Langsung ke konten utama

Tempat yang Wajib Dikunjungi Di Barabai


Assalamu'alaikum,

Hari ini ulun handak bekisah tentang liburan ulun waktu ke Barabai. Kanapa jadi ulun sambat liburan, karena dasar lain rumah ulun di sana lawan dasar lain bulik kampung jua. Ulun dasar bujur handak bajalanan lawan kawan ulun, si Eca.

Nah, ada dua tampat wisata nang kawa buhan pian kunjungi sekali jalan yang ulun rekomendasi-akan karena tampatnya basubalahan banar. Asli kayak betetangga. Nah dua tempat wisata tadi yaitu Gua Limbuhang, Haliau lawan Baruh Bunga Outbound.

Ulun bakisah sabuting-sabuting dulu lah. Nang handak ulun kisahkan pertama ni Gua Limbuhang karena dasar disitu pendahuluan yang ulun datangi lawan Eca. Habis tuh sorenya hanyar ulun ke Baruh Bunga Outbound.

1. Gua Limbuhang, Haliau

Kalo dari rumah Eca di Barabai tu, rasanya kada lawas pang dijalan, asa setumat aja parasa ulun. Palingan 15 menitan bisa kalo kada salah.

Pas awal datang tuh langsung kawa bafotoan, banyak sudah spot nang disediakan gasan bafoto. Tahu banar ampunnya nih pada urang katuju bafotoan wayahini. Hihi



Sebelum bujur-bujur masuk ka dalam, nyata dahulu bayar karcis masuk. Karcisnya tu rasanya kada larang. Palingan 5 ribu atau 10 ribu kah yu, kada ingat lagi ulun. Yang pasti murah haja tuh.

Suasana di sini pipina panas, pipina dingin tergantung lagi bediri di mana. Bujuran tu lain cuacanya yang meubah tapi dasar lokasinya. Kalo cuacanya dasar bujur panas banar pang hari itu tuh. Mana ulun pakai baju yang gasan urang musim dingin ha pulang, yang bajunya tetutup sampai ke gulu-gulu tuh nah. Haha

Babulik pulang kita bakisah nang tadi. Nah, imbah masuk, makin banyak lagi spot gasan bafotonya. Ada model kaya danau, dipinggirnya ada rumah. Ada ayunan jua di parak rumah nang ada danaunya. Ada model wadah befoto nang kayak tempat sarang burung yang kita kawa babuat. Banyak banar pokoknya.

Ulun handak maminta maaf dahulu nah sebelumnya, gasan spot foto lawan nang lainnya ada muha ulun sabarataan, kadada nang ulun kadada. Jadi, maklumi haja lah. Hihi.

Nah, di bawah ini lokasi spot fotonya.






Nang paling mambari takutan ni lah pas turun tangga handak bafoto model kayak danau nang ada guhanya, ngeri banar tuturunan tangganya. Bujuran tu, asa wani asa kada kami turun.

Habis turun tuh naik parahu karet kami. Nah ini jua mambari takutan banar, rasa handak tabalik parahu karetnya. Rami pang di sini, tapi asa kadada nang bagusnya jadinya foto gara-gara takutan di parahu karetnya tadih.

Ini ditangah-tangahnya ada model akar pohon yang kawa diduduki gasan bafoto. Tapi bujur-bujur lah duduk di sini, kalo pina tagugur, mun gugur ta ka banyu-am gugurnya. Haha.

Bujuran maulah manggitir di sini. Mana tapikir macam-macam ha pulang kalo pina tagugur. Takutan ada inilah, takutan ada itulah, padahal nang kalihatan di bawah tu cuma iwak halus aja pang nang pina rami. Tapi biar ada iwak halus aja gen, jangan jua sampai tagugur lah. 😛


Intinya tuh di sini banyak spot gasan bafoto. Mulai dari nang biasa sampai nang luar biasa. Jadi pilih haja handak nang mana buhan pian.


2. Baruh Bunga Outbund

Baruh Bunga ini asli pas disabalahnya Gua Limbuhang tadi, jadi bila buhan pian keluar parkir, kasabalah haja mata balilihat, langsung tu kalihatan.

Nah, ulun ka Baruh Bunga Outbound ni sore banar sudah, pas handak bulikan. Dua jam sebelum tutup ulun datang ka sini, supaya kada panas lawan supaya kada rami jua.

Di sini ni sesuai dengan namanya, ada outbound lawan ada kolam renang. Banyak jua spot fotonya, kada kalah pang lawan Gua Limbuhang tadi. Di sini ada jua model basecamp nang gasan manginap kayak itu nah.




Baruh Bunga ni talarang pang bayar masuknya parasa ulun daripada tempat wisata lainnya di Barabai. Kayaknya gara-gara ada kolam renangnya tu pang nang malarangi lawan dijaga TNI jua. Amun dijaga TNI ni tabersih pang pasti lokasinya, sepengalaman ulun sekolah dibuhan tentara, jadi kebanyakan bersihnya daripada kadanya,

Karena ulun datang kesorean jadi fasilitas outbound-nya tutup sudah. Ulun sampat befotoan haja lawan mandi di kolam renangnya.

Kolam renangnya ni model kayak waterboom mini, ada kolam gasan kakanakannya ada jua kolam gasan urang tuhanya. Nang di kolam orang tuhanya ni ada jua ember babaliknya  lawan ada dua dungsuran yang merami-i, tapi kada seseram di waterboom nang gonol tu pang. Ada jua dungsuran halus di kolam kekanakannya lawan ada kayak pancuran banyu.

Nang di kolam dewasa ni ketinggiannya ada dua tingkat, ada nang dalam banar, ada nang kada tapi dalam. Inya ada batasnya antara kedalaman satu lawan kedalaman sabutingnya, jadi tanang haja.

Dipinggir kolamnya ni nyaman ada nang kayak rurumahan tu, gratis. Disamping wadah santainya tadi, langsung ada wc lawan kamar mandi, barasih haja tuh gasan babilas.

Mun handak makan ada ja jua warung. Di sini sambil berkunjung buhan pian sambil disetelakan musik, jadi rame haja tuh jua kayak di kota, kada kalah pang. Hehe

Nah, nintu pang dua tempat sekali jalan nang ulun rekomendasikan gasan buhan pian nang handak ka Barabai. Kalo handak liburan tapi baisi waktu sahari haja, kawa banar ka dua tempat nang jar ulun ni tadi.


Ditulis oleh  : Rima Angel @ www.rima-angel.com
Editing oleh : irabooklover @ www.irabooklover.com

Komentar

  1. Ulun lawan laki ulun pernah jua ke Baruh Bunga, pas handak tutup jua, jadi kada sempat merasai flying fox-nya, hiks. Mudahan kena ada kesempatan bajalanan ke sana pulang. Aamiin ^^

    BalasHapus
    Balasan
    1. Aamiin..mudahan pian kawa bajalanan ka sana pulang. Jangan kada ingat sungsungi datang supaya kawa umpat ba flying fox jua ^^

      Hapus
  2. Lawasnya ih kada ke barabai, dan belum pernah jua ke wisata ini. Mudahan kena ada kesempatan bejalanan ke barabai handak jua ke tempat wisatanya nih. Pina rami banar am hahaha

    BalasHapus
    Balasan
    1. Kada pina lagi Ka ai, dasar bujuran rami, hayu lakasi ka sini ^^

      Hapus
  3. Sama nah. Lawas banar kada ka barabai dan banyak perkembangan wisatanya. Pabila kah sampai barabai lagi nah

    BalasHapus
    Balasan
    1. Inggih, ulun doakan semoga pian ada kesempatan kawa bajalanan ke Barabai Ka ai, Baruh Bunga lawan Guha Limbuhang manunggu, hihihi.

      Hapus
  4. Balum parnah ka barabai, tp kaina handak ai mencobai bajalanan kasana, apalgi barabai ni banyak bajual apam dan pula nyaman heheh

    BalasHapus
    Balasan
    1. Inggih akur banar, apam Barabai dasar terkenal nyamannya Ka ai, maulah karindangan ^^

      Hapus
  5. kada kalah kerennya objek wisata di kalsel ini. aku mambayangkan duduk di ayunan yang akar tu, bisa gugur ka banyu wkwkwk

    BalasHapus
    Balasan
    1. Wkwkwkwk, kaena ulun manjaga-akan di bawah Ka ai supaya pian kada tagugur ka banyu XD

      Hapus
  6. Lawas BNR kd pulkam kebarabai wkk handak pang berjalanan ke dua wisata ini kena wkk

    BalasHapus
    Balasan
    1. Inggih, bila pulkam kaena cuss langsung ka dua tempat wisata ni Ka lah ^^

      Hapus
  7. Mantap Rima, sudah bekujuk ke sana ke mari di Barabai. Aku ja balum seberataan tempat-tempat di atas kudatangi. Hehe.

    BalasHapus
    Balasan
    1. Hen pian tuan rumah maka tadahulu Ka Rima, wkwkwk. Tapi parak ja pian Ka ai mun handak ka dua tampat wisata ni, tanang ja XD

      Hapus
  8. Uma ih dari lawas handak ke baruh bunga tu kada tetulak2 jua. Mudahan bulan2 kaina jadi kesana

    BalasHapus
    Balasan
    1. Aamiin, mudahan pian kawa jua marasa-akan raminya baruh bunga ^^

      Hapus
  9. Kenapa Barabai itu jauh sekali dr Banjar huhu

    Pengen main kesana juga 😄


    Salam,

    www.rizkyashya.com

    BalasHapus

Posting Komentar

Postingan populer dari blog ini

Tidak Kalah dengan Ibukota Provinsi, Ini 4 Kafe di Barabai yang Wajib Dikunjungi

Halo Kaka-Kaka bungas yang lagi membaca tulisan ini, mudahan sehat sabarataan lah. Kenalkan dulu nah, ulun Eca anggota FBB jua dan tulisan ini nih tulisan perdana ulun di Banjar Corner. Selamat membaca 🤗 Tau lah bubuhan pian di wadah ulun Barabai bisi 4 kafe nang kada kalah lawan di Banjarmasin? Han kada tau kalo, makanya bacai sampai tuntung lah. Barabai Hulu Sungai Tengah sabujurnya lain kota kelahiran ulun. Tapi, kayapa pun jua, ulun sudah lawas bagana di sana dan sudah tarasa jadi tanah kelahiran ulun saurang. Ulun mulai bagana di Barabai semenjak kelas 1 SMP. Waktu ulun masih sakulah itu, dasar balum ada nang ngarannya kafe nginih. Ulun lawan kakawanan dahulu bejalanan ke kedai atau depot haja. Nah, wahini lumayan banyak sudah cafe yang kawa dipakai hagan “feed” Instagram bubuhan pian. Ini nah yang menurut ulun musti pian kunjungi. 1. Hero Cafe Nah, kabalujuran banar ulun lawan anggota FBB nang lain suah bakumpulan di Hero Cafe ini mun pas handak betamuan. Di sini rami

Belajar Istilah Banjar

  Halo! Apa habar buhan pian sabarataan? Mudahan baik ajaa lah sabarataan, sehat selalu dan dijauhkan dari panyakit.   Nah kali ini ulun handak memadahkan beberapa istilah dalam bahasa Banjar yang mungkin banyak dari pian masih balum tahu karena kada tebiasa berbahasa banjar sehari-hari, atau hanyar aja pindah ke banjar. Oiya, ulun ingat banar bahari pas SD balajar bahasa Banjar muatan lokalnya, amun wahini masih jua kah kakanaan tahu di istilah ni?   Berikut beberapa istilah dalam bahasa Banjar:   1. Salesmaan   Salesma sabujurnya adalah ngaran virus yaitu virus salesma, yang begejala behingusan atau pilek. Nah rancak urang tetap menyambat salesmaan jua amun ada nang kena flu karena gejala si salesma lawan flu nih mirip yang nyata bahingusan lawan batukan.   2. Hawai   Hawai nang ini lain ngaran wilayah lah, hawai nang dimaksud di sini tu artinya semacam sunyi tu nah, misalnya urang tebiasa di kota lalu bejalanan ke desa pasti lain suasananya, tebiasa pina rami

Kisah Intingan wan Dayuhan

Halo sabarataan, batamuan pulang lawan ulun, Nisa. Kali ini, ulun handak mangisahakan kisah Intingan wan Dayuhan nang rajin tu selalu dikisahakan bila ulun handak guring waktu lagi halus dulu. Kisahnya ni turun temurun dari zaman datu, nini, mama, anak sidin, dan cucu sidin, bisa jua kaina sampai ka buyut sidin. Kisahnya nih rami, sampai taguring guring mandangari kisah ini ja, lucu pulang han. Bila pian suah mandangar kisah Intingan wan Dayuhan, bararti kita sama. Zaman bahari kadada pang yutube wan intirnit. Nang ada kisah dari muntung ka muntung ja. Nang kaya apa kisahnya, ni ulun kisahakan nah ka bagian pian sakira kada panasaran. Kisah Intingan wan Dayuhan  Zaman bahari ada dua ikung badua ba-ading nang bangaran Intingan wan Dayuhan. Kisahnya Intingan nang jadi kaka, Dayuhan ading nya. Ibarat kata, si Dayuhan nih inya orangnya kada tapi paham apa yang di padah-akan tu, atau bahasa kitanya, ada nang kurang kaitu nah. Ujar kisah si ading nih kada hakun sakulah, mac