Langsung ke konten utama

Pentol, Jajanan Bukan Asli Banjar Tapi Disukai

Assalamualaikum,

Batamuan lagi kita. Kali ini ulun handak bakisah soal pentol. Ada yang kada pernah makan pentol? Atau malah kada tahu lawan pentol? Hehehe.

Setahu ulun di Banjarmasin ni banyak banar orang bejual pentol. Buhan penjualnya tu dikenal lawan sambatan paman pentol. Kenapa tadih jadi paman? Soalnya nang bejualan pentol jarang banar babinian, kebanyakan buhan lakian alias paman-paman jar urang Banjar biasa mangiyau.

Kalau buhan pian rancak makan pentol, pasti tahu, pentol ni bujur-bujur “mamabukakan”. Kayapa kada mabuk, urang nang memakannya asalnya handak nukar sadikit haja. Eh kada kerasaan, tarus memakan pentol dan kawan-kawannya. Akhirnya bisa 10.000 atau labih takaluar dari kantong sidin nang katuju mamentol ni, hehehe.

Pentol sebujurnya banyak di kota lain. Minimal mirip pentol. Yang ulun tahu, pentol ni lain asli Banjar panglah. Pinanya asli Jawa. Makanya nang bejualandi Banjar ni jarang banar urang Banua, tapi urang Jawa atau buhan Madura yang bediam di Banjar. Buhannya tu paham banar sudah bahasa Banjar jua.

Nah pentol ni aslinya Bakso. Cuman disini ada pentol kuah dan ada pentol yang kada bekuah. Pentol yang kada bekuah nih biasanya ada tersedia saus dan tomat. Kalau saus biasanya padas rasanya.

Nang uniknya penjual pentol keliling atau yang mangkal tu biasanya kada  manjual pentol bakso haja. Buhannya tu bejualan jua model gorengan tahu tempe sampai bejualan tahu yang beisi sedikit pentol jua. Ada jua nang bejulan hintalu gulung, sosis, sate pentol dan banyak banar lagi ragamnya.

Harganya murah banar pulang. Kayapa kada banyak nang katuju. Harganya mulai Rp 500. Paling larang, kalau pengamatan ulun di pentol keliling atau yang mangkal di Banjar nih, hanya Rp 2000 haja. Murah kalo?

Nang jadi ciri khas lagi, memakan pentol ni kada perlu pakai sendok garpu atau piring. Mamakannya pakai tusukan sate haja. Jadi pentolnya tinggal diambil dari wadah yang sudah disediakan buhan paman pentol. Habis tu, kalau handak saus atau betomat, tinggal masukakan tusukan pentol ka situ. Habis tu bisa langsung dinikmati. Praktis tu pang.

Cuman menurut ulun, yang mambari muar ni, sampahnya tu nah. Terutama sampah bakas tusukan urang makan pentol. Bisa kalau habis bedagang, dibarasihi pang lah lawan buhan paman pentol bakas makan buhan yang nukar tadi. Cuman, kada nyaman ae bila melihat bahamburan kaitu, hehehe.


Mudahan ae kedepannya buhan paman pentol keliling dan mangkal menyediakan tempat sampah gasan tusukan pentol hehehe. Dan buhan kita pembeli ni sadar jua. Nyaman jua hen kalau berasih tu malihatnya.

Nah itu dulu kisah ulun soal pentol. Mudahan lain waktu kita batamuan lagi.

Wassalamualaikum Warahmatullahi Wabarakatuh

Penulis : Enny R (www.ennyratnawati.com)
Editor   : Irabooklover (www.irabooklover.com)

Komentar

  1. Uma katujunya meliat tulisan di bannernya itu hahaha tapi dasar bujur am pasti cucuknya bahamburan. Untung ulun tim makan pentol bawa pulang, kada suka mencucuk di tempat.

    BalasHapus
    Balasan
    1. Inggih, ulun jua tim bawa bulik, bila mencucuk di tempat bisa khilaf, hihihi.

      Hapus
  2. Ulun akur banar lawan ide tentang paman pentol yang menyediakan tempat sampah gasan cucukan pentol tu. Kawa jua ni jadi ide gasan kegiatan komunitas. Misalnya membagikan tempat sampah portabel gratis gasan para paman pentol supaya ratiknya kada bahamburan lagi XD

    BalasHapus
    Balasan
    1. Mun sudah disediakan tempat sampahnya kada salah paman pentol lagi Ka lah bila bahamburan ratiknya ^^

      Hapus
  3. Aku suka pentol. Tapi suka dibawa pulang sih. Soalnya gk ada tempat duduknya :(
    Dan aku setuju banget tuh sama banner, soalnya ya tau sendiri kan, cucukan pentolnya bahambur :( dan itu lumayan merusak estetika.

    BalasHapus
    Balasan
    1. Inggih, mudahan baik nang manjual atawa nang mamakan pentol ni sadar akan kebersihan ^^

      Hapus
  4. Maka wahini lagi ngetren pentol nang padas-padas, jadi di pancill pentolnya becambur sambal pada kaytu sudah.
    Kalau ulun mun mencucuk pentol biasanya cucukannya ulun andak di gerobak pamannya aja atau bawa bulik wkwk.
    Biasanya ada jua pang paman pentol yang barasih, jadi disediakannya wadah ratik cucukannya tu.
    Mudahan masing-masing sadar, nang nukar sadar jangan bereratik nang menjual menyediakan wadah ratiknya. Ya kaloo

    BalasHapus
    Balasan
    1. Inggih, akur banar Ka ae. Kita perlu kesadaran kedua belah pihak supaya banua kita barasih ^^

      Hapus
  5. Pentol ni nyamannya pas masih panas lawan sore2, kaya menyanyati tuh .. Belum lagi yg pentol bakar, harumnya mulah kepingin .. Semoga paman pentol lainnya menyediakan wdah gsan smpah skira kd bhamburan hehe

    BalasHapus
  6. hahaha ternyata berataan penggemar pentol. bujur lo, munyak lalu melihat behamburan ratiknya...hihihi. oh iya peringatan paman pentol jangan mehamburi ratik tu ada di siring hehehe..

    BalasHapus
    Balasan
    1. Inggih bujur, Ka, muyak lalu malihat ratiknya bahamburan tu. Mudahan kita barataan sadar untuk manjaga kebersihan.

      Hapus
  7. ulun jua penggemar pentol nah. hari-hari nukar pentol lawan bibi yang rancak ke kantor

    BalasHapus
    Balasan
    1. Nah, akhirnya ada jua bibi, kada malulu paman haja yang bisa bajualan pentol Ka lah XD

      Hapus
  8. Bujur banar memabukakan. Semalam daei rumah niat handak menukar 10rb haja, sampai sana sekeluargaan makan timbul 35 rb, han napa tiya

    BalasHapus
  9. padahal nang bararatik ni nang manukari pentol kanapa paman pentolnya nang ditagur. bah iya banar...

    BalasHapus
    Balasan
    1. Ya am jer paman, seharusnya kebersihan tu tanggung jawab bersama ^^

      Hapus
  10. Pentol ni dasar nyaman banar pang, apalagi mun mamakan langsung di tempat. Kawan ulun dari Jawa awalnya kada tahu pentol tu napa, oh jarnya itu kami menyambatnya bakso. Hehe.

    BalasHapus
    Balasan
    1. Pian masuk tim makan pentol di tempat bearti Ka lah, hihihi.

      Hapus
  11. Aku pas ke Banjar jg terkaget kaget kenapa setusuknya mahal banar.

    Tapi aku suka, apalagi yg d dekat rs islam bisa abis 10ribu lebih

    Salam,

    www.rizkyashya.com

    BalasHapus

Posting Komentar

Postingan populer dari blog ini

Tidak Kalah dengan Ibukota Provinsi, Ini 4 Kafe di Barabai yang Wajib Dikunjungi

Halo Kaka-Kaka bungas yang lagi membaca tulisan ini, mudahan sehat sabarataan lah. Kenalkan dulu nah, ulun Eca anggota FBB jua dan tulisan ini nih tulisan perdana ulun di Banjar Corner. Selamat membaca 🤗 Tau lah bubuhan pian di wadah ulun Barabai bisi 4 kafe nang kada kalah lawan di Banjarmasin? Han kada tau kalo, makanya bacai sampai tuntung lah. Barabai Hulu Sungai Tengah sabujurnya lain kota kelahiran ulun. Tapi, kayapa pun jua, ulun sudah lawas bagana di sana dan sudah tarasa jadi tanah kelahiran ulun saurang. Ulun mulai bagana di Barabai semenjak kelas 1 SMP. Waktu ulun masih sakulah itu, dasar balum ada nang ngarannya kafe nginih. Ulun lawan kakawanan dahulu bejalanan ke kedai atau depot haja. Nah, wahini lumayan banyak sudah cafe yang kawa dipakai hagan “feed” Instagram bubuhan pian. Ini nah yang menurut ulun musti pian kunjungi. 1. Hero Cafe Nah, kabalujuran banar ulun lawan anggota FBB nang lain suah bakumpulan di Hero Cafe ini mun pas handak betamuan. Di sini rami

Pantun Basa Banjar Gasan Manjaga Warisan Budaya

Assalamualaikum sabarataan. Alhamdulillah ulun akhirnya berkesempatan manulis lagi disini. Buhan pian penasaran apa yang handak ulun kisahakan kah? Lakasi baca lah. Di tulisan ini ulun handak bakisah soal pantun basa Banjar. Buhan pian mungkin sudah tahu, urang Melayu tu kada talapas lawan kabiasaan bapantun. Urang Banjar nang sarumpun lawan Melayu damintu jua, harat-harat baulah pantun. Pantun basa Banjar kada balain pang lawan pantun basa lain. Ada katantuannya jua nang musti diumpati. Mun kada diumpati pantun nang diulah kada baik atawa bisa jua kada kawa disambat pantun. Mun kita maulah wadai tu ada tuangannya. Mun maulah baju, ada polanya. Sama haja lawan pantun. Pantun nang baik ada katantuannya, ada tuangan, ada polanya jua, ngini nah: 1. Pantun nang bagus tu baisian ampat buting baris. Dua baris nang panambaian ngarannya sampiran. Dua baris nang pauncitan ngarannya isi. 2. Pantun nang bagus tu ada pola bunyinya, atawa pola parsajakannya. Polanya tu: ab-ab. 3. Pantu

8 Macam Wadai Banjar

Assalamualaikum, Dangsanak berataan. Kayapa habarnya nih? Mudah-mudahan sihat berataanlah. Aamiin.  Hari ini ulun handak menyambatakan ngaran-ngaran wadai khas urang Banjar. Banyak banar macamnya, tapi nang ulun kisahakan hari ini 8 buting haja. Amun handak sebarataan, dua hari dua malam kada tuntung kita bekisahan. 1. Wadai Lapis sumber : http://dapurummumusasyi.blogspot.com/2013/10/kue-lapis-kakao.html Wadai nang pemulaan ngarannya wadai lapis. Kamiran atawa adonannya biasanya diulah dua warna, imbah itu disumap salapis-salapis beliung-liung warnanya. Bila sudah pina karas salapis, hanyar dindaki lapisan di atasnya pulang. Harus sabar pang tu pang meulah wadai lapis ngini. Warna nang paling rancak diulah tu hijau putih atau cuklat putih. Meulah wadai lapis ngini biasanya di dalam cipir ganal nang dimasukakan ka dalam panci badandangan. Bila sudah masak kaina hanyar dihiris halus-halus sasuai salira. 2. Lumba Sumber : http://beritainfo.web.id/ Lumba ni tamasu