Langsung ke konten utama

Jangan datangi tempat wisata ini di Barabai lah

Assalamu'alaikum kekawanan. Hari ini ulun handak bekisah nah tentang liburan semalam di Barabai - Hulu Sungai Tengah. Sayang banar tapi nah bekisahnya yang sedih dahulu lah.

Jadi sebulan nang lalu tuh ulun bejalan ke Barabai. Bejalanan ini neh sudah lawas banar dah dirancanakan tapi kada tejalan-jalan tadih nah napang jadwal kada sama tarus lawan jadwal handak bajalanan kesana. Ka Barabai neh sudah ulun rencanakan lawan kawanan yaitu Eca, Aya lawan Inezzt.

Singkat carita aja lah, 1 bulan nang lalu ulun ka Barabai matan Banjar tuh naik taksi kol aja. Sudah tahu aja kalo buhan pian kalo dari Banjar ke Barabai itu 3 jam-an biasanya tapi ini jadi 4 jam parak 5 jam-an sako di jalan apa paman taksinya pang singgah-singgah tarus makan. :D

Sampai di Barabai tuh ulun sore jadinya kalo. Rancana padahal handak bajalanan siang lawan kawanan tapi karna sampai sore tadih timbul kada sawat bajalanan heh. Jadinya malam haja ulun dibawai Eca ke cafe disana.

Nah lah, ulun dasar bemalam di rumah Eca, pas aja lawan rancana ulun samalam. Eca jua meolah akan ulun poin-poin handak bajalanan kemana aja pas ka sana tuh. Walau sudah diolahkan Eca tatap eiy kada sesuai rencana jua bejalanan tapi untung jamnya aja pang kada sasuai, tempat wisata yang dijalani sesuai aja sudah, sabarataan nang diolahkan Eca ulun datangi.

Jadi lah yang handak ulun kisahi ini seunting tempat wisata aja, tempat wisata yang manurut ulun mengecewakan hati banar, semacam meolah sakit hati datang jauh-jauh kasana. Ngaran wadah wisatanya itu tuh 'Pemandian Banyu Panas. Sasuai dengan judul jar ulun neh 'jangan datangi tempat wisata ini di Barabai'. Ulun meolah judul kada kesan supaya buhan pian mengklik tulisan ini pang tapi dasar bujur semacam kada layak didatangi oleh buhan pian apalagi bila pian jauh-jauh dari Banjar kayak ulun. Kasian buhan pian, makanya ulun kisahi akan nah.

Ulun dari bahari dasar handak banar bakunjung ke tempat wisata ini karena keluarga ulun bahari pernah ke situ dan bekisah-kisah lawan ulun. Tapi waktu keluarga ulun bejalanan tuh ulun kada umpat waktu itu makanya am handak banar ulun jadinya bajalanan ke banyu panas. Nah, tampat wisatanya neh dasar lawas pang jua keluarga ulun datangi, waktu abah ulun balum meninggal jua.

Ulun ke banyu panas tuh lawan Eca dan lawan kawan ulun jua Inezzt. Jadilah tampat wisata banyu panas neh, tempat wisata yang ulun nanti-nanti banar karna mandangar kisah dari keluarga ulun bahari tuh. Nah, si Eca neh sakalinya kada pernah jua ke situ walau bediam di Barabai. Kami ke sana tuh jalananannya atas patunjuk kawan Eca nang rumahnya parak sana.

Jalanan manuju ke pamandian banyu panas neh nyaman banar. Asli dah dinginnya tuh dingin sejuk kah jer orang tuh. Suasana nang kaya di pagunungan tuh pang. Dinginnya nyaman banar padahal kami siang hari manggantang ke sana tuh. Pas mulai parak sampai tuh di muka desanya kami di hadang bapa-bapa sudah, gasan bayar masuknya. Bayar masuknya murah aja rasanya seikung orang paling an 2 ribu kalo atau 5 ribu. Kada ingatan jua nah ulun neh harga bujurnya. Hehe. Imbah tuh sampai lagi kami di parkiran kalo. Di sini ada warung urang bajualan. Kada banyak nang bajualan, saikungannya haja. Sunyi banar rasa ulun neh tapi ulun abaikan haja. Jar ulun bisa karna lain hari libur kalo lah makanya sunyi.

Imbah tuh masuk eiy kami bajalan pulang kalo. Pas handak masuk ulun ada bakodak di depannya, bagus banar asri rasanya karna sepi. Haha. imbah bekodak kalo ulun bajalan lagi habis tuh ada warung lagi disana ditagih lagi duit masuk. Nang menjaga ibu-ibu. Ulun kada meingati pulang berapa bayar masuknya. Asli kada ingat lagi nang pasti murah aja pokoknya nah masuknya. Pas di warung ini neh ulun betakun, jar ulun jauh kah lagi tampat banyu panasnya? Ujar sidin parak aja lagi, bejalan ja jer.

Bejalan eiy nah pulang ulun lawan kakawanan tadi sambil bapanderan. Jar kami sunyi lah banyu panas neh sako gara-gara kita ka sini hari sabtu lain hari minggu. Amun hari minggu rami eiy kalo jer kami tadeh bapanderan. Kami bapanderan hanya sekedar bapanderan haja, kada tahu jua jawaban sabujurnya. Hihi.

Pas parak sampai ada kaliatan babarapa rumah warga lagi kalo lawan ada warung kaitu. Pas parak sampai rumah tuh ada nini-nini nang manjaga. Jar sidin bilanya mandi, ganti bajunya di sini jer, Ulun jawabi ja "inggih" jer ulun. Ini neh kami bayar lagi disini, kada banyak jua bayar. Seingatan ulun total sabarataannya tuh paling 10rb atau 15 ribu haja, murah ja pokoknya.

Sudah sampai kalo neh kami di banyu panas. Uma heh tampilannya mengecewakan ulun banar lawan kakawanan ulun karna tampatnya kada tarawat banar. Sayang lalu heh. Jadilah wadah mandinya tuh rigat kalo habis tuh kolamnya maka am balumut sudah. Ada jua lumpur-lumpurnya jua di dalam kolam. Uma kaya apa parasaan pian sudah jauh-jauh mun katamu tempat wisata nang kaini neh. Asli sedih banar kalo heh. Jer ulun nang kayak orang lagi sayang-sayangnya lawan pacar tapi ditinggal akan. Hahaha Kebanyakan baharap. Wkwk.

Kami betiga pas sampai banyu panas neh dudukan haja jadinya di bangku nang ada sambil bekisahan. "Kenapa jadi sampai kaini tampat wisatanya neh?" jer kami batiga. "Kada dikelola pemerintah kah atau apakah jadi sampai kaini?" Tapi itu bebaya pertanyaan kami yang kada tahu jawabannya lagi. Hanya sakadar bingung haja kami neh di sni. Ulun lawan kawanan paling duduk 10 menitan gasan menghilangkan uyuh banar am nah. Habis tuh babulik eiy kami pulang, Kadada kawa diapai-apai jua ha lagi disana.

Ini nah gambar pamandian banyu panas di Barabai-nya.







Seitu haja nah kesah ulun imbah bejalanan ke Barabai semalam. Mudahan ada manfaatnya gasan pian sebarataan lah. Wassalamu'alaikum warohmatullaahi wabarokaatuh.

Kontributor : www.rima-angel.com

Komentar

  1. Umay wahini pina kada teurus lah. lagi bahari ulun suah kesana. lagi zaman ulun SD rasanya. Ajaka dikelola dengan baik lawan pemerintah disana. Nyaman,am. menambah destinasi wisata kalsel kan bagus. yea khaan

    BalasHapus
  2. padahal daerah barabai potensi wisata alamnya besar.
    sayang ya kalau ada tempat wisata yg nggak terawat :((

    BalasHapus
  3. kasiannya gak keurus, sampe keluar lumut dan warnanya hijau huhu
    padahal bisa narik pengunjung nih buat mandi air panas, kan jarang jarang


    salam
    https://www.rizkyashya.com/

    BalasHapus
  4. supah ngakak nah baca cerita ini.bisa kaitu lahhh

    Harus dilaporakan nih ke pemda barabai, kenapa bisa kada terawat kaini tempat wisata? mana bayar lagi hahaha (walau murah).

    BalasHapus
  5. Uma sedihnya melihat, kaitu menjapai banyunya gin koler. Tapi banyunya bujuran panas kada nih?

    BalasHapus
  6. Wah sayang banget yah kak kalau ada tempat wisata yang gak terawat padahal potensi tuh datangin wisatawan

    BalasHapus
  7. Wah ini benar benar suah kesana. Pemandian banyu panas. Bahari pas kesini waktu kelas tiga sma nya masih bagus ini tempat. Wahini maka am, sayabg bener lah

    Dan bujur aja nih, panas banyu nya nyaman lalu hndk berandam

    BalasHapus
  8. Sayang banget ya sekarang ini, padahal aku berharap banget kalau tempat ini diurus dengan baik.

    BalasHapus

Posting Komentar

Postingan populer dari blog ini

Tidak Kalah dengan Ibukota Provinsi, Ini 4 Kafe di Barabai yang Wajib Dikunjungi

Halo Kaka-Kaka bungas yang lagi membaca tulisan ini, mudahan sehat sabarataan lah. Kenalkan dulu nah, ulun Eca anggota FBB jua dan tulisan ini nih tulisan perdana ulun di Banjar Corner. Selamat membaca 🤗 Tau lah bubuhan pian di wadah ulun Barabai bisi 4 kafe nang kada kalah lawan di Banjarmasin? Han kada tau kalo, makanya bacai sampai tuntung lah. Barabai Hulu Sungai Tengah sabujurnya lain kota kelahiran ulun. Tapi, kayapa pun jua, ulun sudah lawas bagana di sana dan sudah tarasa jadi tanah kelahiran ulun saurang. Ulun mulai bagana di Barabai semenjak kelas 1 SMP. Waktu ulun masih sakulah itu, dasar balum ada nang ngarannya kafe nginih. Ulun lawan kakawanan dahulu bejalanan ke kedai atau depot haja. Nah, wahini lumayan banyak sudah cafe yang kawa dipakai hagan “feed” Instagram bubuhan pian. Ini nah yang menurut ulun musti pian kunjungi. 1. Hero Cafe Nah, kabalujuran banar ulun lawan anggota FBB nang lain suah bakumpulan di Hero Cafe ini mun pas handak betamuan. Di sini rami

Bajukung di Atas Rawa

jejakrekam.com Di Kalimantan Selatan daerah pahuluan selain gunung dan sungai jua ada daerah rawa. Terutama di 3 kabupaten hulu sungai selatan, tengah, dan utara tergabung 3 daerah rawa.Nah di rawa ngini kadakawa pakai alat angkutan nang ganal jadi harus pakai jukung nang ramping supaya muat lawan kada santuk lawan di bagian bawah bila kamarau pas banyu surut. Jadi di awal bulan Juni samalam ulun sawat mancobai bejukung di rawa ngini. Tepatnya di daerah perbatasan antara hulu sungai tengah dan hulu sungai utara. Di permukaan rawanya hibak lawan tumbuhan banyu. Jadi jukung tu harus mambuka jalan dahulu. Bila takana rumputnya nang jadi sarang nyamuk benyamuk tunpang disangati nang di atas jukung. Makanya paman-paman nang mambawa jukung besangu obat nyamuk. Kada tahan jua obat nyamuk saking banyaknya nyamuknya. Oya, jukung ni dipakai gasan alat pengawasan kelompok pencari iwak. Rata-rata di sini mata pencaharian orang mencari iwak tarus pang. Tapi takana ada nang menyalahi aturan yaitu ma

8 Macam Wadai Banjar

Assalamualaikum, Dangsanak berataan. Kayapa habarnya nih? Mudah-mudahan sihat berataanlah. Aamiin.  Hari ini ulun handak menyambatakan ngaran-ngaran wadai khas urang Banjar. Banyak banar macamnya, tapi nang ulun kisahakan hari ini 8 buting haja. Amun handak sebarataan, dua hari dua malam kada tuntung kita bekisahan. 1. Wadai Lapis sumber : http://dapurummumusasyi.blogspot.com/2013/10/kue-lapis-kakao.html Wadai nang pemulaan ngarannya wadai lapis. Kamiran atawa adonannya biasanya diulah dua warna, imbah itu disumap salapis-salapis beliung-liung warnanya. Bila sudah pina karas salapis, hanyar dindaki lapisan di atasnya pulang. Harus sabar pang tu pang meulah wadai lapis ngini. Warna nang paling rancak diulah tu hijau putih atau cuklat putih. Meulah wadai lapis ngini biasanya di dalam cipir ganal nang dimasukakan ka dalam panci badandangan. Bila sudah masak kaina hanyar dihiris halus-halus sasuai salira. 2. Lumba Sumber : http://beritainfo.web.id/ Lumba ni tamasu