Kisah "Gunung" di Candi Agung Amuntai

Assalamu'alaikum kakawanan barataan. Kayak apa habar pian? Mudah-mudahan sabarataan dalam lindungan Allah SWT. Aamiin.

Banjar Corner hari ini, ulun handak mambawai bubuhan pian bakisahan. Kisah nang handak ulun sampaiakan ni adalah kisah Gunung Candi.

Sabalumnya, pian tahu ai lo pada Amuntai ni ada beisi candi bakas paninggalan Karajaan Nagara Dipa nang ngarannya Candi Agung? Bagi bubuhan pian nang suah bailang ka Candi Agung ni tadi, ada lah malihat gunung di situ? Kadada kalo.

Nah, anehnya tuh, kai nini bahari bila handak tulak ka Candi, pasti manyambatnya "aku handak ka gunung" jer sidin. Kami cucu-cucunya ni lalu bingung. Mana lih gunungnya, pina kadada talihat.

Uuuh sakalinya jer ibu guru “Seni Budaya di sakulahan ulun, selain kisah sejarah Candi Agung yang kawa pian baca di post Banjar Corner nang judulnya Sejarah Candi Agung wan Kisah Putri Junjung Buih, Candi Agung ni ada lagi ba-isi sabuting kisah. Dahulu, daerah candi tu dasar gunung. Gunung Candi ngarannya. Menurut habar, di gunung itu lah terkubur seluruh harta bekas peninggalan karajaan Nagara Dipa.

Mandangar habar tu tadi, lalu ae urang Belanda nang manjajah waktu itu handak marampas harta karajaan ni jua. Ditabuk lah tanah gunung tadi oleh urang Belanda.

Kasiannya, urang Belanda ni kada tahu pada masih ada "urang-urang Candi" nang manjaga harta nintu. Urang Candi ni sakti-sakti. Dengan kesaktiannya nang dimiliki oleh urang Candi ni tadi, setiap Belanda handak manabuk sampai ka lokasi harta, dipindahakan urang Candi hartanya tadi  ka salapis tanah di bawahnya. Bila handak sampai pulang Belanda manabuk ke lapisan tanah nang di bawahnya tadi, dipindahakan urang Candi pulang hartanya ka salapis tanah di bawahnya lagi. Tarus ja kayak itu sampai Gunung Candi tadi rata lawan tanah.

Kada tahu bujur atau kada kisahnya, nang pasti kisahnya ni kawa manjawabakan kanapa nini-nini atau kai-kai bahari manyambat daerah candi tu lawan sebutan gunung wan kanapa gunungnya wayahini kadada lagi.

Dari kisah ini kita kawa ma-ambil pelajaran bahwa kada baik maambil harta nang lain ampun kita. Tapi disamping nang ngintu pulang, semangat pantang menyerah bagian Belanda ni patut jua kita tiru. Gigihnya te bagiannya ni bekerja keras untuk mencapai tujuan, sampai kawa manabuk gunung jadi rata lawan tanah. Ujung-ujungnya kada dapat ha pulang buhan Belanda ni ta-ulihi harta urang Candi tu tadi.

Nintu tu jer urang tuha bahari nang penting kita bausaha dulu, hasilnya kaena Tuhan nang manantua-akan. Hen nyambung lah yoo pesan moralnya ni, pina musti banar ulun ni bapapadahan lah, hahaha.

Manurut bubuhan pian pang apa pesan moral nang kawa diambil dari Kisah Gunung Candi ini? Ayu tulung bantui jawabakan di kolom komentar lah.

Sekian dulu nah kisah dari ulun. Mudah-mudahan kita masih kawa batamu lagi di post Banjar Corner nang berikutnya.

Wassalamu'alaikum warahmatullahi wabarakatuh.

***

Nang manulis: Ira (www.irabooklover.com)

Nang ma-edit: Enny (www.ennyratnawati.com)