Langsung ke konten utama

Bejejalanan ka Mandiangin


Assalamu'alaikum Female Blogger of Banjarmasin. Kenalakan ulun Rima Angel nang biasa manulis di www.rima-angel.com. Hari ini ulun manulis di blog Female Blogger of Banjarmasin tentang bejejalanan ka Mandiangin.

Langsung haja lah kisahnya. Jadi, saminggu nang lalu, tepatnya hari Minggu, ulun sudah barancanaan lawan kawan handak bejalanan ka Mandiangin. Eh, lain kawan ulun jua toh, kawan kaka ulun. Bubuhannya neh orang Palangkaraya nang rahatnya batugas di Banjarmasin.

Nah, mulainya neh nyata haja sudah matan rumah ulun. Rumah ulun neh di Sungai Baru, Kampung Katupat. Tahuan nai bisa bubuhan pian. Hihi 🤭 Mun kada tahu jua, anggap haja nah di Pal 1. Talalu banar mun sampai buhan pian kada tahu Pal 1 jua. 😜

Jadi, kami ka Mandiangin neh rancana handak mandi di air terjun pang nah. Nang bejalanan neh baampat, binian kaampatnya. Ulun, kaka ulun, lawan dua ikung kawan babinian. Jadi, kami ka Mandiangin neh bakandaraan haja.

Nang mulai matan rumah ulun di Pal 1 tadi nah lah, kira-kira sampai ka Mandiangin-nya sejam labih. Sabalum masuk ada babayar. Wahini kada hari liburkah, hari liburkah, ada nang manjaganya. Bahari parasa ulun kadada nang manjaga bila kada hari libur, jadi masuknya gratis. 🤣 Wahini sakali bayar masuk sakalinya 36.000 gasan saikung urang haja. Banyak banar bayarannya 🙈.  Bahari ulun terakhir masuk paling 5.000 - 10.000 haja.

Pas sampai kada langsung handak naik ka wadah air terjunnya pang, duduk hulu di warung kami. Makan sambil istirahat lawan betatakun lawan acilnya. Makan di warungnya murah haja jua, paling 12.000 nah. Nang ulun makan mie bemasak lawan es susu.

Pas betakun lawan acilnya, sakalinya air terjunnya kadada banyunya jar, paksa ai kami kada jadi naik. Kuciwa nah nang datang jauh. 😣

Marga nang tadih air terjunnya jar acilnya kadada banyunya, nyata haja sudah buhan kami kada jadi ka sana, tapi kami kada mau pang bejejalanan kami neh sia-sia kaitu haja. Sudah jauh kada mungkin bebulik kami.

Jadi, bubuhan kami baampat neh, memutusakan handak naik ka atas gunungnya. Kada bejalan batis tapinya kami, kada mungkin banar. 🤣 Kami naik bakandaraan. Di sana sudah ada akses gasan naik ka atas gunungnya bakandaraan, jalannya jua sudah beaspal.

Ulun neh awalnya nyata hakun kada hakun, gair banar malihat naiknya tuh. Bujurannya nah esktrim kah jar urang tuh. Tapi mau kada mau ai umpat daripada sudah sampai kadada nang digawi jua, ya kalo.

Naiklah bubuhan kami baampat neh pakai kandaraan. Ini pertama kalinya ulun naik. Bahari rancak ai sudah ka sini tapi kadada naiknya. Disariki abah pang bahari. Asli pian jalan naiknya mambari takutan. Mana jalan sisi kirinya kadada pembatasnya, mun salah saikit, gugur ka bawah tuh pang. Pas naik neh banyak banar nang dilewati. Ada Kolam Belanda jua. Nah, si kolam Belanda neh jua banyunya lagi kadada, karing banar. Maka lagi dibaiki jua. Buhan kami kada satup jua pang di sini.

Sabalum sampai puncak tuh, ada dua buting pos rasanya nah kami lalui. Imbah malalui pos pertama, ada batasan kaitu nah, ada wadah singgah gasan befoto, tapi lain pos. Bagus banar asli pemandangannya pian. Buhan kami bepotoannya di sini.

Imbah tuh lanjut lagi, buhan kami basinggah satumat di pos nang ke-2, gasan istirahat lawan nungkar minuman. Di sini jua bagus banar pemandangannya. Maka angin sudah sepoi-sepoi banar. Kawa haja jua berabah, asal jangan begarak-garak ha buhan pian pas berabahnya, gugur kena. 😜


maaf ulun handak umpat baputu jua 😅

Ulun neh asa hakun asa kada naik ka puncak marga jalan naiknya kalihatan banar mambari takutan, tapi dipaksa kaka, lawan kada mungkin jua kalo ulun batinggal sorangan di pos 2 neh. Nah, pas dari pos 2 neh satumat haja lagi naiknya, paling lima menit, imbah tuh parkir ai lagi.

Handak ka puncaknya neh kada am langsung sampai, perlu naik tangga lagi 500 meter rasanya nah ka atas. Pas sampai di atas, ada pos jua di sana. Uma pian anginnya kancang banar, kada kawa nang kisah cantik-cantik tuh, bekibar baju, rambut sagalaan. Awak haja rasa tarabang. 🙈



ulun lawan kaka ulun nah

Itu nah hasil foto pas di puncaknya. Bagus banar kalo. Kasi buhan pian mandaki gunung jua gen. Hihi 🤭 Kisah banar haja ulun ni menyuruhi, padahal sabalum naik haja gen takutan jua.

 Sampai katamu ditulisan ulun lainnya kaina lah. 😗






Ditulis oleh : Rima Angel (www.rima-angel.com)
Editor : Gita Puteri Yani (www.jurnalgita.com)




Regards,
Female Blogger of Banjarmasin

Komentar

  1. Ay, liwar larangnya tiket masuknya, 36rb seikung? Ckckck.... Ulun suah kesini pas karyawisata SMA, bejalan sampai ke benteng belanda di atas, liwar lapahnya T.T, kawawanian banar, padahal kdd guru yg mendampingi kami, darah muda kah jar urang tu, panasaran kd kawa ditahani

    BalasHapus
  2. Umaaa, tiketnya sing larangan kaitu lah. Tapi dasar bujur bungas banar pang pemandangannya ih. Mudahan kena ada kasampatan bajalanan ka sana jua.

    BalasHapus
  3. Maka bahari tu kd bebayar, gasan parkir banarai saku bebayar. Tapi ayu ai kadapapa bayar kalo gasan pemeliharaan ya lo supaya bagus tarus

    BalasHapus
  4. Humaaa pinanya rami pank laa wisata ka gunungg.. Sampai sana banyak lah orangnya?? Biasa bejibun nang kaya di bromo uaa wkwk

    BalasHapus
  5. Raminya lawas kada naik bukit tahura eh..

    BalasHapus
  6. Umayy itu larangnya, bayar nangapa haja 36 ribu?? Lawasnya ih ulun kada bejalanan ke mandiangin ni. Apalagi bila bemalam rami banar hahaha

    BalasHapus
  7. ma larangnya tiketnya. aku pernah sekali aja ke mandi angin ni behujung hilang tablet lakiku waktu itu

    BalasHapus
  8. Kena ke Mandiangin lagi ah bilanya rancak musim hujan, nyaman ada air terjunnya hehe

    BalasHapus
  9. Kaya apa kesahnya air terjun kdd banyunya? Hihihi ... Btw, ada rencanakah FBB tamasya?

    BalasHapus

Posting Komentar

Postingan populer dari blog ini

Tidak Kalah dengan Ibukota Provinsi, Ini 4 Kafe di Barabai yang Wajib Dikunjungi

Halo Kaka-Kaka bungas yang lagi membaca tulisan ini, mudahan sehat sabarataan lah. Kenalkan dulu nah, ulun Eca anggota FBB jua dan tulisan ini nih tulisan perdana ulun di Banjar Corner. Selamat membaca 🤗 Tau lah bubuhan pian di wadah ulun Barabai bisi 4 kafe nang kada kalah lawan di Banjarmasin? Han kada tau kalo, makanya bacai sampai tuntung lah. Barabai Hulu Sungai Tengah sabujurnya lain kota kelahiran ulun. Tapi, kayapa pun jua, ulun sudah lawas bagana di sana dan sudah tarasa jadi tanah kelahiran ulun saurang. Ulun mulai bagana di Barabai semenjak kelas 1 SMP. Waktu ulun masih sakulah itu, dasar balum ada nang ngarannya kafe nginih. Ulun lawan kakawanan dahulu bejalanan ke kedai atau depot haja. Nah, wahini lumayan banyak sudah cafe yang kawa dipakai hagan “feed” Instagram bubuhan pian. Ini nah yang menurut ulun musti pian kunjungi. 1. Hero Cafe Nah, kabalujuran banar ulun lawan anggota FBB nang lain suah bakumpulan di Hero Cafe ini mun pas handak betamuan. Di sini rami

Belajar Istilah Banjar

  Halo! Apa habar buhan pian sabarataan? Mudahan baik ajaa lah sabarataan, sehat selalu dan dijauhkan dari panyakit.   Nah kali ini ulun handak memadahkan beberapa istilah dalam bahasa Banjar yang mungkin banyak dari pian masih balum tahu karena kada tebiasa berbahasa banjar sehari-hari, atau hanyar aja pindah ke banjar. Oiya, ulun ingat banar bahari pas SD balajar bahasa Banjar muatan lokalnya, amun wahini masih jua kah kakanaan tahu di istilah ni?   Berikut beberapa istilah dalam bahasa Banjar:   1. Salesmaan   Salesma sabujurnya adalah ngaran virus yaitu virus salesma, yang begejala behingusan atau pilek. Nah rancak urang tetap menyambat salesmaan jua amun ada nang kena flu karena gejala si salesma lawan flu nih mirip yang nyata bahingusan lawan batukan.   2. Hawai   Hawai nang ini lain ngaran wilayah lah, hawai nang dimaksud di sini tu artinya semacam sunyi tu nah, misalnya urang tebiasa di kota lalu bejalanan ke desa pasti lain suasananya, tebiasa pina rami

Kisah Intingan wan Dayuhan

Halo sabarataan, batamuan pulang lawan ulun, Nisa. Kali ini, ulun handak mangisahakan kisah Intingan wan Dayuhan nang rajin tu selalu dikisahakan bila ulun handak guring waktu lagi halus dulu. Kisahnya ni turun temurun dari zaman datu, nini, mama, anak sidin, dan cucu sidin, bisa jua kaina sampai ka buyut sidin. Kisahnya nih rami, sampai taguring guring mandangari kisah ini ja, lucu pulang han. Bila pian suah mandangar kisah Intingan wan Dayuhan, bararti kita sama. Zaman bahari kadada pang yutube wan intirnit. Nang ada kisah dari muntung ka muntung ja. Nang kaya apa kisahnya, ni ulun kisahakan nah ka bagian pian sakira kada panasaran. Kisah Intingan wan Dayuhan  Zaman bahari ada dua ikung badua ba-ading nang bangaran Intingan wan Dayuhan. Kisahnya Intingan nang jadi kaka, Dayuhan ading nya. Ibarat kata, si Dayuhan nih inya orangnya kada tapi paham apa yang di padah-akan tu, atau bahasa kitanya, ada nang kurang kaitu nah. Ujar kisah si ading nih kada hakun sakulah, mac