

      Hapus
  4. umaaaa raminya kak. mendangar aja pang semalam ada acara Paman Birin bebagi durian tapi karena kada ketuju jd kada tulak ae. hehehe

    BalasHapus
  5. rami banar acaranya semalam melihat di tv. tapi ulun kada ketuju durian pang nah jadi kada beminat handak datang. hehe

    BalasHapus
    Balasan
    1. Inggih Ka, malihat di TV barang kita urang rami makan durian gratis, hihihi

      Hapus

Posting Komentar

Postingan populer dari blog ini

Tidak Kalah dengan Ibukota Provinsi, Ini 4 Kafe di Barabai yang Wajib Dikunjungi

Halo Kaka-Kaka bungas yang lagi membaca tulisan ini, mudahan sehat sabarataan lah. Kenalkan dulu nah, ulun Eca anggota FBB jua dan tulisan ini nih tulisan perdana ulun di Banjar Corner. Selamat membaca 🤗 Tau lah bubuhan pian di wadah ulun Barabai bisi 4 kafe nang kada kalah lawan di Banjarmasin? Han kada tau kalo, makanya bacai sampai tuntung lah. Barabai Hulu Sungai Tengah sabujurnya lain kota kelahiran ulun. Tapi, kayapa pun jua, ulun sudah lawas bagana di sana dan sudah tarasa jadi tanah kelahiran ulun saurang. Ulun mulai bagana di Barabai semenjak kelas 1 SMP. Waktu ulun masih sakulah itu, dasar balum ada nang ngarannya kafe nginih. Ulun lawan kakawanan dahulu bejalanan ke kedai atau depot haja. Nah, wahini lumayan banyak sudah cafe yang kawa dipakai hagan “feed” Instagram bubuhan pian. Ini nah yang menurut ulun musti pian kunjungi. 1. Hero Cafe Nah, kabalujuran banar ulun lawan anggota FBB nang lain suah bakumpulan di Hero Cafe ini mun pas handak betamuan. Di sini rami

Belajar Istilah Banjar

  Halo! Apa habar buhan pian sabarataan? Mudahan baik ajaa lah sabarataan, sehat selalu dan dijauhkan dari panyakit.   Nah kali ini ulun handak memadahkan beberapa istilah dalam bahasa Banjar yang mungkin banyak dari pian masih balum tahu karena kada tebiasa berbahasa banjar sehari-hari, atau hanyar aja pindah ke banjar. Oiya, ulun ingat banar bahari pas SD balajar bahasa Banjar muatan lokalnya, amun wahini masih jua kah kakanaan tahu di istilah ni?   Berikut beberapa istilah dalam bahasa Banjar:   1. Salesmaan   Salesma sabujurnya adalah ngaran virus yaitu virus salesma, yang begejala behingusan atau pilek. Nah rancak urang tetap menyambat salesmaan jua amun ada nang kena flu karena gejala si salesma lawan flu nih mirip yang nyata bahingusan lawan batukan.   2. Hawai   Hawai nang ini lain ngaran wilayah lah, hawai nang dimaksud di sini tu artinya semacam sunyi tu nah, misalnya urang tebiasa di kota lalu bejalanan ke desa pasti lain suasananya, tebiasa pina rami

Kisah Intingan wan Dayuhan

Halo sabarataan, batamuan pulang lawan ulun, Nisa. Kali ini, ulun handak mangisahakan kisah Intingan wan Dayuhan nang rajin tu selalu dikisahakan bila ulun handak guring waktu lagi halus dulu. Kisahnya ni turun temurun dari zaman datu, nini, mama, anak sidin, dan cucu sidin, bisa jua kaina sampai ka buyut sidin. Kisahnya nih rami, sampai taguring guring mandangari kisah ini ja, lucu pulang han. Bila pian suah mandangar kisah Intingan wan Dayuhan, bararti kita sama. Zaman bahari kadada pang yutube wan intirnit. Nang ada kisah dari muntung ka muntung ja. Nang kaya apa kisahnya, ni ulun kisahakan nah ka bagian pian sakira kada panasaran. Kisah Intingan wan Dayuhan  Zaman bahari ada dua ikung badua ba-ading nang bangaran Intingan wan Dayuhan. Kisahnya Intingan nang jadi kaka, Dayuhan ading nya. Ibarat kata, si Dayuhan nih inya orangnya kada tapi paham apa yang di padah-akan tu, atau bahasa kitanya, ada nang kurang kaitu nah. Ujar kisah si ading nih kada hakun sakulah, mac