8 Macam Wadai Banjar



Assalamualaikum, Dangsanak berataan. Kayapa habarnya nih? Mudah-mudahan sihat berataanlah. Aamiin. 

Hari ini ulun handak menyambatakan ngaran-ngaran wadai khas urang Banjar. Banyak banar macamnya, tapi nang ulun kisahakan hari ini 8 buting haja. Amun handak sebarataan, dua hari dua malam kada tuntung kita bekisahan.

1. Wadai Lapis

sumber : http://dapurummumusasyi.blogspot.com/2013/10/kue-lapis-kakao.html

Wadai nang pemulaan ngarannya wadai lapis. Kamiran atawa adonannya biasanya diulah dua warna, imbah itu disumap salapis-salapis beliung-liung warnanya. Bila sudah pina karas salapis, hanyar dindaki lapisan di atasnya pulang. Harus sabar pang tu pang meulah wadai lapis ngini. Warna nang paling rancak diulah tu hijau putih atau cuklat putih. Meulah wadai lapis ngini biasanya di dalam cipir ganal nang dimasukakan ka dalam panci badandangan. Bila sudah masak kaina hanyar dihiris halus-halus sasuai salira.

2. Lumba

Sumber : http://beritainfo.web.id/

Lumba ni tamasuk wadai khas Banjar favorit ulun, rasanya nyaman pang. Kamiran lawan bantuknya mirip kaya surabi, tapi dimakan bajuruh gula habang. Ada jua nang menyambat lumba ni lawan ngaran ‘apam putih’ atau ‘surabi Banjar’. Dimakannya paling nyaman rahat panas-panas.

3. Amparan Tatak

sumber : http://jelajahsamboja.com/


Amparan tatak ni tamasuk dalam jenis wadai bahiris kaya wadai lapis jua. Amun wadai lapis, lapisnya banyak, amparan tatak ni dua haja lapisannya. Lapis bawah biasanya takaras, kamirannya matan galapung baras. Satangahnya lagi di lapisan atas nitu kamirannya matan santan. Nang unik, di dalam wadai amparan tatak ni rancak dibuati orang pisang behiris-hiris halus. Jadi pas wadainya ditatak kalihatan warna kuning pisang di antara warna putih amparan tatak.

4. Kolak

sumber : http://resepku.info/

Wadai khas Banjar nang kadakawa ditinggal manurut ulun adalah kolak. Datahuam mun di daerah lain kayaknya ada haja pang jua kolak, tapi amun di Banjar kolak tu khas banar diulah gasan bebuka puasa. Macam-macam jua isi kolaknya, biasanya nang paling banyak tu kolak pisang, kolak waluh, lawan kolak gumbili. Bahan-bahan kuah kolak biasanya santan campur gula habang lawan hintalu. Mun musim durian, ditambahi durian babarapa bigi. Beh, nyaman banar tu pang rasanya.

5. Gayam

sumber : http://srirahayukivers.blogspot.com/

Gayam diulah matan galapung baras lawan galapung lakatan. Kamirannya digiling bulat-bulat halus, ada jua nang taganal sadikit tapi kamirannya talain sadikit. Gayam dimasaki lawan juruh gula habang campur santan. Bulatan nang taganal rancak disambat ‘umanya’, nang tahalus ngarannya ‘anaknya’. Ngaran gayam ja banyak urang Banjar nang lain-lain menyambat, ada nang menyambat ngarannya ‘kikicak’, ada jua nang menyambat ngarannya ‘hintalu karuang’.


6. Pais

sumber : http://yusys.com/

Nah, wadai pais ni biasanya babungkus lawan daun pisang. Nang paling rancak diulah tu pais pisang atawa pais waluh, kamirannya campur galapung. Imbah dibungkus pakai daun pisang, dibantuk sagi ampat hanyar disumap dalam panci. Nyaman dimakan pas lagi panas-panasnya.


7. Bingka Barandam 

sumber : http://cookpad.com/


Bingka barandam ni lain lawan bingka biasa, bantuknya banarai nang sama kaya kambang. Kamirannya matan hintalu campur galapung. Hasil jadinya karing, kada basah kaya bingka biasa. Rasanya gin hambar ja. Tapi dimakannya lawan gula putih nang sudah dijarang lawan banyu. Mantap banar rasanya.


8. Kalalapun 

sumber : http://banjarmasin.tribunnews.com/

Kalalapun ni biasanya paling banyak dijual di Martapura. Kamirannya matan lakatan, isinya gula habang. Bantuknya bulat-bulat warna hijau, di luarnya diandaki nyiur baparut. Rasanya nyaman banar, pacah di ilat.

Nah nitu tadi dalapan macam wadai khas Banjar nang paling nyaman dimakan. Buan pian handak nang mana? Mun ulun sebarataan pang, nyaman barataan soalnya. Haha. []

Kontributor : Rindang Yuliani (www.rindangyuliani.com)

9 komentar:

  1. Paling ketuju wadai kalalapun, soalnya panduan gurih manisnya pas Sama sensasi gula habang pecah di mulut kada terasa habis lah sekotak :D

    BalasHapus
  2. Semua sukaa. Tapi yangbpaling suka tu bingka barandam. Apalagi gasan bukaan bulan puasa. Hmm, yummy...

    BalasHapus
  3. Banyak jua wadai yang ulun belum cobai. Nyaman banar dimakan sore lawan teh.

    BalasHapus
  4. Melihatnya rasa hdk bulan puasa.hahaha semua wadai suah di cobai tp yg paling diketujui kolak tiada tandingannya dah mantul

    BalasHapus
  5. Dari barataan wadai yang ada tu nisa katuju. Uma heh dasar nyaman banar wadai banjar nih. Apalgi bila dimakan baimbaian wan kula kula yang jauh, rasa makin berasa nikmat nya. Alhamdulillah

    BalasHapus
  6. Kira gayam lawan lumba tu wadai hanyar. Sekalinya lain penyambatannya haja lawan di banjar. Hehe

    BalasHapus
  7. Kalalapun nyamaam bonooorrr

    BalasHapus
  8. Aku nyambat gayam tu hintalu karuang pang lah. Asa canggung menyambat gayam. Malihat amparan tatak asa handak ramadhan sudah

    BalasHapus
  9. Wujudkan Impian Anda Disini & Ajaklah Teman-Teman Anda Semua Untuk Ikut Bergabung Bersama Kami Hanya Di http://www.dewalotto.me !!!
    Raihlah Mimpi Anda Setiap Hari & Jadilah Pemenang !!!

    BalasHapus