Langsung ke konten utama

Raminya Anak Iwak di Musim Panghujan




Assalamualaikum wr wb
Kali ini ulun handak maangkat kisah raminya anak iwak di musim panghujan. Sabalum bakisah, ulun handak manganalakan diri ulun saurang. Ngaran ulun Nisa. Ulun hanyar ja masuk Female Blogger of Banjarmasin, wan nginih ulun hanyar pamulaan baulah kisah bahasa Banjar 😁

Anak iwak itu apa? Bila kadada nang tahu, ulun padahi nah. Sambatan pakai ngaran anak iwak tu anaknya papuyu nang masih halus-halus, balum lagi jadi papuyu ganal. Inya bila musim panghujan nih rami bahintaluan. Kada kuduk haja, tapi iwak-iwak lain umpat jua bahintaluan. Bila anak haruan ngintu ngarannya anak buridisan, taganal sadikit anak kalacingan. Lain pulang di iwak sapat, bila halus ngarannya anak sapat, bila ganal sapat siam. Han banyak banar kalu ngaran anak di musim panghujan nih.

Jadi, bila arinya sing panghujan, rami anak iwak kaluaran, mulai nang halus kaya biji waluh sampai ganal kaya tatunjuk kakanakan ada macamnya. Saminggu partama anak iwaknya karicikan, kaya biji waluh halus masih, mambuangi paparutan gin kda kawa. Langsung dikisai di rangsang barasih am.

Minggu kadua, anak iwak ini sudah bamula ganal, nyaman disiangi balah parut, kada usah basisik. Napang inya masih halus, jadi kada bataha katulangan.

Minggu katiga, anak iwaknya sudah ganal, batulang ujar kita tu, habis sudah nang karicikan. Bagamat ai mamakan, luku katulangan. Ganal sudah ada dagingnya.

Minggu paling akhir, ini anak iwak sudah jadi mamanya. Gaganal inya ampih am jadi anak iwak, ngarannya baalih jadi iwak papuyu.

Nah amun babuhan pian panasaran harga anak iwak barapa di pasaran, baik Pasar Sanayan, Pasar Arba, Pasar Ahad--ngintu ngaran pasar nang ada di kampung ulun tih--sama haja harganya amun pamulaan nginih, saparapat 25 ribu. Sakilu 100 ribu. Ngintu nang hanyar kaluaran, ujar urang tu handak marasani nang pamula. Bila sudah lawas tu harga nya tu 50 ribuan sakilu. Sadang haja ah. Kada bahimat jua manyiang. Sakit tangan.

Nah kakawanan, anak iwak tu nyamannya dimasak basanga kaya manyanga iwak biasa. Hirisi bawang, kacaki uyah wan asam kamal, baulah cacapan ramania. Ih sigar. Acil gin titik liur mahayalakan. Bisa jua dipais, buati kaminting, janar, bawang habang sapakawanan nyaman jua nih. Banyiur magin nyaman. Parut nyiur kulut, di daun pisang, kukus. Uma sigar makan heh. Nang tarakhir nang ulun katuju, masak batuup. Ngintu buati banyu, buati asam kamal, tambahi sarai. Pas makan parahi limau sambal. Umaaa sigar banar bujuran nih 😁 Masak apa haja nyaman kakawanan ai, asal kita maulah surang handak disanga, dijarang, disumap, diapai kah, asal jangan dimakan mantah. Kada nyaman ngintu, takuni ha nang lain.

Sudah lah tarasani anak iwak bagian pian? Ayuk bakisahan masak nang digawi. Nyaman dah. Oke.
Kaitu pang. Intinya bila musim panghujan nih kada jas hujan wan payung nang payu. Anak iwak sadayau gin mambawa habis, saking raminya wan bamusim ini pang tih urang bila musim hujan mahadangi anak iwak.

Kontributor: Nisa (www.nisazet.com)
Editor: Gita (www.jurnalgita.com)

Komentar

  1. Bahari ulun waktu kanakan rajin banar neh menanggung iwak bila musim hujan neh, kadang mainan diselokan (aduh ini jangan ditiru) meambil iwak halus kesan mainan lawan bila mandi di matang, meambil undang biasanya. :D

    BalasHapus
  2. dasar bujur nah..ni anak iwak banyak abnar di pasar hahaha #penggemarpasar

    kalau nini di rumah..di pais sidin lawan nyiur anum.nyamannya ih.kada ampih2 tu pank makan..betambah tarus hahaha

    BalasHapus
  3. Aku katuju banar bila ada iwak ini pasar, apalagi yang beras kuning masak samu tu, ketuju banar aku mun tetamu pasti nukar

    BalasHapus
  4. Ulun kada katuju makan iwak sayang ny cil ae..dimapa am?haha anu cil ae mun wadah kami di Barabai anakan nih nyaman banar di ulah pakasam.tapi wahini sudah ngalih dicari, sual nya kada bulih lagi ditangkap pulisi naham *kisah ulun drama bnr ditangkap pulisi ujah .haha

    BalasHapus
  5. Mambaca tulisan ngini timbul kacar nah handak beulah iwak basanga lawan cacapan asam kamal. Mangganang jua lawan pakasam ih. Umaaa titik liur ulun nah ��

    BalasHapus
  6. Ulun ketuju banar jua makan anak iwak haruan nang sudah besamu. Dimasak asam manis habis tu pang sorangan

    BalasHapus
  7. Wujudkan Impian Anda Disini & Ajaklah Teman-Teman Anda Semua Untuk Ikut Bergabung Bersama Kami Hanya Di http://www.dewalotto.me !!!
    Raihlah Mimpi Anda Setiap Hari & Jadilah Pemenang !!!

    BalasHapus

Posting Komentar

Postingan populer dari blog ini

Tidak Kalah dengan Ibukota Provinsi, Ini 4 Kafe di Barabai yang Wajib Dikunjungi

Halo Kaka-Kaka bungas yang lagi membaca tulisan ini, mudahan sehat sabarataan lah. Kenalkan dulu nah, ulun Eca anggota FBB jua dan tulisan ini nih tulisan perdana ulun di Banjar Corner. Selamat membaca 🤗 Tau lah bubuhan pian di wadah ulun Barabai bisi 4 kafe nang kada kalah lawan di Banjarmasin? Han kada tau kalo, makanya bacai sampai tuntung lah. Barabai Hulu Sungai Tengah sabujurnya lain kota kelahiran ulun. Tapi, kayapa pun jua, ulun sudah lawas bagana di sana dan sudah tarasa jadi tanah kelahiran ulun saurang. Ulun mulai bagana di Barabai semenjak kelas 1 SMP. Waktu ulun masih sakulah itu, dasar balum ada nang ngarannya kafe nginih. Ulun lawan kakawanan dahulu bejalanan ke kedai atau depot haja. Nah, wahini lumayan banyak sudah cafe yang kawa dipakai hagan “feed” Instagram bubuhan pian. Ini nah yang menurut ulun musti pian kunjungi. 1. Hero Cafe Nah, kabalujuran banar ulun lawan anggota FBB nang lain suah bakumpulan di Hero Cafe ini mun pas handak betamuan. Di sini rami

Pantun Basa Banjar Gasan Manjaga Warisan Budaya

Assalamualaikum sabarataan. Alhamdulillah ulun akhirnya berkesempatan manulis lagi disini. Buhan pian penasaran apa yang handak ulun kisahakan kah? Lakasi baca lah. Di tulisan ini ulun handak bakisah soal pantun basa Banjar. Buhan pian mungkin sudah tahu, urang Melayu tu kada talapas lawan kabiasaan bapantun. Urang Banjar nang sarumpun lawan Melayu damintu jua, harat-harat baulah pantun. Pantun basa Banjar kada balain pang lawan pantun basa lain. Ada katantuannya jua nang musti diumpati. Mun kada diumpati pantun nang diulah kada baik atawa bisa jua kada kawa disambat pantun. Mun kita maulah wadai tu ada tuangannya. Mun maulah baju, ada polanya. Sama haja lawan pantun. Pantun nang baik ada katantuannya, ada tuangan, ada polanya jua, ngini nah: 1. Pantun nang bagus tu baisian ampat buting baris. Dua baris nang panambaian ngarannya sampiran. Dua baris nang pauncitan ngarannya isi. 2. Pantun nang bagus tu ada pola bunyinya, atawa pola parsajakannya. Polanya tu: ab-ab. 3. Pantu

8 Macam Wadai Banjar

Assalamualaikum, Dangsanak berataan. Kayapa habarnya nih? Mudah-mudahan sihat berataanlah. Aamiin.  Hari ini ulun handak menyambatakan ngaran-ngaran wadai khas urang Banjar. Banyak banar macamnya, tapi nang ulun kisahakan hari ini 8 buting haja. Amun handak sebarataan, dua hari dua malam kada tuntung kita bekisahan. 1. Wadai Lapis sumber : http://dapurummumusasyi.blogspot.com/2013/10/kue-lapis-kakao.html Wadai nang pemulaan ngarannya wadai lapis. Kamiran atawa adonannya biasanya diulah dua warna, imbah itu disumap salapis-salapis beliung-liung warnanya. Bila sudah pina karas salapis, hanyar dindaki lapisan di atasnya pulang. Harus sabar pang tu pang meulah wadai lapis ngini. Warna nang paling rancak diulah tu hijau putih atau cuklat putih. Meulah wadai lapis ngini biasanya di dalam cipir ganal nang dimasukakan ka dalam panci badandangan. Bila sudah masak kaina hanyar dihiris halus-halus sasuai salira. 2. Lumba Sumber : http://beritainfo.web.id/ Lumba ni tamasu