Haruan, Iwaknya Urang Banjar

Sumber : banjarmasin.tribunnews.com/

Assalamualaikum,

Kayapa habar pian berataan? Mudahan sehat tarus lah. Kada kerasaan dua kali sudah nah ulun menulis di blog FBB. Bahari rasanya ulun menulis tentang bulan Muharram. Nah, kali ini ulun handak berbagi soal iwak haruan.

Suah ai kalu lah berataan makan iwak Haruan ((Channa striata)? Mun pian urang Banjar, harusnya pian biasa pang makan iwak haruan ni. Tapi ada jua pang urang Banjar nang kada katuju Haruan. Model sepupu ulun tu, nah. Kesahnya bahari, inya suah katulangan makan iwak Haruan, imbah tu kada hakun lagi makan Haruan, hehe..

Eh, buhan pian nang lain urang Banjar atawa kada suah bagana di Banjar bingung sako lah. Haruan tu sejenis iwak apa? Ulun kisahakan dulu. Haruan tu dalam Bahasa Indonesia ngarannya Ikan Gabus. Iwak ngini banyak di Kalimantan, Sumatera wan Pulau Jawa. Satahu ulun, Haruan ni paling dikatujui dua suku di Indonesia yaitu urang Banjar wan Betawi. Urang Palembang katuju jua pang gasan bahan mpek-mpek. Tanyaman jar pada iwak Tenggiri.

Iwak Haruan ni buhannya ae sekalinya tamasuk iwak predator (pemangsa). Inya kawa haja hidup di musim kumarau atawa musim panghujan. Hidupnya di sungai, danau wan rawa lawan jua di banyu payau. Ciri iwak haruan yang biasa kita tahu tuh nang awaknya panjang, kupala iwak mirip kupala ular, sirip punggung wan sirip anus panjang berdiri, bentuk sirip ekor mambulat, punggung bawarna kacoklatan parak handak hirang, bagian parut putih perak atawa tarang (Ramli dkk. 2010).

Kawakah malainakan haruan laki wan haruan bini? Kawa banar buhannya, ae. Kita bisa malihat tanda-tanda di awak Haruan. Haruan laki (jantan), kupalanya lonjong, warna awak takadap, lubang kelamin kahabangan wan munnya diurut nang kaluar cairan putih jaranih. Lamunnya iwak bini, kupala mambulat, warna awak tatarang, parut ganal wan lamah, mun diurut nang kaluar hintalunya. (Bijaksana, 2012)

IWAKNYA URANG BANJAR

Nah, manurut buhan pian kanapa iwak Haruan ni bisa dipadahakan iwaknya urang Banjar? Amun manurut ulun, hampir tiap hari matan baisukan sampai malam, iwak ini biasa ada di menu makanan urang Banjar. Sudah itu iwak ini bisa dipadahakan iwak paling larang di Banjar. Harganya makin larang kalau hari raya. Malabihi hayam atau daging sapi.

Buhan pian yang rancak ke pasar pasti tahu, iwak Haruan ini wahini harganya 60 ribu sampai 70 ribu sakilonya. Haraganya tu di atas iwak lain samacam iwak Nila, Peda, Gurame, Patin atau iwak laut. Nang manyamainya iwak Baung wan Papuyu haja (keduanya iwak Sungai yang banyak di Banjar jua).

Urang Banjar dasar katuju banar lawan Haruan ini. Bila baisukan, buhan nang bajual Nasi Kuning, Katupat Kandangan wan Lontong Banjar rasa kurang mantap mun kadada iwak Haruan. Padahal biasanya nang bedagang manjual jua hayam lawan hintalu gasan kawan nasi kuning, lontong dan katupat.

Haruan ni dasar nyaman pang dimasaki napa haja. Bapuluh macam masakan kawa diolah pakai iwak Haruan nih. Selain masak habang nang ada di buhan nasi kuning tadi, haruan nyaman banar dimasak asam, masak kecap, kambar banang (masakan besantan), dibumbu kuning, wan macam-macam masakan lainnya. Mun pian handak manyanga atawa mamanggang haja nyaman jua. Jangan kada ingat balah sambal acan-nya. Nyaman banar.

Haruan nang dikaringakan atawa urang manyambatnya garih haruan, jua banyak dikatujui, utamanya ulih urang Banjar. Ini jua nyaman dimasaki macam-macam. Mun kada disanga biasa, garih ni nyaman banar disantan. Urang manyambatnya hampap garih. Biasalah buhan pian memakannya?

Masih banyak nah masakan nang bisa diolah dari Haruan ni. Iwak rabuk, karupuk haruan sampai amplang banyak dijadiakan urang oleh-oleh bila datang dari Banjar. Nah, buhan pian katuju yang mana? Mun ulun sabarataannya katuju hehe.

Penulis : Enny Ratnawati
Blog : www.ennyratnawati.com