Muharram, Minum Susu Sampai Mambubur Asyura

sumber : http://banjarmasin.tribunnews.com

Assalamu'alaikum sanak sekalian,

Kali ini ulun handak membahas salah satu tradisi urang Banjar di bulan Muharram. Kada papa kalo lah membahasnya di bulan Maulud kaya ini. Hehe. Nang kaya kita tahu berataan, Muharram adalah tahun baru Islam, yang dirayakan hampir seberataan umat Islam di seluruh dunia, temasuk di negara kita. Bagaimana lawan urang Banjar? Urang Banjar ternyata termasuk yang sangat bergembira bila Muharram datang. Urang Banjar jua meanggap bulan ini istimewa.

Tradisi Muharram di kalangan suku Banjar, Kalimantan Selatan jua unik dan sudah turun temurun terjaga. Buhan pian yang mungkin pernah bediam di beberapa daerah lain di Indonesia pasti kada pernah menamui hal yang sama seperti yang kita tamui di Banjar.

Misalnya tradisi tanggal 1 Muharram. Manyambut tahun baru Islam ini, beberapa daerah meadaakan “ritual” khusus. Di Rantau, Kabupaten Tapin misalnya, tiap 1 Muharram masyarakat yang bediam di daerah situ  meminum susu putih manis. Terserah haja susunya bisa merek apa haja, kada ditentukan.
Tapi biasanya bewarna putih dan berasa manis. Di Rantau, habis Sebahyang Subuh di mesjid-mesjid langsung disadiakan susu putih gasan jamaah yang habis sembahyang subuh. Kada di Mesjid atau langgar haja, di rumah gin urang minuman susu-an jua.  Urang Tuha sampai kakanakan dibari susu putih segelas di pagi 1 Muharram.

Tahulah buhan pian, sekalinya ada  filosofi soal minum susu ini. Minum susu di hari pertama bulan Muharram sekalinya diartikan dengan niat kita untuk kehidupan yang lebih baik tahun berikutnya.
Minum susu putih terutama susu putih yang manis jua sebagai harapan tahun yang kita jalani ini lebih manis. Jar urang, biar manis kesehatannya, manis kesejahteraan sampai manis dalam seberataan urusan yang hubungannya dengan Ketaqwaan kepada Allah.

Puasa dan Bubur Asyura

Keutamaan puasa di bulan Muharram pasti buhan pian sudah banyak yang tahu. Terutama di tgl 9 dan 10 Muharram. Uniknya, di masyarakat Islam Banjar nih, ada jua tradisi yang lain daripada yang lain.
Tradisi itu adalah beolah bubur Asyura. Bubur asyura hanya bisa kita tamui setahun sekali yaitu pada 10 Muharram. Bubur ini dibuat bergotong royong oleh masyarakat yang bediam di berbagai wilayah di Banjarmasin pada khususnya dan masyarakat Banjar yang bediam di Hulu Sungai.

Dalam buku “Islam dan Masyarakat Banjar”, Prof Alfani Daud  menulis tradisi bubur Asyura sudah ada dan berlangsung sejak ratusan yang lalu dalam budaya Islam masyarakat Banjar.

Jar sidin, adanya tradisi acara Mambubur Asyura sebagai kenangan lawan momentum rasa syukur mengingat perjuangan pejuang kaum muslimin dahulu yang pernah mengalami masa-masa panceklik kelaparan. Makanya semua bahan-bahan apa saja yang bisa dimakan, dimasak langsung berataan.
Rupanya, sampai wahini tradisi itu hidup tarus.  Kada meolahnya haja yang gotong royong, biasanya bahan-bahannya jua sumbangan sukarela dari warga yang bediam disitu. Ada yang manyumbang baras, bahan sayuran, ada jua yang duit. Terserah haja dan sesuai pemandiran dan kebiasaan tahun sebelumnya. Yang penting penuh ke-ikhlasan jar.

Bubur Asyura sebujurnya kayak bubur biasa. Cara meolahnya jua mirip haja. Tapi yang lain, bubur Asyura ini  beras yang digabung lawan 41 bahan makanan lainnya dan habis itu dimasak menjadi bubur. Bahan makanan yang 41 macam itu bisa apa haja misalnya kangkung, bayam, kacangpanjang, tempe ,tahu , waluh (labu) sampai gumbili (ubi). Bubur ini digawi rami-rami di sebuah tempat yang sudah disepakati berataan. Terutama yang menggawi adalah buhan binian yang saat itu ada di rumah.

Sedangkan tugas buhan lakian yang ada adalah menyalaakan bara apinya gasan memasak bubur tadi.
Jangan takajut kalau 10 Muharram kita malihat di Banjar dan sekitarnya, urang sibuk dimana-mana, sampai ke gang-gang dan masjid-masjid. Ada yang tugasnya meracaki sayur-sayuran , ada jua yang tugasnya meaduk-aduk rinjing ganal (wajan-Red). Nah, biasanya bila bubur sudah masak sekitar waktu Zuhur tinggal didoakan haja. Yang betugas mendoakan ni biasanya Bapak-Bapak yang habis sembahyang Zuhur di Masjid.

Gawian meolah bubur sudah tuntung. Tinggal tugas selanjutnya adalah menyebarakan bubur ntu. Hampir sekampungan biasanya mandapat bubur Asyura ini. Bisa jua urang membawa panci/mangkok ke tempat urang beolah bubur untuk maminta bubur Asyura gasan di rumah masing-masing.
Yang kada puasa hari itu bisa langsung memakan haja buburnya. Panas-panas bubur Asyura ini nyaman banar, apalagi buburnya sudah didoakan. Pasti pulang sehat bergizi karena campuran sayurnya macam-macam. Dimakan pakai sambal labih nyaman lagi. Bisa tepaluh tu pang buhan pian. Nah, yang hari itu  puasa, bubur ini menjadi menu berbuka puasa pas magribnya.

Sudahlah makan bubur Asyura 10 Muharram tadi? Selamat Tahun Baru Islam 1 Muharram 1440 H. Mudahan tahun ini kita berataan mendapat keberkahan dalam kehidupan. Aamiin.

Penulis : Enny Ratnawati
Blog : www.ennyratnawati.blogspot.com