Langsung ke konten utama

Pantai Tanjung Dewa, Pantai Langkar di Kalimantan Selatan



Assalamuallaikum Wr.Wb

Apa habar pian sabarataan? Mudahan sehatan lawan selamatan haja sabarataan lah. Perkenalakan dahulu, ulun Winda. Anggota hanyar di FBB, wan ini tulisan pertama ulun gasan Banjar Corner.
Bahan pandiran yang ulun akan bahas hari ini adalah topik yang kawa meolah pian seberataan bahagia ditanggal seini, yaitu Liburan. Huaaaaa.....!!!

Kemana kita liburannya?

Nah, ulun handak merekomendasi akan sebuting pantai nang bagus di Banua kita ini yaitu, Pantai Tanjung Dewa. Suah kah sudah pian mendangar ngaran Pantai Tanjung Dewa nginih? Atau jangan-jangan pian sudah suah kesini?

Nah, bagi pian nang sudah suah kesini kita kompak dahulu.

Bagi nang balum, dari pada pian putar-putar di Mall haja baik pian atur rencana tulakan ke sini haja.
Yuk kita cari tahu kayapa garang Pantai Tanjung Dewa nih..

Pantai Tanjung Dewa


Pantai ini andakannya ada di Kec. Penyipatan , Kab. Tanah Laut, Kalimantan Selatan, parak lawan Pantai Batakan. Amun pian naik sepeda motor dari Banjarmasin jaraknya kawa ditempuh ±3 Jam, tergantung seberapa kuat pian meng-gas nya ja lagi. Mun ketuju meng-gas lakas sampai, ya kalo?

Imbah sampai disana, pian kawa malihat Pantai Tanjung Dewa nih balain sadikit dari kebanyakan pantai nang ada di Kalimantan Selatan. Amun di Pantai lain kita biasanya malihat pasir di sepanjang bibir pantai, Nah, di Tanjung Dewa nih kita disuguhakan pemandangan karang-karang nang keliatan eksotis banar, Selain itu di sepanjang bibir pantai nya jua bejejer pohon nyiur nang menambah bagusnya pantai Tanjung Dewa ini.





Balum lagi pemandangan gunung-gunung yang bejejer dari jauh, pokoknya bagus banar tu pang, lawan jua suasananya nang sunyi meolah kita marasa, ini pantai kita sorangan.

Warna banyu nya kada talalu bewarna biru wan tekananya sadikit karuh tapi banyunya tetap barasih. Dari Pantai Tanjung Dewa nih pian kawa malihat Pulau diseberangnya yaitu “Pulau Datu”. Amun pian handak kasitu biasanya penduduk di situ hakun haja meantarakan asal cocok lawan ongkosnya, kisaran harga menyewa kelotoknya biasanya sekitar Rp.70.000,-/kelotok.


   
Nah jar orang sana waktu nang paling pas ke Tanjung Dewa nih mulai sore ke malam hari soalnya andakan Pantai Tanjung Dewa yang ada di sebelah barat nih pas banar gasan malihat matahari tinggalam. Lwan jua sore hari urang sana mulai kaluaran gasan manangkap atau meunjun iwak.



Amun pian handak ka sini, ulun saranakan pian menyiapakan makanan lawan tikar sorang gasan wadah istirahat. Soalnya di pantai ini kadada orang yang meinjamakan tikar atawa tenda gasan pian benaung. Amun makanan ada haja pang acil-acil yang bewarungan diparak pintu masuk tapi kada sebanyak di pantai nang lain.

Kayapa? Tertariklah sudah pian mendatangi pantai nginih..?? Ayo kita jelajahi banua kita sorang. Karena di Kalimantan Selatan banyak jua wisatanya nang kada kalah kayak banua orang.


Penulis : Winda Ayu Lestari (http://www.windaayylest.com)

Komentar

  1. Ini kenapa pantainya keren banget sih dan aku belum pernah kesini sama sekali, bahkan baru tau banget dah ada pantai ini. Luar biasa ya mbak Winda rekomendasinya.

    BalasHapus
  2. Pernah sih denger Pantai Tanjung Dewa. Tapi belum pernah kesana >.<
    Btw, cantik yaaa pantainya... Jadi penasaran mau kesana

    BalasHapus
  3. Tuhh kan jadi pengen ke pantaii, bs jadi rekomendasi liburan hari raya nih sma kluarga apalagi sekarang lg suntuk bgt butuh refreshing, mkasih mba winda rekomendasinya jd pengen cuss lngsung hehe

    BalasHapus
  4. bagus nya leh pantai nya, kaina mun ada waktu handak merasai kesana

    BalasHapus
  5. Uma heh ulun ni ada 7 tahun labih sudah kada suah ka pantai. Handak ih jadinya bejalanan kesana limbah tuntung puasaan nih heheh

    BalasHapus
  6. Di tanah laut nih banyak banar pantainya leh. Balum bisa ke sana pang lagi nah. Tanjung dewa, ngarannya gin bungas banar.

    BalasHapus
  7. hanyar mendangar nah ngaran pantai tanjung dewa. lawas banar kada ke pantai di pleihari ih. pinanya betambah banyaklah pantainya

    BalasHapus
  8. Ashya baru tau kalo di pelaihari ada pantai juga, ku kira pantai banyak di kota baru :DD

    BalasHapus
  9. Hanyar tahu nah ada pantai tanjung dewa. Kw gasan jadi referensi u.tujuan liburan.

    BalasHapus

Posting Komentar

Postingan populer dari blog ini

Pantun Basa Banjar Gasan Manjaga Warisan Budaya

Assalamualaikum sabarataan. Alhamdulillah ulun akhirnya berkesempatan manulis lagi disini. Buhan pian penasaran apa yang handak ulun kisahakan kah? Lakasi baca lah. Di tulisan ini ulun handak bakisah soal pantun basa Banjar. Buhan pian mungkin sudah tahu, urang Melayu tu kada talapas lawan kabiasaan bapantun. Urang Banjar nang sarumpun lawan Melayu damintu jua, harat-harat baulah pantun. Pantun basa Banjar kada balain pang lawan pantun basa lain. Ada katantuannya jua nang musti diumpati. Mun kada diumpati pantun nang diulah kada baik atawa bisa jua kada kawa disambat pantun. Mun kita maulah wadai tu ada tuangannya. Mun maulah baju, ada polanya. Sama haja lawan pantun. Pantun nang baik ada katantuannya, ada tuangan, ada polanya jua, ngini nah: 1. Pantun nang bagus tu baisian ampat buting baris. Dua baris nang panambaian ngarannya sampiran. Dua baris nang pauncitan ngarannya isi. 2. Pantun nang bagus tu ada pola bunyinya, atawa pola parsajakannya. Polanya tu: ab-ab. 3. Pantu

Tidak Kalah dengan Ibukota Provinsi, Ini 4 Kafe di Barabai yang Wajib Dikunjungi

Halo Kaka-Kaka bungas yang lagi membaca tulisan ini, mudahan sehat sabarataan lah. Kenalkan dulu nah, ulun Eca anggota FBB jua dan tulisan ini nih tulisan perdana ulun di Banjar Corner. Selamat membaca 🤗 Tau lah bubuhan pian di wadah ulun Barabai bisi 4 kafe nang kada kalah lawan di Banjarmasin? Han kada tau kalo, makanya bacai sampai tuntung lah. Barabai Hulu Sungai Tengah sabujurnya lain kota kelahiran ulun. Tapi, kayapa pun jua, ulun sudah lawas bagana di sana dan sudah tarasa jadi tanah kelahiran ulun saurang. Ulun mulai bagana di Barabai semenjak kelas 1 SMP. Waktu ulun masih sakulah itu, dasar balum ada nang ngarannya kafe nginih. Ulun lawan kakawanan dahulu bejalanan ke kedai atau depot haja. Nah, wahini lumayan banyak sudah cafe yang kawa dipakai hagan “feed” Instagram bubuhan pian. Ini nah yang menurut ulun musti pian kunjungi. 1. Hero Cafe Nah, kabalujuran banar ulun lawan anggota FBB nang lain suah bakumpulan di Hero Cafe ini mun pas handak betamuan. Di sini rami

8 Macam Wadai Banjar

Assalamualaikum, Dangsanak berataan. Kayapa habarnya nih? Mudah-mudahan sihat berataanlah. Aamiin.  Hari ini ulun handak menyambatakan ngaran-ngaran wadai khas urang Banjar. Banyak banar macamnya, tapi nang ulun kisahakan hari ini 8 buting haja. Amun handak sebarataan, dua hari dua malam kada tuntung kita bekisahan. 1. Wadai Lapis sumber : http://dapurummumusasyi.blogspot.com/2013/10/kue-lapis-kakao.html Wadai nang pemulaan ngarannya wadai lapis. Kamiran atawa adonannya biasanya diulah dua warna, imbah itu disumap salapis-salapis beliung-liung warnanya. Bila sudah pina karas salapis, hanyar dindaki lapisan di atasnya pulang. Harus sabar pang tu pang meulah wadai lapis ngini. Warna nang paling rancak diulah tu hijau putih atau cuklat putih. Meulah wadai lapis ngini biasanya di dalam cipir ganal nang dimasukakan ka dalam panci badandangan. Bila sudah masak kaina hanyar dihiris halus-halus sasuai salira. 2. Lumba Sumber : http://beritainfo.web.id/ Lumba ni tamasu