Bejejalanan ke Gambut

Assalamu’alaikum kekawanan,

Hari ini ulun handak bekisah tentang daerah tempat ulun tinggal wahini, yaitu Gambut. Amun mendangar ngaran Gambut, bisa urang bepikirnya ngaran lahan nang rancak tebakar tu kalo lah. Bujur jua pang. Tapi Gambut yang handak ulun kesahkan ini ngaran salah satu kecamatan di kabupaten Banjar. Andakannya tu beparakan lawan Banjarmasin ibukota Kalimantan Selatan. Yah, kira-kira 6 kilometer lah dari batas kota tu.

Biar hitungannya berparakan lawan ibukota Banjarmasin, bagi ulun Gambut ni masih desa pemandangannya. Kaya wadah ulun nih. Higa mehiga masih pehumaan. Tiap tulak begawi rasa damai tu pang melihat pemandangan hijau. Tapi pulang amun malam berasa sunyi wan dingin-dinginnya. Imbah tu kadada pulang urang bejualan makanan amun malam-malam. Sedih banar ulun jadinya.

Tapilah, ulun dangar-dangar Gambut ni wahini lagi meusahakan supaya kawa melepaskan diri dari Kabupaten Banjar. Nah ulun setuju banar lawan ini. Soalnya bediam di Gambut ni beurusanya jauh banar ke Martapura sana. Mana jua pembangunannya pina kada merata. Makanya am pihak tetuha  lagi meusahakan banar supaya tahun 2022 Gambut sudah jadi kabupaten sorang. Ujar sudah tecukupi pang syaratnya nang kaya jumlah kecamatan, ada jua universitas sudah di situ, hotel berbintang, wan pastinya jua perumahan nang makin hari makin betambah di Gambut sini.

Nah, amun pian bejalan ke Gambut nih, ada beberapa wadah makan yang kawa pian datangi. Nang pertama tu warung nasi gambut nang banyak betatai di parak pasar Gambut situ. Ada nang ngarannya Tenda Biru ada jua Mama Baiti. Dua itu ja pang nah yang pernah ulun cobai. Nasi itik ni sebujurnya nasi putih haja lawan iwak masak habang. Tapi pastinya rasanya tu belain pada sambal masak habang yang lain.

Amun sudah merasai nasi itik itu, kawa jua pian mencobai es nyiur di Gambut ni. Banyak jua inya bejejer di pinggir jalan. Tapi amun pian handak merasai es nyiur yang rami kawa singgah ke warung Mama Icha di pal 12. Ngitu terkenal banar es nyiurnya wan hibak tarus. Es nyiurnya gin bemacam-macam rasanya. Ada jua wadainya di situ nyiur anum gorengkah rasanya.

Biar hitungannya masih kayak desa, tahulah pian Gambut ni beisi hotel nang tinggi ngarannya Aston Banua. Inya bahari tu rasanya asalnya apartemen. Cuma ya ngarannya di Gambut siapa handak manukari. Akhirnya diubah jadi hotel Aston nang menyorangan di tengah pehumaan. Imbah tu tahun 2019 kena Insya Allah di Hotel Aston tu pacangan diulah mal. Bagus banar tu sekira warga Gambut kada bukah ke Banjar tarus mun handak bejalanan ke Mal.

Terakhir, di Gambut ni ada jua wadah rekreasi keluarga ngarannya Waterboom Pesona Modern di pal 11. Ulun sudah beberapa kali ke sana. Wadahnya dasar bagus gasan rekreasi. Kolamnya banyak wan lengkap aja fasilitasnya. Amun handak bejalanan ke situ bayar karcisnya 45 ribu hari biasa wan 60 ribu mun Sabtu Minggu. Amun kanakan bisa kada mau ampih pang bemainan banyu di sini kayak anak ulun. Hehe.

Itu haja dulu nah kesah ulun tentang Gambut. Ulun minta doanya supaya Gambut kena kawa lebih maju nang kaya kota nang di higanya. 

Kontributor : Antung Apriana (www.ayanapunya.com)