Bajalan ke Nateh Batang Alai (Hulu sungai Tengah)

Assalamualaikum…

Parkanalkan, ulun Dina Langkar asli urang Barabai cuman manatap di Banjar oleh laki urang Banjar pang. Tapi kuitan laki ulun ti asli urang Barabai *iih ai ujah nitizin sapang hiran, kada batakun aku* bakisah naham kalo ae handak tahu. haha....

Jadi inti nya, sebagai parantauan pasti ae karindangan lawan kuta Apam. Amun bulik kampung salain bacari kuitan saraba kaluarga, takana handak ae barikriasi jua kaya urang. Palihat ulun nang lagi viral nih tampat wisata hanyar ngaran nya Nateh.

Tapi lain “na’a tih alias napa tih” lah...

Nateh tipang ngaran nya. Ujah urang rami bangat...  Alah ae jar ulun palingan sungai wara diliat tutuh. Barabai ngaran nya napa nang diliat pada sungai ha lawan guha, rami napa nya…

Tapi tadimapa kah pas bulan Maulud tu luku leh asa handak ae balalah kasana, ayuha jar ulun balihat satumat barang.

Asa’an ading ti manyuruh baisukan, ujar ulun katiadaan baisukan hari tapasan ku baluman dijamur. Jadi ham kami tulakan kamarian ari bamutur sapadangsanakan.

Nateh ti andaknya di Birayang Batang Alai timur (Kabupaten Hulu Sungai Tengah), Birayang itu mulai Barabai kuta kira-kira 20 manit saku sampai ai. Kaina sampai Birayang ada simpang ampat kalo? Babiluk ke arah kanan pian nah imbah tu lurus ae lagi kira-kira sampai sana 25’an ada ae saku.

Saku ah jua kada mahitung bahimat aur maliat pamandangan nang bagus Masya Allah, rumah-rumah Bahari jua.

Tarus tarang ulun kada suah balalah arah situ, ulun rancak ae ke Birayang cuman tarus lagi amun nateh nih biluk kanan kalo nah mun ulun rancaknya lurus pas simpang ampat tuh ke Abung. Jadi pian amun ke Nateh nih paliatan gunung, udaranya lain pang kaya di kuta. Masya Alloh 💖..

Akses jalan nya mulus samulus muha ulun *alah aiii* cuman nang ngaran ulun kada tapi bisa ka gunung ti lih asa tadimapa kah maliat jalan inda baliuk. Saku amun di suruh mamilih antara ba sapida mutur lawan ba mutur hakun basapida mutur pang.

Gair acil maliat jurang, tapi amun pian nang tabiasa kada papa ae.soalnya jalan nya nang ulun liat muat haja tuh gasan dua buah mutur apalagi nang ulun liat banyak mutur truk jua.

Jadi pas di jalan kaina pian sekalian maliat bendungan bagus bangat, ngaran nya Bendungan Batang Alai.

Parak dah sampai yang dituju. Nah amun daerah handak menuju Nateh nya nih ulun kada menyaran akn pian bejalan saurangan mending bebanyak gen orang nya sualnya sunyi banar higa mehiga gunung batu wara biar indah tapi mun ulun asa takutan.

Nang mambari takutan itu kalo pina di culik manusia atau diculik hantu,hihihi....

Tapi kena pas sudah sampai Sungai natehnya banyak pemukiman warga kada sunyi lagi mana orang nya ramah-ramah jadi amun pian ba mutur sambil dibuka ae kaca nya basapa-sapa lawan urang sana.

Sayangnya pas ulun kasana banyu nya lagi karuh, padahal jah bagus banar amun lagi jaranih..di sini pian terjamin WC wan tampat ganti barasih nehh top, ada saung nya jua amun pian membawa kaluarga, ada panggung jua kalu ae handk ba kikibutan (keyboard organ tunggal) awan amun buhan pian handak be arung jeram ada jua penyewaan perahu karet ujah 150 ribu biaya sewanya.

Dikit ae 150 ribu tu amun bakawanan,ay imbah am nyata ae bakawanan handak manyaurangan kah pian mangayuh bahapal ha.

Ulun pas kesana di rawa ari jadi ham kada kawa bakisah banyak nah. Pas tulak barasih ari sampai sana di rawa datu saku mana malam jum’at mana mambawa bayi kada wani ulun kada ma’asi amun sudah dirawa alam tu bulikan ae mana sanja ari nya.

Haam, ini pank kisah bajajalanan ulun ke Nateh. Semuga kawa jadi referensi gasan pian yang belum pernah menjajak batis di Nateh atawa Barabai.

Kontributor: Dina Yulini Fahdina (www.dinalangkar.com)

Editor: Latifika Sumanti (www.fika-su.com)

7 komentar:

  1. Sayang ya airnya pas cokelat. Kalau jernih pasti pemandangannya lebih bagus lagi.

    BalasHapus
  2. Padahal ulun tadeh beharap banyunya warnanya jernih sekalinya karuh heh. Kecewa banar penonton nah handak melihat banyu yang jernih. Huhu :(

    BalasHapus
  3. Ham. .Busia pas ulun kesana pas banyu nya karuh leh, rugi acel jauh2 matan banjarbaru. Tapi handak jua pang leh merasai, kada handak mendangar habar wara

    BalasHapus
  4. Membayangakan banyu sungai tu dimapa bila naik? Ajin banjir ya lah

    BalasHapus
  5. Uunaya kampungnya kaluarga abah ulun. Birayang... Han keganangan am lawan bahari pas karicikan bila hari raya takumpulam. Jarang tagalnya ta ka nateh ngini ulun. Birayangnya haja

    BalasHapus
  6. Oke, aku harus menerjemahkan dan memahami ekstra wkkw


    andai airnya jernih ya, pasti lebih seger lagi :D

    BalasHapus
  7. Rupanya kita sekampung halaman haja. :D kaluarga padatuan ulun banyak di birayang, walaupun ulun rajin bila bulik ke daerah jatuh nya haja

    BalasHapus