Langsung ke konten utama

Kisah Intingan wan Dayuhan



Halo sabarataan, batamuan pulang lawan ulun, Nisa.

Kali ini, ulun handak mangisahakan kisah Intingan wan Dayuhan nang rajin tu selalu dikisahakan bila ulun handak guring waktu lagi halus dulu. Kisahnya ni turun temurun dari zaman datu, nini, mama, anak sidin, dan cucu sidin, bisa jua kaina sampai ka buyut sidin.

Kisahnya nih rami, sampai taguring guring mandangari kisah ini ja, lucu pulang han. Bila pian suah mandangar kisah Intingan wan Dayuhan, bararti kita sama. Zaman bahari kadada pang yutube wan intirnit. Nang ada kisah dari muntung ka muntung ja.

Nang kaya apa kisahnya, ni ulun kisahakan nah ka bagian pian sakira kada panasaran.

Kisah Intingan wan Dayuhan 

Zaman bahari ada dua ikung badua ba-ading nang bangaran Intingan wan Dayuhan. Kisahnya Intingan nang jadi kaka, Dayuhan ading nya.

Ibarat kata, si Dayuhan nih inya orangnya kada tapi paham apa yang di padah-akan tu, atau bahasa kitanya, ada nang kurang kaitu nah.

Ujar kisah si ading nih kada hakun sakulah, macam macam alasan inya bapandir sakira kada sakulah. Karena kamunyakan manyuruh, akhirnya di hi-ih-hakan ai kahandak si Dayuhan ni supaya kada sakulah.

Suatu hari, pas Intingan handak bajalan satumat kaluar rumah, si Intingan bapasan wan Dayuhan. Jar si Intingan

👨 : Uy ading ku sayaang, bila mama bangun, jangan kada ingat ma-mandi-i mama wan banyu hangat kuku!

👦 : Ayuha ka.

Kisah paham si Dayuhan nginih napa nang dipadahi.

Tulak ai lagi Intingan ni bajalan kaluar rumah. Ma ancap si Dayuhan manjarang banyu. Pina banyu panas manggurak sudah si Dayuhan neh manjapai sampai barasa ka kuku. Oh jar Dayuhan, ini ngarannya banyu hangat kuku. Napang barasa sampai ka kuku jar. Himung ai si Dayuhan marasa bujur manggawi.

Bangun mamanya dari guring. Ujar kisah, mamanya si Dayuhan wan Intingan ni garing bangat. Saking bangatnya kada kawa ba apa apa lagi sudah, garing tuha saking tuhanya sudah umur mamanya.

Di mandi-akan ai oleh si Dayuhan banyu panas manggurak tadi ka awak mama nya. Marasa kapanasan mamanya Dayuhan sakalinya kada behinak lagi. Dikira si Dayuhan mamanya nih himung dapat nya mandi. Kubui barait tu pang si Dayuhan. Kada baingat lagi padahal kuitan sudah kada banyawa.

Sudah tuntung mandi, diangkat si Dayuhan ai mamanya tadi  ka tilam. Kada lawas habis itu datang Intingan.

👨 : Sudah lah mama ikam mandi-i ding?

👦 : Sudah ka ai, mama kahimungan di mandi-i ulun, kalapak kalapak sidin ka. Saking himungnya, taguring sidin pas mandi tadi. Coba pian liati ka.

Rasa pina ragu Intingan wan Dayuhan nih.  Sakali dilihati kuitan sudah kada banyawa, tabujur kaku wan jua awak tekelupas karena banyu panas tadi dimandi-akan.

Menangis Intingan melihati kuitan sudah kadada lagi, handak menyariki Dayuhan katia kada jadi hasil. Maluapakan emosi wan Dayuhan jua kadada guna, karena nasi sudah menjadi bubur.

Ujar Intingan batakun, "Kaya apa banyu nang ikam jarang tadi, Ding?"

Lancar si Dayuhan bakisah. Banyu hangat kuku tadi tu banyu panas pas manggurak di masuk akan ke kuku pina merinyut rasa handak pacul, oh ini namanya hangat kuku.

Bagiling kapala langsung Intingan mandangar panjalasan si Dayuhan nang salah pangartian. Mulai ai si Intingan bagamatan manjalas-akan ka Dayuhan kuitan sudah kadada lagi. Habis mandangar kisah ngitu, Dayuhan hamuk betinjak tinjak lawang mandangar kisah kuitan samata wayang sudah kadada lagi. Sambil bapadah minta maaf si Dayuhan wan kuitannya.

Supaya lakas di kuburakan, Dayuhan di suruh pulang mancari tuan guru untuk manyambahyangakan mamanya. Wan jua mancari sapi gasan basalamatan kaina.

Meancap Dayuhan nih tulak lagi. Tangah jalan inya nih kada tahu rupa tuan guru tu kayak apa.  Saingat pandiran padahan Intingan tadi, tuan guru tu nang mamakai surban putih, kupiah putih pokoknya saraba putih. Amun sapi ngintu inya babatis 4. Warnanya pina abu abu jar.

Bejalan ai si Dayuhan ni ka tangah hutan. Di sana Dayuhan malihat burung banyaaaak banar. Nah ini pinanya tuan guru jar Dayuhan.

"Uuii tuan guru pian disuruh kaka mandatangi ka rumah gasan sambahyang jenajah."

Ngaran burung neh kada menyahut. Sekali lagi inya bepandir,

"Uuii tuan guru dilajui datang jar kaka ulun gasan salat jenajah."

Burung nih langsung terbang melihat Dayuhan pina mamaraki. Aneh pikir Dayuhan.

Marasa kadada jawaban, bajalan lagi si Dayuhan nya ka dalam hutan. Sakalinya tatamu tikus. Kira si Dayuhan nih sapi itu tikus, sama pada beisi batis ampat, wan warnanya pina coklat abu kaya itu. Ancap ai ditangkapnya si tikus ni. Huimung muha Dayuhan babulik ka rumah.

Pas sampai dirumah, si Intingan batakun kayapa tatamu lah jar wan tuan guru, si Dayuhan bakisah tuan guru nya tarabang, dipandiri kada manyahut. Sudah ai lagi jar.

Nah jar si Intingan dalam hati, Dayuhan nih tasalah urang. Habis itu si Intingan batakun lagi, lawan sapi pang jar dapat lah. Si Dayuhan menyahut, dapat Ka. Ulun ikat tuh di bawah tangga. Jar Intingan mun sapi di ikat di bawah tangga ni pinanya  kakanak nginih salah tangkap bisa. Sakalinya pas diliati salah jua ai. Rasa bagiling kepala si Intingan nih manyuruh Dayuhan ni saraba tasalah.

Amun kaitu jar Intingan, ikam tunggui mama sambil jamur banih di muka rumah. Pakai kita baaruh malam ini. Mama nih harus lakas di urus wan disambahyangakan.

Habis itu si Intingan nang bacari tuan guru wan sapi. Pas si Intingan babulik takajut sambil bapusut dada, kanapa jadi banih bahambur di muka rumah, ayam rami memutiki. Sakali ditakuni, jar Dayuhan si Intingan manyuruh manjamur di muka rumah. Dikira dihambur. Astagfirulladzim jar Intingan sambil bapicik kapala karena malihat kalakuan nang ading kadada habisnya.

Pesan nang Kawa Diambil

Fungsi dari sakulah ma-ulah kita tahu, wan mambanyaki pangalaman wan ilmu gasan kita bawa kaina. Ilmu nang baguna wan bamanfaat untuk diri kita wan urang sakitar.

Salam sugar ❤

***

Nang manulis: Nisa (www.nisazet.com)
Nang ma-edit: Ira (www.irabooklover.com)

Komentar

  1. bacanya gemes :((
    tapi gimana yaa...bener banget, ilmu itu sumber penghidupan. agar kita bisa hidup baik dan lebih baik.

    BalasHapus
  2. Hanyar suah mandangar ulun nah kisah Intingan wan Dayuhan ni. Pipina ngeri ih parasa ulun kisahnya, hahhah

    BalasHapus
    Balasan
    1. Inggih Ka, pas bagian kuitan dimandi-i banyu manggurak t dasar pina ngeri pang kisahnya.

      Hapus
  3. Sebujurnya aku gerigitan banar membaca ini, liwar banar membari muar urang kd hakun sekulah te

    BalasHapus
    Balasan
    1. Inggih Ka, rasa gagiritan ada jua mambaca kisah n lah ^^

      Hapus
  4. Ini kisah asalnya dari mana? Baru dengar ulun hehe. bagus kisahnya

    BalasHapus
    Balasan
    1. Kisahnya ni turun temurun dikisahkan dari mulut ke mulut Ka ^_^

      Hapus
    2. In kisah datuk ninik bahari utk anak cucunya, sy sempat denger cerita ini dr kakek dan buyut

      Hapus
  5. Hanyar suah tedapat kisah ini nah.
    Asa kyp membayangkan kuitan dimandii banyu manggurak. ��

    BalasHapus
    Balasan
    1. Inggih Ka, rasa kayak apa kayak itu nah mambayangakan ;(

      Hapus
  6. Ulun kira tadi kisah mainan inting sekalinya lain wkwk, mantap bnr yg beulah kisahnya nih baguss

    BalasHapus
    Balasan
    1. Nah kayak apa jua Ka mainan inting tu? Kawa ni dikisahakan di sini jua, hihihi

      Hapus
  7. Aku baca kisah ini pas kekanakan. Di buku kisah nang ada di perpus SD. Kada dikisahakan mama atau abah. Hehe. Tapi ada beberapa bagian nang belain sedikit. Efek banyak nang bekisah leh, macam2 versi. Hehe

    BalasHapus
    Balasan
    1. Inggih Ka, kisah dari mulut ke mulut ni banyak bumbunya ^^

      Hapus
  8. Ya Rabb gemes bacanya,yang horor itu mamanya di mandikan air mendidih 😢

    BalasHapus
  9. Hanyar tahu nah kisah Dayuhan ni. Rasa membaca kisah horor pas inya mandiri mamanya

    BalasHapus
  10. Aduh akh membaca kisahnya kada lucu, meringis nang ada hon karena kebodohan satu anak. Huhu :(

    BalasHapus
  11. Hiii, ngeri banar... Sintar mana sintar 💀

    BalasHapus

Posting Komentar

Postingan populer dari blog ini

Tidak Kalah dengan Ibukota Provinsi, Ini 4 Kafe di Barabai yang Wajib Dikunjungi

Halo Kaka-Kaka bungas yang lagi membaca tulisan ini, mudahan sehat sabarataan lah. Kenalkan dulu nah, ulun Eca anggota FBB jua dan tulisan ini nih tulisan perdana ulun di Banjar Corner. Selamat membaca 🤗 Tau lah bubuhan pian di wadah ulun Barabai bisi 4 kafe nang kada kalah lawan di Banjarmasin? Han kada tau kalo, makanya bacai sampai tuntung lah. Barabai Hulu Sungai Tengah sabujurnya lain kota kelahiran ulun. Tapi, kayapa pun jua, ulun sudah lawas bagana di sana dan sudah tarasa jadi tanah kelahiran ulun saurang. Ulun mulai bagana di Barabai semenjak kelas 1 SMP. Waktu ulun masih sakulah itu, dasar balum ada nang ngarannya kafe nginih. Ulun lawan kakawanan dahulu bejalanan ke kedai atau depot haja. Nah, wahini lumayan banyak sudah cafe yang kawa dipakai hagan “feed” Instagram bubuhan pian. Ini nah yang menurut ulun musti pian kunjungi. 1. Hero Cafe Nah, kabalujuran banar ulun lawan anggota FBB nang lain suah bakumpulan di Hero Cafe ini mun pas handak betamuan. Di sini rami

8 Macam Wadai Banjar

Assalamualaikum, Dangsanak berataan. Kayapa habarnya nih? Mudah-mudahan sihat berataanlah. Aamiin.  Hari ini ulun handak menyambatakan ngaran-ngaran wadai khas urang Banjar. Banyak banar macamnya, tapi nang ulun kisahakan hari ini 8 buting haja. Amun handak sebarataan, dua hari dua malam kada tuntung kita bekisahan. 1. Wadai Lapis sumber : http://dapurummumusasyi.blogspot.com/2013/10/kue-lapis-kakao.html Wadai nang pemulaan ngarannya wadai lapis. Kamiran atawa adonannya biasanya diulah dua warna, imbah itu disumap salapis-salapis beliung-liung warnanya. Bila sudah pina karas salapis, hanyar dindaki lapisan di atasnya pulang. Harus sabar pang tu pang meulah wadai lapis ngini. Warna nang paling rancak diulah tu hijau putih atau cuklat putih. Meulah wadai lapis ngini biasanya di dalam cipir ganal nang dimasukakan ka dalam panci badandangan. Bila sudah masak kaina hanyar dihiris halus-halus sasuai salira. 2. Lumba Sumber : http://beritainfo.web.id/ Lumba ni tamasu

Bajukung di Atas Rawa

jejakrekam.com Di Kalimantan Selatan daerah pahuluan selain gunung dan sungai jua ada daerah rawa. Terutama di 3 kabupaten hulu sungai selatan, tengah, dan utara tergabung 3 daerah rawa.Nah di rawa ngini kadakawa pakai alat angkutan nang ganal jadi harus pakai jukung nang ramping supaya muat lawan kada santuk lawan di bagian bawah bila kamarau pas banyu surut. Jadi di awal bulan Juni samalam ulun sawat mancobai bejukung di rawa ngini. Tepatnya di daerah perbatasan antara hulu sungai tengah dan hulu sungai utara. Di permukaan rawanya hibak lawan tumbuhan banyu. Jadi jukung tu harus mambuka jalan dahulu. Bila takana rumputnya nang jadi sarang nyamuk benyamuk tunpang disangati nang di atas jukung. Makanya paman-paman nang mambawa jukung besangu obat nyamuk. Kada tahan jua obat nyamuk saking banyaknya nyamuknya. Oya, jukung ni dipakai gasan alat pengawasan kelompok pencari iwak. Rata-rata di sini mata pencaharian orang mencari iwak tarus pang. Tapi takana ada nang menyalahi aturan yaitu ma