Langsung ke konten utama

Wadai Cinta Matan Amuntai

Assalamu'alaikum acil-acil, paman-paman, kaka-kaka lawan ading-ading ulun nang ulun sayangi. Salam sejahtera gasan kita sabarataan. Mudah-mudahan kita semua selalu dalam keadaan selamat, baik di dunia maupun di akhirat ^^

Hari ini ulun handak mangacari bagian pian pulang nah lawan kuliner khas Amuntai, *lambaiakan kakamban habang*. Kuliner pilihan ulun kali ini ngarannya wadai cinta. Nah, suah lah pian marasa-i? Wadai nang sabuting ni terkenal banar di Amuntai. Ngarannya gen harat. Wadai cinta, singkatan dari CINcin TAlipuk, mbuahahaha.


Sepiring wadai cinta (⺣◡⺣)♡*


Cincin talipuk diulah dari biji buah kambang taratai nang banyak tumbuh di daerah rawa di Amuntai. Biji buahnya ni ditumbuk halus wan diayak supaya jadi galapung. Galapung ini lah nang diulah jadi wadai cincin tadi setelah ditambahi gula habang, gula pasir, wan galapung baras.

Walaupun ngarannya cincin, tapi bentuk wadai nang ngini lebih mirip donat mini karena luangnya sabuting ja, kada ampat kayak wadai cincin biasanya.

Rasanya gen jauh banar lawan wadai cincin biasa. Rasanya tu empuk-empuk khas talipuk. Nang kayak apa rasa talipuk tu bingung jua ulun kayak apa manjalasakannya, haha, maklum ulun lain ahli kuliner. Mun bagian pian handak tahu kayak apa rasanya, silakan datang ka Amuntai, hihihi.

Cincin talipuk ni murah haja harganya. Pas tulisan ini dibuat, harganya masih 5.000 rupiah untuk 13 buting cincin.

Cincin ini nyaman banar di makan haratan masih hangat. Tapi sayangnya manurut ulun, wadai nangini kada tapi pas dijadikan oleh-oleh, soalnya sampat dingin dah inya, hanyar sampai ka tampat tujuan.

Alhamdulillah wayahini nini-nini nang bajual cincin talipuk ni ada jua bajual adonannya.  Jadi mun handak nyaman dijadikan oleh-oleh, nukar adonannya haja, habis tu sanga sorang pas sampai di tempat tujuan, jadi yang handak kita bari oleh-oleh kawa marasai wadai cincin talipuk pas haratan hangat-hangatnya, *nyam nyam*.

Adonannya ni sadang haja harganya. 25.000 rupiah gasan saparat kilo. Saparat kilo tu lumayan banyak manurut ulun mun dijadiakan cincin.

Talipuk ni selain diulah cincin, bisa jua diulah dodol talipuk lawan walatih talipuk. Hen penasaranlah pian kayak apa wujudnya jua wadai nang dua nih? Kaena insyaAllah ulun tulisakan jua di sini. Ulun bakuliling pasar dulu nah mancari-akan wadainya, soalnya dodol lawan walatih talipuk ni wayahini mulai ngalih dicari.

Omong-omong, talipuk ni sakalinya sudah suah babuat di tivi. Hen, kaya apa am tadahulu wadai eksis di tivi daripada ulun, wkwkwk. Ulun sematkan lah videonya di bawah ini kalo pian handak manuntun jua XD


Nah, sekian dulu lah kisah ulun tentang cincin talipuk. Mudah-mudahan dilain kesempatan kita kawa bakisahan tentang wadai khas Banjar lagi ;)

Wasalamu 'alaikumwarahmatullahi wabarakatuh. 

***
Nang manulis: Ira (www.irabooklover.com)

Komentar

  1. Ulun katuju banar makan cincin ini, wadai Banjar paling favorit dah XD

    BalasHapus
    Balasan
    1. Inggih Ka, dasar nyaman wadai cincin nang sabuting ni ^^

      Hapus
  2. Mirip cincin biasalah cuman lobangnya 1aja hihi. Dasar nyaman cincin cuman kalau ni td dr tepung biji teratai kah? Umaa ngalih nya mencari lah..

    BalasHapus
    Balasan
    1. Inggih Ka, dasar ngalih mancari, kambang taratainya biasanya banyak ditemukan di daerah rawa ja.

      Hapus
  3. Hanyar tahu ulun talipuk tu maksudnya diulah dari biji teratai, cincin ni ketujuan ulun banar.
    Semalam ada hanyar menukar di gambut, lagi hits kalo wadai cincin dijual di pinggir jalan wahini haha

    BalasHapus
    Balasan
    1. Alhamdulillah, ulun malah hanyar tahu kalau wadai ni ada dijual di Gambut jua, hihihi

      Hapus
  4. umaaaa...nyaman bener wadai cincin nang ini. ulun ketujun mun bejalan arah gambut menukar ini. hehehe. parak pasar gambut buka sampe jam 5 sore tuh kak ae

    BalasHapus
    Balasan
    1. Inggih Ka, alhamdulillah ada sudah urang bajual wadainya di Gambut, kada jauh lagi mun handak manukar ka Amuntai XD

      Hapus
  5. Wadai yang ulun suka ini. Enak banae kalau makan sambil minum teh. Ditemani suami pula hihi

    BalasHapus
    Balasan
    1. Inggih Ka, dasar nyaman wadai ni bila dimakan bakawan lawan teh dan keluarga tercinta ^^

      Hapus
  6. waw sampai ada yutubnya jua leh. mantab banar wadai cinta ni

    BalasHapus
    Balasan
    1. Inggih Ka, mantap wadai cinta ni masuk TV nasional sudah, hihi

      Hapus
  7. hanyar tahu ih wadai cincin amuntai. ada kawan di kantor bejual dikira sama haja lawan kaya cincin di sini sekalinya lain lah bahannya

    BalasHapus
  8. Aku kurang suka sih wadai ini, soalnya pas aku nyoba manis banget dan kurang pas aja rasanya huhu


    Salam,

    www.rizkyashya.com

    BalasHapus
    Balasan
    1. Oh inggih Ka, kawa tu kaena pian spesial request lawan acilnya minta ulahakan nang tasadikit gulanya supaya kada manis bangat ^^

      Hapus
  9. Hahahaha ulun kira nang kaya apakah wadainya neh, sekalinya wadai cincin tapi dibentuknya sedikit beda leh.

    BalasHapus

Posting Komentar

Postingan populer dari blog ini

Pantun Basa Banjar Gasan Manjaga Warisan Budaya

Assalamualaikum sabarataan. Alhamdulillah ulun akhirnya berkesempatan manulis lagi disini. Buhan pian penasaran apa yang handak ulun kisahakan kah? Lakasi baca lah. Di tulisan ini ulun handak bakisah soal pantun basa Banjar. Buhan pian mungkin sudah tahu, urang Melayu tu kada talapas lawan kabiasaan bapantun. Urang Banjar nang sarumpun lawan Melayu damintu jua, harat-harat baulah pantun. Pantun basa Banjar kada balain pang lawan pantun basa lain. Ada katantuannya jua nang musti diumpati. Mun kada diumpati pantun nang diulah kada baik atawa bisa jua kada kawa disambat pantun. Mun kita maulah wadai tu ada tuangannya. Mun maulah baju, ada polanya. Sama haja lawan pantun. Pantun nang baik ada katantuannya, ada tuangan, ada polanya jua, ngini nah: 1. Pantun nang bagus tu baisian ampat buting baris. Dua baris nang panambaian ngarannya sampiran. Dua baris nang pauncitan ngarannya isi. 2. Pantun nang bagus tu ada pola bunyinya, atawa pola parsajakannya. Polanya tu: ab-ab. 3. Pantu

Tidak Kalah dengan Ibukota Provinsi, Ini 4 Kafe di Barabai yang Wajib Dikunjungi

Halo Kaka-Kaka bungas yang lagi membaca tulisan ini, mudahan sehat sabarataan lah. Kenalkan dulu nah, ulun Eca anggota FBB jua dan tulisan ini nih tulisan perdana ulun di Banjar Corner. Selamat membaca 🤗 Tau lah bubuhan pian di wadah ulun Barabai bisi 4 kafe nang kada kalah lawan di Banjarmasin? Han kada tau kalo, makanya bacai sampai tuntung lah. Barabai Hulu Sungai Tengah sabujurnya lain kota kelahiran ulun. Tapi, kayapa pun jua, ulun sudah lawas bagana di sana dan sudah tarasa jadi tanah kelahiran ulun saurang. Ulun mulai bagana di Barabai semenjak kelas 1 SMP. Waktu ulun masih sakulah itu, dasar balum ada nang ngarannya kafe nginih. Ulun lawan kakawanan dahulu bejalanan ke kedai atau depot haja. Nah, wahini lumayan banyak sudah cafe yang kawa dipakai hagan “feed” Instagram bubuhan pian. Ini nah yang menurut ulun musti pian kunjungi. 1. Hero Cafe Nah, kabalujuran banar ulun lawan anggota FBB nang lain suah bakumpulan di Hero Cafe ini mun pas handak betamuan. Di sini rami

8 Macam Wadai Banjar

Assalamualaikum, Dangsanak berataan. Kayapa habarnya nih? Mudah-mudahan sihat berataanlah. Aamiin.  Hari ini ulun handak menyambatakan ngaran-ngaran wadai khas urang Banjar. Banyak banar macamnya, tapi nang ulun kisahakan hari ini 8 buting haja. Amun handak sebarataan, dua hari dua malam kada tuntung kita bekisahan. 1. Wadai Lapis sumber : http://dapurummumusasyi.blogspot.com/2013/10/kue-lapis-kakao.html Wadai nang pemulaan ngarannya wadai lapis. Kamiran atawa adonannya biasanya diulah dua warna, imbah itu disumap salapis-salapis beliung-liung warnanya. Bila sudah pina karas salapis, hanyar dindaki lapisan di atasnya pulang. Harus sabar pang tu pang meulah wadai lapis ngini. Warna nang paling rancak diulah tu hijau putih atau cuklat putih. Meulah wadai lapis ngini biasanya di dalam cipir ganal nang dimasukakan ka dalam panci badandangan. Bila sudah masak kaina hanyar dihiris halus-halus sasuai salira. 2. Lumba Sumber : http://beritainfo.web.id/ Lumba ni tamasu