Langsung ke konten utama

Mandai, Kuliner dari Kulit Buah Rasa Daging Ayam


Assalamualaikum, kayapa habar? Sudah lah makan bubuhan pian? Nah, mun bapandir makanan ni pasti cagaran rami. Iya ae rami, Inya bubuhan Banjar ni banyak makanannya nang nyaman-nyaman.
Daging buahnya sagan gaguduh, kulitnya sagan mandai
sumber: Wikipedia.com

Kada samata nyaman haja, bubuhan Banjar ni jua liwar kreatif bila bamasak. Misalnya nah, paku haja gen kawa diulah sayur, Han kayapa? 😂

Acil neh, begayaan saku lih. Tanaman paku buhannya ae maksud sidin tuh 😆.

Diantara makanan yang menurut Acil nyaman-nyaman, ada jua kulinernya yang unik, yaitu Mandai.


Apa ngitu Mandai?

Mun kada urang Banua wajar haja mun kada tahu. Sini nah Acil padahakan. Mandai itu nang kaya asinan yang diulah dari kulit buah Cempedak atau tiwadak kami biasanya mengiau tanaman yang basapupu sekali lawan buah nangka wan  basapupu jauh lawan durian ngini.

Hampir kedada yang terbuang dari tiwadak aka cempedak di wadah kami. 

Biar kesannya pina kada membari kapingin, jangan dihawai buhannya lah. Mandai ni bila ditumis atawa disanga, baunya harum mampaur.

Rasanya gin nyaman. Kinyul-kinyul kaya daging ayam. Apalagi dimakan lawan nasi panas sambil dipiciki lumbuk Hiyung asal Banua nang liwar padasnya tuh, basiap-siap haja nasi tambah dihiga. 😁
Kada kanasian pian. Lihati ja

Kayapa? Suah lah mencobai?

Mun balum, pasan ulun, bila ka Banjar, jangan kada ingat makan Mandai! Buktiakan kesah ulun ni.

Kena besinggah ka Rantau, ka rumah Acil lah. Kena Acil ulahakan, sepesial gasan bubuhan  pian yang handak tau dirasa.

Ayuja, sekian dulu lah kisah tentang mandai. Salam kuliner dari Acil.

Waalaikumsalam.

Penulis: Zulaeha (www.syunamom.com)
Editor: Latifika

Komentar

  1. Umaaa dasar liwar banar Acil nih. Lucut ulun tatawa nah. Wkwkwkwk

    Mandai ni dasar kuliner nang unik banar. Jar urang pahuluan tu "trademark" kah jar :D Mintuha ulun nang urang Jawa tulen tanganga waktu tahu mandai ni diulah dari kulit tiwadak. Asli unik banar.

    BalasHapus
  2. Ulun kamana haja badiam hingga kaganangan mandai, dalas bakirim tu pang matan banjar mun sudah kada ketahanan handaknya. Mun kada manungkar tiwadaknya di mall maraha larang. Kada bacari buahnya tapi handak mandainya ja.. Wkwkwk acil ni liwar maulah lapar haja

    BalasHapus
  3. Liwar maulah ulun lapar ������ mandai ngini dasar nyaman banar nangkaya daging ayam rasanya hahaha. Ayuha kena ulun singgah ke rumah acil lah minta masakan mandai.

    BalasHapus
  4. Liwar dasar monday nih. Eh, salah manday toh, ham siapa kah tukang ulah ngaran nih. Bule sako leh. Haha. Nyaman dasar liwar kada kenasian tu pang dapatnya. Biar kada ba iwak hakun haja. Tapi ingatakan nang riwayat magh lah jangan pina behimat kali peneng kepala. Haha

    BalasHapus
  5. Umaa liwar sigar liur mun makan mandai.. ulun handak bemasakan yo menu utama mandai wkwk
    Becacapan asam kamal nyaman banar hehe

    BalasHapus
  6. aku bahari kurang ketuju padahal lawan mandai ni. imbah sudah smakah hanya ketujunya

    BalasHapus
  7. Mandai tu paling nyaman disanga karing-karing dimakan lawan nasi panas. Apalagi nang pajaan lawas rasanya nahap banar. Beuuuhh, kalah tu pang daging. Murmer jua, hehe.

    BalasHapus

Posting Komentar

Postingan populer dari blog ini

Tidak Kalah dengan Ibukota Provinsi, Ini 4 Kafe di Barabai yang Wajib Dikunjungi

Halo Kaka-Kaka bungas yang lagi membaca tulisan ini, mudahan sehat sabarataan lah. Kenalkan dulu nah, ulun Eca anggota FBB jua dan tulisan ini nih tulisan perdana ulun di Banjar Corner. Selamat membaca 🤗 Tau lah bubuhan pian di wadah ulun Barabai bisi 4 kafe nang kada kalah lawan di Banjarmasin? Han kada tau kalo, makanya bacai sampai tuntung lah. Barabai Hulu Sungai Tengah sabujurnya lain kota kelahiran ulun. Tapi, kayapa pun jua, ulun sudah lawas bagana di sana dan sudah tarasa jadi tanah kelahiran ulun saurang. Ulun mulai bagana di Barabai semenjak kelas 1 SMP. Waktu ulun masih sakulah itu, dasar balum ada nang ngarannya kafe nginih. Ulun lawan kakawanan dahulu bejalanan ke kedai atau depot haja. Nah, wahini lumayan banyak sudah cafe yang kawa dipakai hagan “feed” Instagram bubuhan pian. Ini nah yang menurut ulun musti pian kunjungi. 1. Hero Cafe Nah, kabalujuran banar ulun lawan anggota FBB nang lain suah bakumpulan di Hero Cafe ini mun pas handak betamuan. Di sini rami

8 Macam Wadai Banjar

Assalamualaikum, Dangsanak berataan. Kayapa habarnya nih? Mudah-mudahan sihat berataanlah. Aamiin.  Hari ini ulun handak menyambatakan ngaran-ngaran wadai khas urang Banjar. Banyak banar macamnya, tapi nang ulun kisahakan hari ini 8 buting haja. Amun handak sebarataan, dua hari dua malam kada tuntung kita bekisahan. 1. Wadai Lapis sumber : http://dapurummumusasyi.blogspot.com/2013/10/kue-lapis-kakao.html Wadai nang pemulaan ngarannya wadai lapis. Kamiran atawa adonannya biasanya diulah dua warna, imbah itu disumap salapis-salapis beliung-liung warnanya. Bila sudah pina karas salapis, hanyar dindaki lapisan di atasnya pulang. Harus sabar pang tu pang meulah wadai lapis ngini. Warna nang paling rancak diulah tu hijau putih atau cuklat putih. Meulah wadai lapis ngini biasanya di dalam cipir ganal nang dimasukakan ka dalam panci badandangan. Bila sudah masak kaina hanyar dihiris halus-halus sasuai salira. 2. Lumba Sumber : http://beritainfo.web.id/ Lumba ni tamasu

Kisah Intingan wan Dayuhan

Halo sabarataan, batamuan pulang lawan ulun, Nisa. Kali ini, ulun handak mangisahakan kisah Intingan wan Dayuhan nang rajin tu selalu dikisahakan bila ulun handak guring waktu lagi halus dulu. Kisahnya ni turun temurun dari zaman datu, nini, mama, anak sidin, dan cucu sidin, bisa jua kaina sampai ka buyut sidin. Kisahnya nih rami, sampai taguring guring mandangari kisah ini ja, lucu pulang han. Bila pian suah mandangar kisah Intingan wan Dayuhan, bararti kita sama. Zaman bahari kadada pang yutube wan intirnit. Nang ada kisah dari muntung ka muntung ja. Nang kaya apa kisahnya, ni ulun kisahakan nah ka bagian pian sakira kada panasaran. Kisah Intingan wan Dayuhan  Zaman bahari ada dua ikung badua ba-ading nang bangaran Intingan wan Dayuhan. Kisahnya Intingan nang jadi kaka, Dayuhan ading nya. Ibarat kata, si Dayuhan nih inya orangnya kada tapi paham apa yang di padah-akan tu, atau bahasa kitanya, ada nang kurang kaitu nah. Ujar kisah si ading nih kada hakun sakulah, mac